Read Mayangna 2 Crónicas 18 Bible Online

2 Crónicas 18 - Mayangna bible

2 Crónicas 18

¹Josafat witing ritsni balna kidika mahni palni duna dai dawak risnipik bik, dawak witing laih Acab unisah kalna.

²Kurih as as bayakwak usnit kat, Josafat Samaria yakat kiuna Acab yakat talna atnin, dawakat Josafat yakat alasnina yamnin yulni sīp dawak turuh bik mahni ina, bahang kidika laih witing kulnin dulauwak Galaad sauni kau Ramot niningyakat kalbauna atnin yulni.

³Rahm kaput laih, Israel kingni Acab yaklauwi Judá kingni Josafat yakat kalyulwi dakana: —¿Yang karak yawakih mawih Galaad sauni kau Ramot pāni kidika niningyakat kalbaunin? Josafat biriwi nangnitlana: —Yang, dawak kalbauyang balna dutayang kidika bitik laih man karak yangna, dawak man muihma balna karak kalbauna yawinikna.

⁴Kaunah baisa tanit kauh, Dawan kulnin kidika yulta dakah.

⁵Israel kingni witing prapit balna uduhna, bitik kat 400 dai, dawak diyulwi dakana: —¿Galaad sauni kau Ramot kidika niningyakat kalbauniknayah, kidika awas kat kalbaunikna awasyah? Dawakat witingna biri nangnitlalana: —Niningyakat kalbautah, Papang yaklauwi man tingma yakat awarang.

⁶Kaunah Josafat yulwi dakana: —¿Akat Dawan pranipit ūk disyah, witing yakat bik kalyuldi dakanin?

⁷Israel kingni yaklauwi Josafat yakat nangnitlana: —Baisa as ki, witing munah sipkarang Dawan yakat kalyulwi dakanin. Kidika laih Micaías. Kaunah yang yamni talasyang, kat witing yul yamni as bik yayulwas ki, kaunah yul dutni manah ising pakwi. Kaunah Josafat yaklauwi kalyulna: —Kaput yulwinih.

⁸Kidika minitni yakat, Israel kingni yaklauwi kalbauyang muihni balna taninatuna[21] as yulwak kiuna, dawak pakna: —¡Sirihni kaiwang Imla walanbis al Micaías kidika!

⁹Israel kingni dawak Judá kingni Josafat bik, witingna wār prakni kidika kawi dawi tronnina yakat yalahna raudai, Samaria tawanni kiwi kawa kau langni yakat, dawak prapit balna bitik laih witingna muhnitna yakat kulninna abahlna dai.

¹⁰Quenaana walanbis al Sedequías laih ayan kau di tamni kapat yamna dai puhnin dini, bahang witing sarahwi yulna: “Dawan yaklau aput yulna: ‘¡Adika tamni balna kau Siria muihni balna nining yakat kalbauta, ita disyamtanama!’ ”

¹¹Prapit balna bitik sihm yulni manah yuyulna. King yakat kalyuyulwadai: “Galaad sauni kau Ramot niningyakat kalbautah, kaput laih man minit bayakma, kat Dawan yaklauwi tawanni nuhni kidika mawarang.”

¹²Micaías yakat kalyulna kiuna dai kidika yaklauwi aput kalyulna dai: —Prapit balna bitik, king yakat yul yamni as kalalana. Kaput bahang, man kalma dinit yakat buktik yultayang, man bik witingna yuyulna kapat kalyulma, yul yamni as kalyulma.

¹³Micaías yaklauwi biri kalyulna: —¡Dawan ayangni kau yaktik yultayang, Papangki yaklauwi yulnin yapakwarang kidika yulki ki!

¹⁴Kidika usnit kat king muhni yakat kiwak king yaklauwi kalyulwi dakana: —Micaías, ¿Galaad sauni kau Ramot pāni kidika niningyakat kalbauniknayah, kidika awaskat kalbaunikna awasyah? Dawakat Micaías yaklauwi kalyulna: —Niningyakat kalbautanauh Papang yaklauwi minit bayaknin kidika mawarang.

¹⁵Kaunah king yaklauwi nangnitlana: —¿Watyapak mayulnikyah, Dawan ayangni kau manah yakta yul rahm kidika yayulnam?

¹⁶Kaput dawak Micaías yaklauwi kalyulna: “Israel muihni balna bitik talnayang asangpas yakat rana bangkat sihm sīp balna mainditalyang muihni dis kapat. Dawan yaklauwi yulna: ‘Adika balna laih daniwan diski; witingna bitik isningnalak ūnina kat kat uiwang.’ ”

¹⁷Israel kingni yaklauwi Josafat yakat kalyulna: —¿Mayultasyang daih, adika alni yang akat yul yamni as bik yayulwas ki, kaunah yul dutni manah yayulwi?

