Read Mayangna 2 Crónicas 31 Bible Online

2 Crónicas 31 - Mayangna bible

2 Crónicas 31

¹Kidika bitik dahnkalna kat, Israel balna bitik panina kau uina dai Judá tawanni nunuhni balna yakat dawak kipala daninawan dini yayakna balna dai kidika bitik laih babahna Asera wayani yayamna dai kidika, dawak asangtuna balna kau makat yulnin ūni balna dai kidika bitik laih tuklalakna, kaput laih Judá dawak Benjamín kau kidika satni balna dai kidika bitik laih dahn yayamna, dawak sihm kaput bik Efraín dawak Manasés yakat bik. Kidika usnit Israel balna bitik tawannina nunuhni kat kat uina dai.

²Kidika usnit kat Ezequías yaklauwi sumalyang balna dawak libait balna kidika warknina kat kat sahyakwi diana, kaput laih witingna biri biri ais warknina yamnin sip balna kidika warknina kat kat yamnin, sakripais karauni kauna busnin, dawak sakripais buswi Papang karak watwi yamni kalahnin, kaput bik Dawan ayangni nuhni yamnin, tingkih kalanin, dawak makatyulnin ūni dūrni yakat wark yamnin.

³Kidika minit yakat, king, witing palni dini balna kaupak diawa dai, Papang kau sakripais busnin kidika, mapiris dawak masan bik, dawak yakurupdinin mani yakat sakripais busnin kidika karauni kauna, waiku wisam alasnina yamnin kidika, dawak alasna rispik nuhni kalanin kidika bik, Dawan lani yakat ulna kaput.

⁴Kaput bik laih dipakna Jerusalén kau muih balna yalalahwadai yakat, sumalyang balna dawak libait balna yakat diayana atnin witingna dianin duduwa kidika, kaput laih Dawan lāni kat witingna warknina yayamna karang.

⁵Dawak yamnin pakna kidika bitik yakwi yulna kat, Israel muihni balna kidika kulninna yamni karak diayana dai, plawar minik tanit yayamni kidika, wain, disala, amak dawak yamak kaupak di minik yayamni yayakna kidika bik.

⁶Kaput bik Israel muihni balna dawak muih ūk balna Judá sauni yakat yalalahwa dai kidika balna bik, witingna tuninaruh balna sahyakna salap kidika kaupak dawak sīp balna kidika dawak witingna Papangnina Dawan dini yakna sahyakna salap kidika bik duwi uina dai. Dawak bitik laih mahni uiwi ududuhna dai.

⁷Waiku bās kawa yakat kidika dini balna bitik ududuhna, kaput laih waiku tiaskaubu laihwa yakat dahn yayamna.

⁸Ezequías dawak la tunan muihni balna karak uiwi tatalna di uiwi ududuhna balna kidika, dawak Dawan yakat ayangni nuhni dulalauna dawak witing tawanni Israel yakat bik.

⁹Kaput laih Ezequías yaklauwi sumalyang balna dawak libait balna yakat diyulwi dakana, di uduhna balna kidika yulni,

¹⁰dawakat sumalyang nuhni Azarías, Sadoc sulani kaupak kidika yaklauwi kalyulna: “Dawan ūni akat muih balna yaklauwi di duahaiwi ahana kaupak, kasnin dini kidika manas ki, kaput bik laih minit bayak sutni bik watwi; dini balna bitik adika sutni bayakwi, kat Dawan yaklauwi witing tawanni yakat blisin kidika kalana bahang.”

¹¹Kidika yulni, Ezequías yaklauwi sihna Dawan ūni yakat di punin dini as yamnin. Kidika dini yayamwa usnit kat,

¹²kidika yakat ahana, witingna barangni lani kat, sahyakna salap kidika duwi uiwa kidika Dawan dini yakwi. Kidika dini balna bitik libait Conanías tingni yakat ahana, dawak witing wirahni al Simei kidika laih sikanni.

¹³Conanías dawak wirahni Simei tingnina dinit yakat muih di balna maintalnin kidika āna king Ezequías dawak Azarías Papang ūni kidika tunan nuhni palni kidika karak, adika ahalni balna: Jehiel, Azazías, Nahat, Asael, Jerimot, Jozabad, Eliel, Ismaquías, Mahat dawak Benaía.

¹⁴Ma kilwa niningkauh dūrni maintalwa kidika laih libait Coré, Imna walanbis al kidika sakdai, muih balna Papang dini minit dis kalanin duahaiwa kidika witing tingni yakat dai, dawak kidika balna sahwi yaknin Dawan yakat kalanin, dawak Papang dini yakna kidika bik.

¹⁵Coré yakat tingnisut lalaihwadai barangni lani kat, sumalyang balna tawannina nunuhni yakat, Edén, Miniamín, Jesúa, Semaías, Amarías dawak Secanías balna kidika, dawak witingna aslah pasyakauna wayah yakwi dunin yulni. Witingna wark yamnin kidika manina kaiwakat kidika yayamwadai, witingna kaluduhna mahni balna ampus duduwa kidika kaput bik laih bulah balna yakat sihm kaput duduwadai,

¹⁶muih balna bitik uiwādai kidika makat yulnin ūni yakat witingna warknina yamna, witingna warknina kidika yamnin mani balna kaiwak, dawak witingna ais warkni yamwi lan balna kidika, kaput laih witingna ayangnina kidika wauhtaya yakat ulna karang kidika manah, kidika laih kurih bās duduwa balna kidika bitik.

¹⁷Sumalyang balna kidika ayangni uhulna dai ūninapas muihni balna bitik, dawak libait balna laih kurih 20 lalaihna kidika minitkauh balna kidika, witingna ais warkni yamwi lan kidika dawak wark yamnin mani kaiwi kawa kidika bik.

¹⁸Ayangni ulnin wauhnitaya yakat walabis dibinina kaupak ahana dai, yalnina balna, walaninabis ahal, yayal, yuldarang kat tawanni muihni balna bitik, kat witingna warknina yamnin diana munah witingna kidika Papang dini kakalna dai.

¹⁹Tawan balna bitik yakat, muih ahal walwi yakwi āna dai, Aarón sulani ahal sumalyang bitik yakat di balna kidika sahyakwi dianin yulni, dawak libait balna ayangnina ahana kidika bitik, dawak witingna tinglau maintalnin sauni yakat yalalahwa dai kidika, sumalyang balna tawannina nunuhni yakat.

²⁰Ezequías yaklauwi aput yamna dai Judá sauni bitik yakat. Witing yamna balna kidika yamni manah dai, barangni dai, alas bik disdai Papangni Dawan muhni yakat.

²¹Di bitik yamna kidika Papang ūni yakat, lā balna kidika bik, witing kulnin bitik Papang yakat walna, kidika bahang di balna yamna kidika bitik yamni manah dai.