Read Mayangna 2 Crónicas 28 Bible Online

2 Crónicas 28 - Mayangna bible

2 Crónicas 28

¹Acaz witing kurih 20 duwa kat king kana, dawak Jerusalén yakat kurih 16 king kana dai; kaunah witing di yamna balna kidika Dawan minikpa yakat barangni awasdai, muihnibarak Devid yamna dai kapat laih awasdai,

²nawatkauh laih Israel kingni balna yayamna kaput usnitna uina dai, dawak Baal wayani bik yamna dai,

³Ben-hinom sauni langni yakat walapni busna dai, dawak kaput bik laih walanibis balna kidika kau sakripais busna dai, nisan ūk balna dudutni kat Dawan yaklauwi Israel muhni tani kaupak ruhmwi dana dai kidika balna yayamna kaput bik yamna dai.

⁴Kidika minit yakat sakripais dawak walapni bik busna Papang kau kukulwas balna daninawan ūni yakat, asang ububulni balna yakat, dawak pan nunuhni balna dinit yakat bik.

⁵Kidika yulni witing Papangni Dawan kidika yaklauwi Siria kingni tingni yakat āna dai, dawak Siria muihni balna yaklauwi minit bayakwi dawak mahni laihwi silak ahana dai Damasco yakat duwi uiwi. Kaput bik laih Dawan yaklauwi Israel kingni tingni yakat bik āna dai bahang nuhni palni minit bayayakna dai.

⁶Rahm kaput laih Remalías walanbis al Peka kidika Judá yakat ina dai ma as pasyakat muih tausin manah 120 muih ahal, kidika ahalni balna bitik laih minitna nuhni dai, witingna Dawan ruhmwi dadana kidika yulni, muihnina bararak balna Papangnina kidika.

⁷Dawak Zicri, Efraín yakat kalbauyang muihni as, kidika yaklauwi king walanibis Maasías yakat īna, dawak king ūni tunan muihni Azricam dai kidika bik īna, dawak kalbauyang balna taninatuna king witing yaihnit yakat duwa dai kidika bik īna dai, ayangni laih Elcana.

⁸Kidika minit yakat Israel muihni kalbauyang balna yaklauwi Judá muihni balna yakat tausin manah andat bu laihwi silak ahana dai, kidika balna laih yayal, walabis ahal, walabis yayal dai, dawak di mahni bik duwi Samaria yakat uina dai.

⁹Kidika yakat Dawan pranipit as sakdai, ayangni laih Oded, bahang witing laih kalahwi kiuna niningna kauh kalpakna atnin, kalbauyang balna kidika Samaria yakat uiwi kakawa kat, dawak diyulna: —Dawan, manna muihmana bararak balna Papangnina kidika Judá nining yakat kulnin daukalna, kidika bahang manna tingmana yakat āna. Kaunah manna laih kulnamna daukalna karak muih balna yakat īnamana kidika makau kisang yakat kilwi kana.

¹⁰Baisa kidika minityakat Judá dawak Jerusalén muihni balna kidika silak muihni dunin yamnamana. Kaunah, ¿manna palni dutni yamnamana awasyah Papangmana Dawan niningyakat?

¹¹Kidika bahang, yang yulki dakanauh dawak silak muihni balna laihta duainamana kidika watta sihtanang uiwang, kat witingna laih manna wirahmana balna bahang, dawak bik Dawan manna namangna yakat kulnin daukalna ki.

¹²Kaput laih Johanán walanibis al Azarías, dawak Mesilemot walanbis al Berequías, dawak Salum walanbis al Ezequías, dawak Adlai walanbis Amasa, kidika balna laih Efraín yakat tunan muihni nunuhni dai, bahang witingna laih, kidika balna wār kaupak nawatwi aiwa kidika balna ninignakauh dai,

¹³dawak diyuyulwa dai: —Silak kau bubukna muihni balna kidika akat duahaiwinih, kidika yaklauwi Dawan niningyakat dutni kidika maikulna karang. Manna yamtamana kidika laih madutki balna kidika baisa sahwi nuhni yamnin kamanah talaman, dawak kidika laih uba mahni ki, kat Dawan laih kulnin daukalwarang ki Israel karak.

