Read Mayangna 2 Crónicas 24 Bible Online

2 Crónicas 24 - Mayangna bible

2 Crónicas 24

¹Joás kidika kurih tiaskaubu duwa kat king kana, Jerusalén yakat manah kurih 40 king kana dai. Witing nanangni ayangni laih Sibia dai, dawak witing kidika Beerseba kaupak dai.

²Joás di yamna bitik kidika Dawan minikpa yakat barangni dai, sumalyang Joiada kidika sangka dai mani yakat.

³Joiada yaklauwi yayal bu kalana dai, bahang kidika balna karak walanibis balna yakna dai, ahal dawak yayal bik.

⁴Ma as as bayakwak usnit kat, Joás witing Dawan ūni kidika yamna atnin kulna,

⁵kidika yulni sumalyang balna dawi libait balna bitik yakat uduhwadai dawak di yulna: “Manna Judá tawanni balna bitik yakat alahwa yawanauh dawak Israel muihni balna bitik kaupak lalah walta uduhtanauh, kaput laih kurih kaiwa bitik yakat Papang ūni kidika pislaknin yulni. Adika manna sirihni yamtanauh.” Kaunah libait balna kidika bainah yayamwasdai.

⁶Kaput laih king yaklauwi sumalyang nuhni Joiada yakat yulwak kiwakat kalyulna: —¿Ampadawak bainah dipaktangkat libait balna kidika Judá dawak Jerusalén kaupak lalah walwi duahaiwasyah, Dawan dini yamyang Moses yaklauwi la āna dai kidika, Israel muihni balna kaupak uduhnin dai kidika, Papang ūni labanni dini?

⁷Kat Atalía kidika, witing palni dutni dai bahang, dawak usnit uiyang balna bik Papang ūni yakat kakana dai dawak witingna daninawan dauh balna yakat prinias yamna atnin yulni Dawan ūni yakat dunin dini balna dai kidika bitik duwi uina dai.

⁸Kaput laih king yaklauwi sihwak baks as yayamna, dawak Dawan ūni dūrni yakat lalakna ahni niningyakauh.

⁹Kidika usnit kat Judá dawak Jerusalén muihni balna bitik yakat isningna papakna, Dawan yakat di kalanin kidika, Dawan dini yamyang Moses yaklauwi kauhmak wanilang kau Israel muihni balna yakat dipakna dai kaput.

¹⁰Dawakat tunan muihni balna dawak tawan muihni balna bitik kulninna alasna karak di duwi uina la baksni yakat ahana dai, bung dana kat.

¹¹Libait balna yaklauwi baks kidika king yakat duwi aiwadai, witing yaklauwi laihwi talnin yulni; talwak baks kidika bahngna kat, king yaihnit kau yul kalahwak ulyang kidika dawak sumalyang nuhni yaklauwi muih as āna likkidika, witingna uhyayakwadai baksni kidika, dawak usnit kat watwi baksni kidika pāni yakat lalakwadai.

¹²Kidika dawak Joiada karak yaklauwi lalahni kidika Dawan ūni yamnin tunan muihni balna yakat diayana dai, kipala sahyang balna dawak tat kau ū yamyang balna yakat yuyulwakat Dawan ūni kidika yamna atninna. Dawak ayan balna dawak bras yakat wark yamnin muihni balna yakat bik walninna dai, makat yulnin ūni kidika yamna atninna.

¹³Kidika warkni yamnin muihni balna kidika mahka wark yayamna, dawak witingna tingnina warkni kidika barakna, dawak Papang ūni kidika muhnilau amput yayamna dai kidika kapat kalna dai, bahang kaput laih yamni kalna dai.

¹⁴Warkni kidika yamwi dahn dadana kat, lalahni sutni bayakna balna kidika duwi uiwi kalalana dai king yakat dawak Joiada yakat bik, dawak kidika lalahni kau Dawan ūni yakat di dunin dini balna kidika yayamna dai, makatyulnin, sakripais karauni kauna busnin kidika balna yakat di dunin balna kidika yayamna, dawak ispun nunuhni bik yayamna dai, dawak kidika minit yakat di dunin dini ūk balna bik yayamna dai gol dawak lalah kau bik. Joiada sangka dai mani yakat, sakripais karauni kauna busnin kidika nining ban kaput yayamwadai Dawan ūni yakat.

