Read Mayangna 2 Crónicas 29 Bible Online

2 Crónicas 29 - Mayangna bible

2 Crónicas 29

¹Ezequías kidika kurih 25 duwa kat king kana, dawak Jerusalén yakat kurih 29 king kana. Witing nanangni ayangni laih Abi, Zacarías walanbis yal dai.

²Ezequías yamna balna kidika Dawan minikpa yakat barangni dai, sihm muihni barak Devid yamna dai kapat.

³Witing yaklauwi Dawan ūni dūrni kidika watwi apahna dai, witing king kana kurihni tatuna kidika kaupak waiku tatuna yakat, dawak daukalna balna kidika bik yamna dai.

⁴Kidika usnit kat yulna uina atnin sumalyang balna dawak libait balna kidika bik, kaput laih uduhna dai makilwa niningkauh ahni panuhni pakyakat

⁵dawak diyulna: “Libait balna yadakanauh: manna maisihnidis alahwanauh waradika, dawak Dawan ūni bik maisihnidis yamtanauh manna muihmana bararak balna Papangnina ūni kidika. Kidika makatyulnin ūni kaupak maisihni kidika bitik yaktanauh.

⁶Kat mamuihki bararak balna kidika barangni awasdai, witingna yayamna kidika bitik Dawan mayang maPapangki minikpa yakat yamni awasdai, dawak bik ruhmwi dadana dai. Miniknapa kidika pa ūk yakat tatalna, dawak Dawan yalahwa pāni yakat laih dutni tatalna.

⁷Papang ūni kawi kawa kau watak pakkidika dūrni asnina bik puputna, awas balna bik pipina, dawak walapni bubuswa kidika bik dadana, dawak sakripais karauni kauna bubuswa kidika bik yamwi kalawas dadana Israel Papangni yakat.

⁸Kidika bahang, Dawan kulnin daukalna Judá dawak Israel nining yakat bik, kaput bahang didamukna witingna kidika yakat muih talwi muihsak dauna atnin, manna silp mamaknapa kau talnamana kidika.

⁹Kidika bahang mayang mapapangki balna kidika wār yakat dadauna, dawak mawalakibis ahal, yayal, dawak mayalki balna bik laihwi silakkau duwi uina.

¹⁰Kaput bahang, yang Dawan karak pramis as yamnin kulnayang, Israel Papangni karak, kaput laih witing kulnin daukalna kidika mayang kaupak naikau yaknin yulni.

¹¹Kidika bahang walakibis balna, wingmanata ururupwinih, kat Dawan yaklauwi mawalwi yakwi duna witing dini yamna atnin yulni, dawak witing yakat walapni kidika busna atnin.”

¹²Libait balna mahka wark yayamna dai kidika laih adika balna: Coat sulani balna, Amasai walanbis al Mahat dawak Azarías walanbis al Joel; Merari balna bik, Abdi walanbis al Cis dawak Jehaleel walanbis al Azarías; Gersón sulani balna bik, Zima walanbis al Joa, dawak Joa walanbis al Edén;

¹³Elizafán, Simri dawak Jehiel sulanina balna bik; dawak Asaf, Zacarías, Matanías sulanina balna;

¹⁴Hemán, Jehiel dawak Simei sulani balna, dawak Jedutún, Semaías dawak Uziel sulani balna.

¹⁵Tatuna witingna wanaihnina balna bitik uduhwi maisihnidis kalalahna; kidika usnit kat makatyulnin ūni yakat kawi maisihnidis yayamna, king yaklauwi dipakna dai kaput Dawan lani balna āna yakat.

¹⁶Kidika usnit sumalyang balna kidika makatyulnin ūni pasyakat kakana maisihnidis yamna atnin yulni. Dawak makatyulnin ūni watakni yakat yayakna dai maisihni dini balna kidika bitik ū pasyakat witingna tatalwadai kidika, dawak libait muihni balna yaklauwi Cedrón wasni yakat duwi uina.

¹⁷Mahka witingna di balna kidika maisihnidis yayamwadai, waiku tatuna dawak ma tatuna yakat, dawak sihm kidika wainiku ma tiaskaubās laihwa yakat, Dawan ūni kiwi kawa kau watak pakkidika yakat uiwi kakana dai. Dawak ūni sutni kidika laih ma tiaskaubās ūk pasyakat maisihnidis yamwi dadana dai.

¹⁸Kidika usnit kat, king Ezequías ūni yakat uiwi kakana dawi kalyuyulna: “Makatyulnin ūni kidika bitik maisihnidis yamnayangna: sakripais karauni kauna busnin pāni kidika dawak yusyamwa dini balna bitik, dawak plawar busna Papang dini yakna balna ilnin tinibil kidika dawak yusyamwa dini balna kidika bitik.

¹⁹Dawak kaput bik, king Acaz mani balna yakat witing barangni awas kidika yulni di balna ruhmna dai kidika bitik wattik pāni kat kat laknayangna, dawak bik maisihnidis yamnayangna, bahang waradika laih Dawan kau sakripais busnin pāni muhnit yakat bangki.”

²⁰King Ezequías kidika mapiris palni yaklauwi tawan nuhni paskau lā tunan muihni balna kidika uduhwi dawi Dawan ūni yakat kiuna dai.

