Read Mayangna 2 Crónicas 26 Bible Online

2 Crónicas 26 - Mayangna bible

2 Crónicas 26

¹Kaput laih Judá tawanni muihni balna bitik yaklauwi Uzías[36] kidika laihwi duduna, dawak witing papangni Amasías pāni yakat king ahana dai. Uzías kidika witing kurih 16 duwadai,

²papangni dauna usnit kat, witing yaklauwi Elat tawanni kidika laihwi dulauwi yamna dawakat dakyakna Judá dini atnin.

³Uzías kidika kurih 16 duwa kat king kana, dawak Jerusalén yakat kurih 52 king kana. Witing nanangni kidika ayangni laih Jecolías, bahang Jecolías laih Jerusalén kaupak dai.

⁴Uzías di yamna balna kidika Dawan minikpa yakat barangni dai, witing papangni Amasías yamna dai kapat.

⁵Zacarías baisa sangka dai mani yakat, witing di yamwarang balna kidika Papang yakat yulwi dakawadai, bahang witing yaklauwi laih Papang yakat rispik kalanin kidika sumalna dai. Dawan yakat kalwalwakat baraknin kidika kalana dai.

⁶Uzías yaklauwi filisteo balna niningna yakat yaklaunin muih balna yakat di yulwa dai, dawak Gat, Jabnia dawak Asdod daklana balna kidika tuklakna, dawak Asdod sauni yakat tawan nuhni yamna, filisteo balna pasyakat.

⁷Papang yaklauwi ilp kalana dai filisteo balna, dawak árabe balna Gur-baal yakat bangdai kidika balna bik niningna yakat yaklaunin, dawak meunita balna niningna yakat bik.

⁸Amonita muihni balna kidika Uzías yakat tunan minit lalauwa dai, dawakat witing ayangni nuhni kidika Egipto sauni kat kiuna dai, kat witing parasni kidika nuhni palni kalna dai bahang.

⁹Jerusalén yakat bik makau kilwi talnin pāni kidika yamna dai, sipintang kau dūr sakkidika yakat, dawak langni niningkauh dūrni yakat, dawak sipintang ūk kidika yakat bik, dawak parasni yamna dai.

¹⁰Baisa minit yakat, yamna dai makau kilwi talnin pāni, kauhmak wanilang pasyakat, dawak bik pa manas kuhrna dai was dunin yulni, kat tinglau mahni duwadai bahang, walang yakat dawak asang tuna langni balna yakat bik. Dawak yamak balna yakat bik muih wark kalahwa bangdai, witing dini yamwi, wain yamak asangpas kau duwayakat, dawak ūni yaihnit kau duwayakat bik, kat witing laih di dahnin kidika dukih palni kalawa dai bahang.

¹¹Kidika minit yakat Uzías witing duwadai kalbauyang muihni balna ridi, witingna kalahwi awawaihwadai, uduhna as as, bahang kidika aslah uduhwi yayamna kidika laih Jehiel yul umani ulyang muihni, Maasías kalbauyang tunan muihni as Hananías tingni dinit yakat dai kidika, bahang kidika laih kalbauyang balna tanina tuna nuhni palni king duwadai kidika.

¹²Kalbauyang muihni Papang balna kulninna pararasni kidika bitik kat tausin bu minitkau andat tiaskauas dai.

¹³Witing tingni dinit yakat kalbauyang muihni balna duwasakdai tausin manah 307 minit kau andat singka, kalbaunin manah ridi, kidika laih parasni as nuhni duwa dai king war yamwa kidika yakat ilpni kanin.

¹⁴Uzías yaklauwi ridi yamna dai kalbauyang muihni balna bitik dinina, tanit daknin dini, langsa balna, tunan paknin dini balna, pasni yakat ānin dini balna, las balna dawak kiwah.

¹⁵Kidika minit yakat kalbaunin dini balna witing kulwi lāwi yamna dai, Jerusalén yakat, bahang dini balna kidika laih makau kilwi talnin pāni balna yakat āna, dawak daklana pāni makau balna yakat bik, dawak kidika yakaupak sibang ruhmnin dawak kipala balna bik. Witing ayangni nuhni kidika pa naikau bik kiuna dai, kat Papang yaklauwi ilp kalana dai bahang witing parasni nuhni kalna dai.

¹⁶Kaunah parasni kidika yamni duna kat witing manah kapat kaldakana bahang kidika yaklauwi kaldaukalpamna. Witing Daniwan Papang yakat barangni awasdai, kat Dawan ūni yakat kana, walapni buswa pāni yakat walapni busna atnin.

¹⁷Kaunah witing dangnit yakat sumalyang Azarías kawi kiuna, Dawan sumalniyang balna kulninna dadasni kidika balna 80 karak,

¹⁸king niningkauh yaklauwi kalyuyulna: “King Uzías, Dawan kau walapni busnin kidika laih man yamnam awaski king, kaunah Aarón sulani sumalyang balna kidika balna manah laih sipki yamnin, kat witingna laih Papang dini diyakna bahang. Holi pāni kaupak alahwah king, kat Dawan yakat barangni awas kidika yamnaman bahang, Papang laih kidika risnipik kalawas karang ki.”

¹⁹Uzías tingni yakat walapni busnin dini as duwa sakdai walapni busna atnin, bahang witing kulnin daukalna sumalyang balna yakat. Dawakat kidika minitni Dawan ūni paskau walapni busnin pāni yaihnit yakat dawak sumalyang balna muhnina yakat, witing sapani yakat lipar kallaihna.

²⁰Sumalyang nuhni Azarías dawak sumalyang ūk balna bik witing yakat tatalwak, sapani yakat lipar laihna dai, dawak kidika minitni yakat pāni yakaupak laihwi yayakna; witing silp bik mahka kalahnin kulna, kat Dawan yaklauwi wah wisna dai bahang.

²¹King Uzías kidika lipar manah dai muihni yakat, witing dauna kat, kaput bahang king kidika lipar duyang dai, bahang silp ū askau yayakna dai, dawak witing kidika Dawan ūni yakat kanin kalalawasdai, witing walanbis al Jotam kidika, tatuna kawi kabamint warkni balna kidika yamna dai, kidika ninisan yakat.

²²Uzías yulni umani balna, tatuna kaupak witni kat kidik ulna ki, Amoz walanbis al prapit Isaías kidika yaklauwi.

²³Uzías dauna kat, witing muihnibararak balna yaihnitna yakat nununa, king balna nuninna sauniū yakat, witing lipar duwa kidika witing amanglalawa dai. Witing pāni yakat walanbis al Jotam king kana.