¹⁸Micaías baisa minitlakwi yulna: —Kidika bahang yulnaman kidika, manna Dawan yulni kidika dakanauh: Dawan witing trunni yakat yalahna sakkat talnayang, dawak kisang kau kalbauyang muihni balna bitik kalnina kau yaklauna bangkat talnayang, witing yaihnit yakat, tingnipal dawak wadahni niningkauh bik.

¹⁹Kaput laih Dawan yaklauwi yulwi dakana, wais kiwi, Israel kingni Acab yakat kulnin uswi dulauwarangyah, Galaad sauni kau Ramot pāni niningyakat, dawak kaput laih yakat dauwarangyah. As as laih yulnina sat as yuyulna dawak, ūk balna kidika satuk yuyulna.

²⁰Kaunah spirit as Dawan muhni yakat kiwi kalyulna witing yamwarang ki. Dawan yaklauwi kalyulwi dakana kidika amput yamwarangyah,

²¹dawak spirit kidika yaklauwi kalyulna, king pranipit balna bitik yakat alas diyulwarang ki. Kaput laih Dawan yaklauwi kalyulna, rahm laih witing kaput yamwi alas diyulwarang ki, dawak witingna uiwi yayamwarang ki.

²²Dawak waralaih uman amanglataman Dawan yaklauwi spirit alas as ānaman pramapit balna tininapas yakat, bahang kaput laih bahta dis danam kidika āna sakki.

²³Kaput laih Quenaana walanbis al Sedequías kidika, Micaías yaihnit yakat kiwi tingni kau muhni yakat tisna dawi aput kalyulna: —¿Dawan spiritni kidika angkat kiwadah yang kaupak, man yakat kaput mayulnik kidika?

²⁴Dawak Micaías yaklauwi biriwi nangnitlana: —Man ismangkatma muih payayahwa balna panina pasyakat maldalik-awama mani kat

²⁵Kaput laih Israel kingni yaklauwi pakna: —¡Micaías kidika laih silak kau duyawanauh, Amón muhni yakat tawan nuhni kabamintni kidika yakat, dawak yang walakibis Joás muhni yakat bik!

²⁶Diyultanauh yang lawik dipaktayang silak ūni yakat ihiwang, dawak witing kasnin kidika dibin palni karang, plawar busna dawak was karak, yang sangka yamni nawattik aiwaki kat.

²⁷Micaías baisa aput yulwa dai: “Man yamni, sangka, lawa aiwama kat Dawan kidika yang munah yulbauwas dai.”[22]

²⁸Kaput laih Israel kingni dawak Judá kingni Josafat karak kalpakwi Galaad sauni kau Ramot pāni niningyakat kawi uiwa dai.

²⁹Israel kingni yaklauwi Josafat yakat aput kalyulna: —Yang kalbaunin yakat āwik yawaki ki malnikau, dawak man laih yang askina[23] balna kidika āwama. Kaput laih Israel kingni kidika asna ūk kawi yakmaldi kalbaunin yakat kawi kiuna.

³⁰Kaunah Siria kingni yaklauwi dipakna dai, kalbauyang tunan nunuhni balna 32 yakat, kalbaunin kārni kikilwa balna yakat, muih ūk niningna yakat laih kalbaunin awaski, kaunah Israel kingni niningyakat manah kalbauna atnin.

³¹Kalbauyang tunan muihni balna kalbaunin kārni kau kilwi kalbabauwa kidika, Josafat yakat tatalna, dawak witingna kukulna, kidika laih Israel kingni, bahang awaihdakwi kalbauna kawi uina. Kaput laih Josafat kidika ilp yulwi sarahna, dawak Dawan yaklauwi ilp kalana. Papang yaklauwi kidika kaupak naikau yakna dai,

³²kaunah witingna tatalwak Israel kingni awas kat uiwi uiwa kidika dadana dai.

³³Kaunah kalbauyang alni as witing sinibang pini ruhmna kidika Israel kingni kat basna, bahang daunin praisni kat, witing kalbaunin prakni kalana kidika walsah yakat. Dawak witing yaklauwi pakna kār tunan duwasak kidika muihni yakat: —Nawatta wirlawa kalbaunin pas akaupak yayaktah, dutni palni yadakna ki.

³⁴Kidika mani kalbabauna kidika laih parasni palni dai, dawakat Israel kingni kidika kalni kau yaklauna sakdai kārni pasyakat, Sirio balna niningna yakat yaklauwi maulahu kat, kaput laih ma kakiwakat dauna dai.