Read Mayangna 2 Crónicas 22 Bible Online

2 Crónicas 22 - Mayangna bible

2 Crónicas 22

¹Jerusalén muihni balna kidika Joram pāni yakat, walanbis bin kauh Ocozías kidika king ahana dai, kat di malyang balna kidika árabe balna karak kalpakwi, ū lababanni balna yakat uiwi kakana dai, dawak Joram Judá kingni walanibis bararakni balna kidika bitik ihina dai. Kaput laih Joram walanibis Ocozías kidika Judá kingni kana dai.

²Witing king kana, kurih 22[31] duwa kat, dawak Jerusalén yakat kurih as king kana dai. Witing nanangni ayangni laih Atalía, bahang witing laih Omri sulani dai.

³Dawak Ocozías bik Acab usnit uina dai, kat nanangni bik yul dutni sumalwadai bahang, dawakat witing kidika Acab ūni pas muihni balna kidika kalwanaih kidika yulni witingna aslah bahang, witing di yamwa kidika dutni manah dai Dawan minikpa yakat. Witing papangni dauna usnit kat witingna kidika yul sumamalwadai, kaput bahang dutni yakat kalduwi uina.

⁵Witing yulni dakawa kidika bahang, Ocozías kidika Acab walanbis Joram Israel kingni kidika karak aslah kalalahna dai, Siria kingni Hazael Galaad sauni kau tawan nuhni Ramot yakat sakkidika niningyakat kalbauna atnin yulni. Kaunah Siria muihni balna yaklauwi Joram yakat tutusna dai,

⁶dawakat witing laih Jezreel yakat nawatwi kiuna, Ramot kau, Siria kingni Hazael niningyakat kalbauwak tutusna pilauni kidika yamni kalahna atnin yulni. Kaput laih Joram kidika siknis tusbahang, Ocozías kidika Jezreel yakat kiuna dai kaltalna atnin.

⁷Papang kaput kulna dai, Ocozías kidika Joram yakat kiwi talwalikkauna dauna atnin. Kiwi kawa minitni yakat Joram karak kalahwi uiwa, Nimsi walanbis al Jehú karak kalpakna atnin yulni. Kaunah Papang yaklauwi Jehú kidika walwi yakna dai, witing yaklauwi Acab sulani bitik iwi disyamna atnin.

⁸Jehú kidika, Acab sulani balna niningna yakat lanina yamwa sakkauna, Judá tanituna balna dawak Ocozías wanaihni balna karak bik kalpakwadai, bahang kidika balna laih witing dini yayamwa dai, dawak kidika bitik imukna.

⁹Ocozías yakat bik walnin sihna dai, bahang witing kidika Samaria yakat yakmaldana sakdai, dawakat laihwi Jehú yakat duwi uiwak ipamna. Kaunah nununa, kat Josafat walanbis dai bahang, dawak witing kidika bik Dawan yakat walna dai. Kaput laih Ocozías wanaihni as bik disdai, sip atnin kingni lani kidika laihwi duna atnin.

¹⁰Ocozías nanangni Atalía kidika, dakana walanbis dauna kidika, dawak kiwi Judá king sulani balna kidika bitik imukna.

¹¹Kaunah king Joram walanbis yal Josaba kidika yaklauwi pirini lana dai, Ocozías walanbis al Joás kidika, yal maintalwa yakarak, king walanbis as balna kidika iwasakkat, Atalía kaupak malpamna, payayahwa pāni as kau. Kaput laih ihiwas dana. Kidika kuduh Josaba yamwa dai, Joram walanbis yal, Ocozías wirahni yal, dawak sumalyang Joiada yalni dai kidika.

¹²Dawak Joás kidika yayal balna karak yakmaldana dai Dawan ūni yakat. Bahang kaput laih Atalía witing kidika sauni yakat king kana.