Read Mayangna 2 Crónicas 30 Bible Online

2 Crónicas 30 - Mayangna bible

2 Crónicas 30

¹Ezequías yaklauwi, muih sihna isningna pakna atnin, Israel dawak Judá kidika balna yakat, duwak kaputbik wauhtaya sihna Efraín dawak Manasés yakat bik, witingna balna kidika Dawan ūni Jerusalén kau sakkidika yakat uiwak, insal bayakna mani Israel Papangni Dawan dini kidika alasnina duna atnin.

²King kidika, yaihnit kau kabamint warkni yamwabang kidika yakat diyulwi dakana dawak Jerusalén muihni balna yakat bik diyulwi dakana usnit kat, witing kulna alasnina kidika yamnin waiku bu laihwa yakat,

³kat mani kat sip yamwas danadai bahang, sumalyang mahni awas kidika yulni makatyulnin ūni kidika maisihnidis yayamwas dai, dawak muih balna bik Jerusalén yakat kalududuhwasdai bahang.

⁴King dawak tawan muihni balna bik yamni tatalna dai kulnin lani kidika,

⁵wauhtaya sisihna Israel sauni bitik yakat, Beerseba kaupak Dan kat, diyuyulna witingna Jerusalén yakat uiwak insal bayakna mani kidika Dawan yakat alasna kalana atnin, Israel Papangni yakat. Kat muhnilau kau kaput ban yamwi aiwasdai bahang, la yakat amput ulna kaput.

⁶Kaput laih yul duwi uiyang balna kidika kalahwi uina Israel dawak Judá sauni bitik yakat, king wauhnitaya kidika duwi, kabamint warkni yamyang balna wauhtaya yayamna kidika bik, king lā āwa kidika sarahwi yulna atnin: “Israel muihni balna: Dawan yakat nawatta aiwanauh, Abraham, Isaac dawak Israel Papangni yakat, witing bik manna yakat nawatwi kaiwarang, ūk balna Asiria kingni kaupak kiri yaklalana balna kidika bitik.

⁷Manna muihmanabarak balna dawak wirahmana bala kaput atwinih, Dawan yakat barangni awas kidika yulni muihmana bararak balna Papangnina yaklauwi, daukalpamnin yakat manalalakna, manna talamana kaput.

⁸Kaput bahang manna tapamana dadasni atwinih, sihm muihmana barak balna yayamna dai kapat; manna Dawan yakat tingmana yutanauh witing karak pramis wisamni as yamnin, dawak holi pāni yakat aiwanauh, witing yaklauwi maisihnidis yamna ban kaput atnin yulni. Manna Damanawan Papang yakat dini yamtanauh, witing kulnin daukalna kidika dawarang manna namangna yakat.

⁹Manna Dawan yakat nawatta aiwanama kat, waradika manna waihmanala balna yaklauwi wirahmana balna dawak walaninabis balna bik silak yakat duduwa kidika witingna yakat miniknakun tatalna karang, bahang damumukwak adika sauni akat aiwarang, kat Dawan manna Papangmana kidika dalani talwi, minikun bik talwi, manna manaruhmwi dawas karang, manna witing yakat nawatta yawanama kat.”

¹⁰Wauhtaya duwi uiyang balna kidika Efraín dawak Manasés sauni kidika bitik yakat kiwi awawaihna, tawan nunuhni balna kidika yakat ukkau tilahwi uina Zabulón kat. Kaunah muih balna kidika niningna kakarana, dawak bik sarahni diyuyulna witingna yakat.

¹¹Kaput kaunah Aser, Manasés dawak Zabulón sulani balna pas kaupak ahal as as kidika Papang nining yakat bubukna, dawi Jerusalén yakat uina dai.

¹²Papang bik yaklauwi Judá muihni balna kulninna yakat usna dai, king yulna kidika yamna atnin, dawak la muihni balna yuyulna kidika bik, Dawan yaklauwi yamnin yulna kaput.

¹³Kaput laih, Jerusalén yakat muih kaluduhna mahni palni aslah kalalahna dai, waiku bu yakat, plawar pupuhnin awas busna alasnina kidika yamnin.