¹⁵Kaunah Joiada laih muihbarak kalna dai, dawak kurihni nuhni duwi kat dauna dai. Dauna mani kat kurih 130 duwadai;

¹⁶dawak Devid tawanni nuhni yakat nununa, king balna yaihnitna yakat, kat Israel balna karak yamni dai, Papang karak dawak makatyulnin ūni karak bik.

¹⁷Joiada dauna usnit kat, Judá tanituna balna uiwi ayangni nuhni yayamna witing yakat barangni atnin yulni. Dawak king witing dāwak yul kalsumamalwadai,

¹⁸dawakat witingna Dawan ūni kidika ruhmwi dadana, witingna muihnina bararak balna Papangnina dai kidika, dawak Asera kaput bik laih dawan dauh ūk balna yakat minitna yuyulna. Kidika dutni yayamna yulni Dawan anna Judá dawak Jerusalén niningyakat.

¹⁹Kaput kaunah Dawan yaklauwi prapit sihna, witing yakat nawatwi uina atnin. Kaunah muih balna kidika prapit balna yulnina dakawas dadana.

²⁰Dawakat Zacarías, sumalyang Joiada walanbis al dai kidika, Papang spiritni witing yakat kalbangna dai, dawak pa ubulni maluih yakat kilwi tawan muihni balna yakat diyulna: “Papang yulwi: ‘¿Ampadawak manna yang lāki balna yakat daka yamtasmanah? ¿Ampadawak dutni kidika manna waltamanah? ¡Manna yang akat yaruhmta danamana bahang, yang bik manna manaruhmtik daki!’ ”

²¹Kaunah witingna kulninna aslah niningkauh yaklalauna, dawak king yaklauwi pakwak kipala kau babahrna, Dawan ūni watakni yakat.

²²King Joás dinitkahna dai, Zacarías papangni Joiada witing yakat barangni dai kidika, kidika bahang walanbis Zacarías yakat īna dai, witing dauwa minitni yakat aput yulna: “¡Adika Dawan talwi kidika tunan minit manayulna karang!”

²³Kurih madaihwa yakat,[33] Sirio muihni balna kidika Joás nining yakat kalbabauna, Judá dawak Jerusalén kat uiwi kawi, kidika ninisan tunan muihni balna bitik imumukna, dawak di balna kidika bitik duduna, dawak di balna kidika Damasco kingni yakat sisihna.

²⁴Siria muihni balna uina kidika laih bulah uina dai, kaunah Dawan yaklauwi kidika balna tingnina yakat āna dai, kat witingna Dawan yakat ruhmwi dadana dai kidika yulni, muihninabararak balna Papangnina dai yakat.Kaput laih Joás witing wah duna dai.

²⁵Siria muihni balna dawi alahuina, bahang witing laih siknis palni kalsuhdai, dawak kabamint warkni yamyang balna kidika witing niningkauh yaklalauna, sumalyang Joiada walanbis Zacarías īna kidika yulni, bahang witing payahwa pāni yakat ihina. Usnitkat Devid tawanni nuhni yakat nununa, kaunah king balna nunuwa pāni yakat laih awaski.

²⁶Witing niningkauh yaklalauna kidika laih amonita kaupak Simeat walanibis Zabad, dawak moabita kaupak Simrit walanibis Josaba kidika kauna dai.

²⁷Joás walanbis ahal balna yulnina yulwa kidika, dawak witing nining kauh di kaikalahwas balna yuyulna kidika, dawak watwi Papang ūni laihwi dulauwarang kidika yulni balna bitik laih ulna ki king balna wauhninataya yakat. Witing dauna usnit kat walanibis Amasías kidika king kana dai.