Read Mayangna 2 Crónicas 32 Bible Online

2 Crónicas 32 - Mayangna bible

2 Crónicas 32

¹Adika dini balna bayakwak usnit kat, dawak kulnin lani barangni kidika niningkakana usnitkat, Asiria kingni Senaquerib Judá yakat kiwi tawan nunuhni pararasni balna kidika awaihwi dakna, kawi laihwi dunin yulni.

²Ezequías talwak Senaquerib kidika Jerusalén yakat kiuna kalbaunin manah kulwi,

³dawak witing tawan tunan muihni balna dawak kalbauyang tunan muihni balna duwa kidika yakat diyulwi dakana, tawan nuhni yaihnitkau wastuna balna kidika bitik laih kalawak buhlaknin, dawak witingna bitik laih kaput yamni kukulna.

⁴Kaput laih muih mahni aslah kalahwi wastuna balna kidika bitik puputna, sau dinit kau was murwi bayakwatus kidika bitik. Kaput laih Asiria kingni kidika uiwi kawi was mahni yaknin awas yulni.

⁵Ezequías kulnin dulauwi tawan daklana kidika watwi laihwi dulauwi yamna dai, dawak kidika minit yakat makau kilwi talnin pāni bik yamna dai, dawak ahni niningkauh yakat daklana dai. Dawak sau uhwi bang-ilna kidika bik parasni yamna dai Devid tawanni nuhni kidika yakat, kaput bik laih langsa dawak nanit daknin dini balna kidika bik mahni yamna dai.

⁶Kidika usnitkat kalbauyang balna tanina tuna āna dai, dawak tawan nuhni dūrni kau langni yakat uduhna dawak, kulninna dulauwi aput diyulna:

⁷“¡Parasni dawak bik kulnamna dadasni awanauh! Yamaduduwinih dawak Asiria kingni niningyakat kulnamna buknin awaski, kalbauyang muihni balna mahni kidika niningna yakat bik, kat mayang kauh mahni duda bahang witing karak dawakat.

⁸Witing laih muih al parasni kidika yakat kulwi, kaunah mayang laih Dawan mayang maPapangki kidika mayang karak ki, ilp mayana atnin kalbaudarang yakat.” King Ezequías yulni balna kidika dakawi, tawan muihni balna kidika kulninna dulalauna.

⁹Kidika usnit kat Asiria kingni Senaquerib kidika Laquis niningyakat kalbauwa sakdai, kalbauyang muihni balna duwa kidika bitik karak, dawak Jerusalén yakat sihna kalbauyang tanituna balna kidika Judá kingni Ezequías yakat dawak Jerusalén muihni balna Jerusalén yakat bangdai kidika, adika yulni disihna:

¹⁰“Asiria kingni Senaquerib yaklauwi adika yulni manasihwi: ‘¿Ampadawak manna kidika buktas awanama kapat kaldakamanah, Jerusalén yakat watna bangmana kidika, mana-awaihdak dadana karang bik?

¹¹Ezequías yaklauwi manayulwarang kat, Dawan Papangnina yaklauwi yang tingki kaupak dilaihwi yakwarang manatarang kat, kidika laih alas manayulwi, witing yaklauwi manayamwak yuh dawak was dikih manawak dautanama.

¹²¿Ezequías yaklauwi makatyulnin pāni balna dai kidika yakmukwasdai katpah, dawak kidika Papangni yakat sakripais busnin pāni balna dai kidika bik, dawak dipakna Judá muihni balna dawak Jerusalén muihni balna yakat bik, witingna walapni busnin kidika pa aslah yamna atnin?

¹³¿Amanglatasmanah, yang dawak muihkibarak balna bik ais yamnayangna dai kidika sau ūk tawanni balna yakat? ¿Kidika ninisan balna Papangnina kidika sipdai katpah yang paraski kidika kaupak dakwi kalahna atnin?

¹⁴¿Kidika ninisan daniwan dauh balna kidika bitik yang muihkibararak balna yaklauwi dismumukna kidika balna pasyakat angdika sip kalna daih, witing sauni kidika laihwi yakna atnin, yang paraski kaupak? ¿Amput dawak witingna kukulwih Papangnina kidika yaklauwi dilaihwi yakwarang atwih?

¹⁵Kaput bahang, datanangkat Ezequías yaklauwi alas manayulnin awaski; kaldakakawinih, kat kidika ninisan balna daninawan dauh balna yaklauwi witingna tawannina balna yakat laihwi yaknin sip-awasdai kat yang paraski kaupak dawak muihkibararak balna parasnina kaupak bik, ¡manna Papangmana kidika laih baisa sip awas karang, yang paraski kaupak manalaihwi dakyaknin kidika!’ ”

¹⁶Adika, dawak minit yakat baisa bik laih yuyulwadai, Asiria muihni kalbauyang balna taninatuna kidika balna yaklauwi, Papang, Dawan kidika niningyakat, dawak dini yamyang Ezequías niningna yakat bik.