¹⁴Jerusalén yakat sakripais busnin pāni balna dawak walapni busnin pāni balna dai kidika bitik yakwi Cedrón wasni yakat ruruhmna.

¹⁵Waiku bu laihna kaupak ma 14 yakat insal bayakna sīpni kidika ihina. Sumalyang balna dawak libait balna kidika witingna asalni kaldakawi, witingna maisihni dis kalalahna, dawak Dawan ūni yakat duwi uina sakripais karauni kauna busnin kidika.

¹⁶Kidika usnit warknina pāni kat kat uina, Moses, Papang alni lani munah yaklauwi diana kaput. Sumalyang balna kidika libait balna yaklauwi ā diayawa kidika raraswadai.

¹⁷Dawakat tawan muihni balna kidika manas maisihnidis kalalahwas dai bahang, libait balna yaklauwi kidika muihni balna tingninalau balna kidika bitik ihina, insal kaiwi bayakna mani yakat, kaput yamwi Dawan dini yakna atnin yulni.

¹⁸Rahm kaput laih muih mahni palni Efraín, Manasés, Isacar dawak Zabulón kaupak balna kidika insal bayakna alasnina kasnin pasyakat kakawa dai, kaunah ulna yakat yulwa kaput laih yayamwas dai, kat witingna kidika maisihnidis kalalahwas dai bahang. Kaunah Ezequías witingna yulnina minit yulwi aput yulna: “Dawan minikun talyang man kidika, kidika balna kulninna rahm man yakat mawawalwa kidika dutnina datang diswang,

¹⁹Dawan, muihnina barak balna Papangnina man kidika, witingna maisihnidis kalalahwas karang bik, makatyulnin ūni lani kat yulwa kaput.”

²⁰Dawan witing yamna dai Ezequías yulwa yakat, dawak tawan dutni dawak disna.

²¹Kaput laih, ma tiaskaubu, Israel balna Jerusalén yakat uina bangdai kidika alasna manah plawar pupuhnin dis kasnin alasnina kidika yayamna dai. Dawak sumalyang balna, libait balna kidika ma bitik Dawan ayangni nuhni yayamna, paswi yakisdinin dini balna kidika kau, dawak paswi yakisdinin dini balna Papang dini yakna balna karak bik.

²²Ezequías yaklauwi tingnikih diana libait balna bitik yakat witingna yamni palni Dawan warkni yayamna kidika yulni. Alasna kasnin yayamna yakat ma tiaskaubu kakasna usnit kat, dawak Papang karak watwi yamni kalahnin sakripaisni kidika bubusna, Dawan ayangni nuhni yayamna, muihnina bararak balna Papangnina yakat,

²³tawan muihni balna kidika yaklauwi kidika alasnina kidika baisa naiwi minit yakat ma tiaskaubu minityakat ūk lalakna, dawak kidika yayamna kidika bitik laih isningnalak yayamna dai;

²⁴kat Judá kingni Ezequías yaklauwi tawan muihni balna yakat turuh ahalmuk wawahma binina kidika tausin as diana dai, dawak sīp kidika laih tausin tiaskaubu, dawak la muihni balna kidika yaklauwi diayana kidika laih tawan muihni balna yakat, turuh ahalmuk binina tausin as dawak, sīp kidika laih tausin salap. Dawak sumalyang balna manas maisihnidis kalalahna dai.

²⁵Judá tawanni balna bitik alasna duduna, sumalyang balna dawak libait balna bik, kaput bik laih muih bitik Israel kaupak aina balna dai kidika bitik, dawak tringsar balna Israel sauni kaupak aina dai kidika balna bik, kidika awaskat Judá yakat yalalahwa dai kidika.

²⁶Kaput laih alasna nuhni yayamwa dai Jerusalén yakat, kat Devid walanbis Israel kingni Salomón mani kaupak, di as aput palni Jerusalén yakat kalahwas dai.

²⁷Kidika usnit kat, sumalyang dawak libait balna bik kalnina kau yaklauwi tawan yakat blismumunna; dawak Dawan bik witingna yakat di dakana, dawak witingna minitna yuyulna kidika bik kisang kat kilwa dai, Papang holi yalahwa pāni kat.