¹⁴Kaput dawak kalbauyang muihni balna yaklauwi silak muihni balna kidika uluhmumukna, dawak dinina dakyayakna balna dai kidika bik damumukna, tunan muihni balna dawak tawan muihni balna bitik muhnina yakat.

¹⁵Kidika usnit kat, muih ahal tatuna ayangnina yulwadai kidika balna yaklauwi silak muihni balna dai kidika witingna tingnina yakat duduna, dawak di balna dakyayakwi duwi uiwi damumukna dai kidika kaupak yakwi muih asna dis balna dai yakat asninana ahana, dawak susnina bik ahana, di bayayahna, diayawak didina, muihnina yakat dakna dai kidika bik yayamna, dawak sakahwa balna bitik kidika biriku kau ilwi duwi uina Jericó pāni kat, kuku satni balna panina, bahang kaput laih wanaihnina balna tingnina kat awi dadana. Kidika usnitkat Samaria yakat nawatwi uina.

¹⁶Kidika mani balna yakat, king Acaz yaklauwi witing kabamintni ayangni kau muih as yakwi sihna dai Asiria kingni yakat ilp yulna atnin,

¹⁷kat Edom muihni balna yaklauwi watwi niningna yakat kawi uina dai, dawak Judá yakat minit bayayakna dai, dawak muih buas laihwi silak kau duwi uina dai.

¹⁸Dawak pa ūk yakat, filisteo balna yaklauwi walang paskau tawan nunuhni balna dawak Néguev yakat bik kawi di duduna dai; kidika balna laih Judá pāni balna dai; dawak Bet-semes, Ajalón dawak Gederot kidika balna bik laihwi duduna dai, kaput bik laih Soco, Timna dawak Gimzo bik kawi duduna yaihnit kau tawan binina kidika bitik.

¹⁹Dawan yaklauwi Judá kidika kalyamwak sauyakat buknin kulna, Judá kingni,[37] Acaz yamna kidika yulni, kat witing yaklauwi yamwak Judá muihni balna kidika laihwatwas dutni yayamna, witingna barangni awas kidika nuhni palni dai Dawan niningyakat.

²⁰Tiglat-pileser, Asiria kingni, witing Acaz niningyakat kiuna, ilp kalanin dai kidika pāni yakat, bahang baisa dutni kalyamna.

²¹Acaz yaklauwi Dawan ūnipas kaupak, king ūni kaupak, dawak tatuna balna ūnina kaupak bik di minit nunuhni balna kidika yakna dai kaunah Asiria kingni yakat kalana atnin, tunan minit kapat, kauna kidika karak ilp as bik yakwas dai.

²²Dawak witing ma balna dutni kalpakna dai kaunah, Dawan yakat ban barangni awasdai. ¡King Acaz laih kaput dai!

²³Damasco daniwan dau balna yakat sakripais busna, kidika yulni witing kalbauwi sip-awas dana. Witing kulna, Siria daniwan dau balna kidika yaklauwi kidika pāni kingni balna yakat ilp kalalana kat, witing yakat bik ilp kalalawarang, witing yaklauwi sakripais yamwi diawarang kat. Kaunah kidika yaklauwi witing yakat kaldaukalpamna, dawak Israel balna bitik.

²⁴Acaz yaklauwi Papang ūnipas kau di bangdai kidika bitik uduhwi dawi bahmukna, dawi makatyulnin ūni dūrni kidika putna, dawi pakwak dawan kukulwas balna sakripais bubuswa pāni kidika satni balna yayamna Jerusalén tawanni nuhni kidika pasyakat.

²⁵Judá tawanni nunuhni balna bitik pasyakat dawan kukulwas balna makatyuyulwa ūni kidika yamna, kaput laih dawan dauh balna yakat walapni busna atnin, kaput yamwak Dawan kulnin daukalna, witing muihnibararak balna Papangnina.

²⁶Witing yulni umani balna dawak di ūk yamna balna kidika, tatuna kaupak witni kat ulna ki, Judá dawak Israel balna kingnina yulni ulna wauhnitaya yakat.

²⁷Witing dauwak, muihnibararak balna yaihnit yakat nunuwa dai, Jerusalén tawanni nuhni yakat, kaunah Israel kingni balna saunina ū yakat laih nunuwasdai. Kidika usnit, witing pāni yakat walanbis al Ezequías king kana.