Read Mayangna 2 Crónicas 21 Bible Online

2 Crónicas 21 - Mayangna bible

2 Crónicas 21

¹Josafat dauna, dawak Devid tawanni nuhni yakat nununa dai, witing muihni bararak balna pāni yakat. Kidika usnitkat, witing walanibis al Joram kidika king kanadai.

²Joram wirahni ahal balna, dawak kidika balna laih sihm Josafat walanbis ahal balna dai, bahang adika balna dai: Azarías, Jehiel, Zacarías, Micael dawak Sefatías. Kidika balna bitik laih Josafat Judá kingni[30] walanbis balna manah dai.

³Witing papangni yaklauwi gol, lalah dini balna kidika manas kalana dai, dawak di ūk minit nuhni duwa balna kidika bik. Dawak kaput bik laih tawan nunuhni pararasni balna kidika bik diana dai Judá yakat, kaunah king kawa kidika laih walanibis Joram yakat kalana, kat kidika laih walanbis barakni tatuna dai bahang.

⁴Kaunah Joram, witing Papangni trunni kidika yamni kawi duna mani, witing wirahni ahal balna bitik kuhbil kau ina dai, dawak Israel yakat tunan muihni balna as as bik ina dai.

⁵Witing kurih 32 laihna kat king kana, dawak Jerusalén yakat kurih tiaskaubās king kana dai.

⁶Kaunah witing laih Israel kingni balna usnitna uina, dawak Acab sulani balna bik usnitna bik uina, kat witing yalni kidika laih Acab sulani dai bahang; kaput laih witing di yamna balna kidika Dawan minikpa yakat dutni manah dai.

⁷Kaunah Dawan laih Devid walanibis balna king kawi aiwa kidika dispamnin kulwas dai, dawak Devid karak pramis yamna dai kidika bik, witing yakat pramis yamna dai, walanibis balna yakat bik sihm witing yakat kalyamna kaput diyamna atnin, bahang kaput laih ban duduwarang awas as dahlna kidika.

⁸Joram king kana mani balna yakat, Edom yaklauwadai Judá parasni duwasak kidika niningkauh, dawi witing alas kingni āwi duna.

⁹Kaput laih Joram witing wār kalbauyang balna taninatuna duwasak kidika dawak kalbaunin kārni balna duwa kidika bitik duwi kiuna, dawak witingna pukta yaklauwi uiwi Edom muihni balna niningna kauh kalbabauna, awaihdadakna dai yakat.

¹⁰Kaunah Edom witing silp dakwi kalahna, warmani kat ban kaput ki. Sihm kidika mani balna yakat Libna tawanni nuhni kidika bik alas dakwi kalahna, kat Joram Dawan kidika ruhmwi dana dai bahang, witing muihnibararak balna Papangnina kidika.

¹¹Kidika minit yakat, Papang kukulwas muihni balna minitna yulnin ūni bik pakwi diana dai, Judá asangni balna yakat, bahang kidika yulni laih Jerusalén muihni balna kidika barangni awasdai, Dawan yakat, dawak kaput yamwak Judá kidika ta disna.

¹²Kaunah Joram wauhtaya as prapit Elías kaupak duna dai, bahang wauhnitaya yakat aput ulna dai: “Dawan, Devid Papangni kidika, kidika aput mayulwi: ‘Man papangma Josafat yamna balna kidika usnit uita yawasmahn, Judá kingni Asa yamna balna kidika,

¹³nawatkauh laih Israel kingni balna yayamna kidika usnitna uitaman, man lawa yamtang kat Judá dawi Jerusalén muihni balna kidika Dawan yakat barangni awaski, sihm Acab sulani balna dai kapat. Kidika minit yakat man wirahma balna īnaman, witingna kauh yayamni dai man karak dawakat.

¹⁴Kidika bahang Dawan yamwakat tawanma minit yakat, walambis balna minit yakat, yalma balna minitna yakat dawak dima balna kidika minityakat bik bukna karang di dis danin wahni kidika nuhni palni.

¹⁵Dawak man mamatyakat siknis manas bik bukna karang. Bama unuhni yakat siknis laihna karang, bahang sikninis kidika sip mayamwas ban karang, dawak kaput laih bama bikisni balna kidika kalahwarang.’ ”

¹⁶Kaput dawak Dawan yaklauwi yamwak, filisteo balna dawak árabe balna, kaput bik Cus yaihnitkau muihni balna kidika bik kulninna daukakalna Joram niningyakat;

¹⁷kidika balna laih Judá niningyakat uina, dawak kidika balna saunina yakat kakana, dawak king ūni yakat di bangdai kidika bitik duwi uina dai, walanibis balna dawak yalni balna bik duwi uina. Walanibis aslah watna kidika laih Joacaz manah, kidika laih walanibis bin dai kidika.

¹⁸Kidika bitik bayakwak usnit kat, Dawan yaklauwi wah as kalana dai, siknis kau, bahang kidika sikninis laih sip kalyamwas dai bani unuhni yakat.

¹⁹Ma balna bayakna, dawak kurih as as bayakwak, witing bani bikis balna kidika kalalahna, siknis kallaihna dai kidika yulni, dawak dalani dutni palni wauhwi dauna. Witing tawanni muihni balna kidika awas as bik dadahlwasdai witing yulni, witingna muihnina bararak balna kau yayamna dai kaput.

²⁰Witing king kana mani kat kurih 32 duwadai, dawak Jerusalén yakat manah kurih tiaskaubās king kana. Witing kiuna kidika muih as bik kaidasdai. Devid tawanni nuhni yakat nununa, kaunah king balna nunuwa sauni ū yakat laih awasdai.