¹⁷Kidika minit yakat Senaquerib yaklauwi wauhtaya ulna dai, Israel Papangni Dawan niningyakat dutni yulna, dawak niningyakat aput yulna: “Kaput bik laih, tawan balna daninawan dauh balna kidika sau ūk balna kau yakat, kidika balna sip-awas dai paraski kaupak didakyaknin, kaput bik laih Ezequías Papangni bik sip-awas karang yang paraski kaupak dilaihwi yaknin witing tawanni balna kidika.”

¹⁸Senaquerib muihni kalbauyang balna tanituna balna kidika yaklauwi Jerusalén muihni balna tawan daklana minit kau bangdai yakat, hibru yulni kau parasni sarahwi diyuyulna muihsak dadauwang atwi, dawak kaput yamwi tawan kidika laihwi dakyakwi duna atnin yulni.

¹⁹Jerusalén Papangni yulni yuyulwa dai, sihm sau ūk daniwan kau yuyulwa kapat, kidika daniwan balna laih muih al yaklauwi yamna dai kidika.

²⁰Adika tranibil kalahwak, king Ezequías dawak prapit Isaías, Amoz walanbis al kidika Papang kau minitnayulwi ilp yuyulna makau kisang kidika yakat.

²¹Kaput laih Dawan yaklauwi insal as sihwak kaiwi Asiria kingni ūni labanni kau kalbauyang balna, dawak tunan muihni balna kidika bitik imukna, kaput laih witing asalni nuhni karak nawatwi sauni yakat kiuna dai. Dawak witing daniwan dauh ūni yakat kiwi kawakat, witing walanibis balna kidika yaklauwi ihina.

²²Kaput laih, Dawan yaklauwi Ezequías dawak Jerusalén muihni balna yakat, Asiria kingni Senaquerib dawak sau ūk balna parasnina kaupak bik laihwi yakna dai, dawak yaihnit kau tawan balna bitik karak kulnin aslah diana dai.

²³Kaput laih muih manas laih duwi uina dai Jerusalén yakat minit dis kalanin dini kidika Dawan kau, dawak bik prisant kalanin minit nuhni bik uiwi kalalana dai kingni Ezequías yakat, Judá kingni. Dawak kidika kaupak, witing ayangni nuhni kidika baisa nuhni kalna dai nisan ūk balna niningna yakat.

²⁴Kidika mani balna yakat, Ezequías siknis palni kalahna dai; kaunah Dawan kau minit yulna, dawak nangnitlana sain as taldas dini karak.

²⁵Ilpni kidika duna dai karang bik, Ezequías witing tingkih lani kidika disdai, nawatkauh laih witing kulnin kidika witing manah kapat kaldakana, kidika yulni Dawan kulnin daukalna witing yakat, dawak Judá niningyakat dawak Jerusalén niningyakat bik.

²⁶Kaput dai kaunah, witingmanah kapat kaldakawa pasyakat Papang kalni dinit yakat bukna, dawak Jerusalén muihni balna bik sihm kaput yayamna dai, dawak Dawan kulnin daukalna kidika witingna minitna yakat sihwas dana, Ezequías sangka dai mani balna yakat.

²⁷Ezequías laih ritsni kidika mahni duna, dawak risnipik bik, kaput bik laih lalah bik mahni duna, gol, kipala minit nuhni balna kidika bik, di walapni balna, nanitdaknin dini, dawak di minit nunuhni balna kidika bik mahni palni.

²⁸Kaput bik laih di minik punin ūni balna bik pakna, wain dawak disala bik, dawak turuh dawak tinglau satni balna ūnina bik, dawak sīp balna panina bik daklana dai.

²⁹Kidika minit yakat tawan nunuhni balna bik yamna dai, dawak tinglau nunuhni dawak tinglau binina bik mahni palni duna dai, kat Papang yaklauwi di mahni palni kalana dai bahang.

³⁰Ezequías yaklauwi sihwak Gihón sauni makauh niningkauh wastuna sakdai kidika putpapamna dai, dawak was murnin kidika parah niningyakauh kalawak kirana dai, Devid tawanni kaupak ma kawa niningyakauh. Kaput laih Ezequías di yamna bitik kidika yamni manah dai.

³¹Kaput di balna kalahwa dai, Babilon tanituna muihni balna muih sisihwa dai kidika laih witingna aiwi kaltalna atnin, dawak bik amanglana atnin di taldas dini kalahna dai kidik, kidika sauni yakat. Papang yaklauwi Ezequías kidika alas kaldana dai, kidika tanka laih witing kidika kaltalna atnin, witing kulnin dinit yakat ais kulwa kidika.

³²Ezequías yulni umani ūk balna kidika dawak dalani lani warkni yamna kidika, prapit Isaías, Amoz walanbis yakat di niningkana kidika ulna balna wauhnitaya yakat ulna ki, Judá dawak Israel kingni balna wauhnitaya yakat.

³³Ezequías dauna kat, nununa, Devid sulani balna saunina ū kidika manikingkauh yakat nununa. Judá dawak Jerusalén muihni balna bitik witing risnipik kidika kalalana dai; dawak witing pāni yakat walanbis al Manasés king kana dai.