²¹Duwi uina turuh ahalmuk binina tiaskaubu, sīp ahalmuk tiaskaubu, sīp binina kurih as duduwa kidika tiaskaubu dawak kuts bik tiaskaubu, kidika laih minitdis kalanin dini as dai, king walanibis balna dutnina kidika yulni, makatyulnin ūni kidika yulni dawak Judá yulni bik. King yaklauwi sumalyang balna yakat dipakna, Aarón sulani balna yakat, witingna sakripais karauni Dawan yakat buswi kalanin pāni yakat buswi kalalana karang.

²²Sumalyang balna yaklauwi turuh ahalmuk binina kidika ihina, dawak āni kidika duwi sakripais busnin pāni yaihnit awaih yakat raswi lana, dawak sīp ahalmuk balna kidika bik sihm kaput yayamna, dawak sīp balna kidika bik.

²³Kidika usnit, kuts ahalmuk binina minit dini duwi uinadai kidika dutnina disnin yulni, king muhni yakat dawak tawan muhni yakat bik duwi uina, dawak witingna tingnina kidika minityakat yuyuna.

²⁴Kidika usnit kat sumalyang balna yaklauwi ihina, dawak āni kidika, sakripais busnin pāni yakat rarasna, Israel muihni balna dutni yayamna kidika bitik dawak disna atnin yulni, kat king yaklauwi dipakna dai bahang sakripais karauni kauna busnin tawan muihni balna bitik dini.

²⁵Ezequías witing yaklauwi Dawan ūni yakat ana dai, libait balna kidika kilihngnin plitni kau, paswi yakisdinin dini, Devid dawak Gad witing king ūni yakat di talyang dai kidika, dawak Natán bik witingna yaklauwi amput yamnin kidika papakna dai kaput. Kat amput yamnin kidika laih Dawan yaklauwi diyulna dai pranipit balna munah.

²⁶Libait balna kidika yaklauna bangdai Devid paswi yakisdinin dini balna dai kidika balna karak, dawak sumalyang balna kidika laih puhnin dini balna kidika karak.

²⁷Bahang Ezequías yaklauwi diana dai sakripais karauni kauna busnin kidika busna atnin, sakripais busnin pāni yakat. Bahang sakripais karauni kauna buswarang minitni yakat, Dawan risnipik nuhni kau ayangni nuhni yamnin unbaunin kidika mahka unbabauna dawak trumpit bik pupuhna, kaput laih king Devid witing paswi yakisda dini balna bik yaihnit yakat paswi yakikisdana dai.

²⁸Tawan muihni balna kidika limbabahna bangdai, ayangni tanit nuhni yamwi, dawak unbauyang balna kidika unbabauna dawak sumalyang balna kidika trumpit pupuhna. Kaput manah bangdai kidika buswi dahn kalna kat.

²⁹Buswi dahn dawak, king witing karak bangkidika bitik limbabahna dai, Papang yakat ayangni nuhni yamwi.

³⁰Kidika usnit kat, king dawak tawan tunan muihni balna yaklauwi libait balna yakat dipapakna dai Dawan ayangni nuhni yamna atnin Devid salnimo balna dawak prapit Asaf salnimo balna kidika karak bik unbaunin. Dawak witingna laih alasna palni yayamna dai, dawak witingna bik limbabahwi ayangni nuhni yayamna dai.

³¹Kidika usnit Ezequías yaklauwi muih balna yakat diyulna: “Waralaih manna Dawan dini alahwanda bahang, yaihnit akat aiwa duaitanauh sakripais dawak minitdis kalawi tingkih kalnin dini kidika Dawan ūni yakat.” Kaput laih tawan muihni balna kidika sakripais dawak minitdis kalawi tingkih kalatnin dini kidika duwi uina dai, witingna yamnin kukulna muihni balna kidika, sakripais karauni kauna busnin kidika yayamna.

³²Tawan muihni balna sakripais karauni kauna busnin dini duwi uina kidika laih turuh ahalmuk 70, sīp ahalmuk andat, dawak sīp binina andat bu dai. Kidika bitik laih Dawan yakat sakripais karauni kauna buswa kidika yamwi kalanin dai.

³³Tinglau balna sakripais yayamna kidika bitik kat turuh andat tiaskauas dai, dawak tinglau binina kapatnah laih tausin bās dai.

³⁴Kaunah sumalyang balna kidika bulah dai bahang, bitik unitak balna takwi yaknin kidika sakripais karauni kauna busnin dini balna kidika sip-awas dai bahang, witingna wirahnina balna libait balna yaklauwi tingninasut lalaihna dai, warkni kidika yamwi danin, kaput laih sumalyang ūk balna kidika maisihnidis kalalahna kat; kat libait balna kidika kau witingna maisihnidis kalanin kidika dukih diana dai bahang, sumalyang balna karak dawakat.

³⁵Kidika minit yakat sakripais karauni kauna busnin kidika muhni palni bangdai bahang, dawak salani balna kidika busnin bik, Papang karak watwi yamni kalahnin yulni buswa kidika, kaput bik laih minitdis kalanin dini wain kidika sakripais karauni kauna buswa kidika karak libitwi bubuswadai. Kaput yamwi watwi Dawan ūni yakat makat yulnin kidika dulauwi yayamna dai.

³⁶Ezequías dawak tawan muihni balna bik alasna palni kalalahna dai, Papang witing tawanni yulni yamna dai kidika, kat di balna bitik laih sirihni palni kaput kalahna dai.