Read Mayangna 2 Crónicas 33 Bible Online

2 Crónicas 33 - Mayangna bible

2 Crónicas 33

¹Manasés kidika king kana dai, kurih 12 duwa kat, dawak Jerusalén yakat king kana kurih 52.

²Kaunah witing di yamna bitik kidika Dawan minikpa yakat dutni manah dai, kat nisan ūk balna Dawan yaklau Israel muihni balna muhnina yakat kangwi yakna dai kidika balna di yayamwadai kidika witingna bik lan kakalwadai kidika yulni:

³holi pāni balna kidika pa malaluih kau yakat yamna dai, witing papangni Ezequías yaklauwi bahwi dai yamna dai kidika pāni yakat; sakripais busnin pāni balna yamna dai Baal ayangni kau, dawak Asera wayani bik yamna dai; dawak kidika minit yakat kisang kau yala balna bitik yakat minityulna dai,

⁴dawak Dawan ūni yakat bik sakripais busnin pāni yamna dai, kidika pāni yulni Dawan bik yulna dai kidika, kidik pāni laih ban kaput atnin karang, kat witing ayangni kidika Jerusalén yakat sakkarang bahang.

⁵Sakripais busnin pāni ūk bik dulauna, Dawan kau makatyulnin ūni watak bu yakat, dawak kisang kau yala balna bitik yakat minityulna dai.

⁶Kidika minit yakat, witing walanbis balna kidika sakripais busna dai Ben-hinom sauni langni yakat. Spirit balna bitik yakat minityulna, baisa kaiwi kalahwas dini balna yakwi yuyulwa kidika bik, dawak di amangladas balna bik yamwa kidika bik, dawak spirit kau minityulnin kidika bik āna dawak sukyah lani bik. Dawan minikpa yakat dutni palni dai di yamna balna kidika, bahang kidika yulni Dawan kulnin daukalna dai.

⁷Kaput bik dawan dauh wayani Papang ūni yakat yamna dai kidika bik āna dai, kidika yulni Devid dawak walanbis Salomón yakat bik diyulna dai: “Adika makatyulnin ūni Israel balna bitik pasyakat waltik yaknayang kidika Jerusalén yakat, yang ayangki laih kidika yakat ban sakkarang, kaput atnin.

⁸Wattik Israel balna kidika kangtik yaktas awaki, witingna muihninabararak balna yakat sau dianayang kidika kaupak, yang lawik yamnin dipaknayang balna kidika bitik yayamwarang kat, sumalnayang balna kidika bitik, lāki balna kidika bitik dianayang kidika Moses munah.”

⁹Kaunah Manasés yaklauwi yamwak Judá dawak Jerusalén muihni balna kidika ta dutni yakat uina, dawak tanit dutni yayamna, nisan balna Dawan yaklauwi dismukna dai kidika Israel muhni kaupak.

¹⁰Dawan yaklauwi Manasés dawak tawan muihni balna yakat bik yuldibauna, kaunah yulni dakakawasdai.

¹¹Kidika yulni Dawan yaklauwi witingna minitna yakat duwi kiuna dai, Asiria muihni kalbauyang balna kidika, dawak witingna yaklauwi iskurus kau lalaihna dai Manasés kidika, dawak bras sīnni kau sisitna, dawi duwi uina dai Babilon yakat.

¹²Kaunah witing kulnin bukna kat Daniwan Papang yakat yulna, dawak kasak palni muihnibararak balna Papangnina kalni dinit yakat bukna.

¹³Dawak witing minityulwak Papang yaklauwi kaldakana, dawak witing kalni dinit yakat bukwi yulwa kidika dakana, bahang kalawak Jerusalén yakat kaiwi watwi kingni lani kidika tanit yakat duwi kiuna. Kaput laih Manasés witing amanglana Dawan kidika laih Papang.

¹⁴Kidika usnit kat Manasés yaklauwi Devid tawanni nuhni yakat yamna, Gihón kaupak ma kilwa niningyakat daklana ahni niningyakaupak, bahang kidika daklana kidika laih was murwa munah yamwi daklawi dukiuna waspa dini dūrni kat, kidika munah awaihwi duwi kiunin Ofel kat. Daklana kidika laih maluihni yamna dai. Dawak Judá kau ū pararasni balna kidika bitik yakat kalbauyang balna taninatuna nunuhni kidika balna āna dai.

¹⁵Kidika minit yakat, Dawan ūni kau pa ūk muihni balna daninawan dauh balna dai kidika bitik yakmukna dai, dawak kaput bik laih sakripais busnin pāni balna Papang kulwas muihni balna makat yulnin ūni asangni kau dawak Jerusalén kau yayamna dai kidika bitik yakmukna, dawak tawan nuhni kidika kaupak ahni yakat ruhm'yakmumukna.

¹⁶Kidika usnit kat Dawan kau sakripais busnin pāni kidika watwi laihwi dulauwi yamna dai, kidika pāni yakat sakripais busna dai Papang karak watwi yamni kalahnin sakripaisni kidika, dawak tingki kalanin kidika bik, dawak Judá yakat bik pakna dai Dawan kau prias yamna atnin, Israel Papangni yakat.

¹⁷Kaput kaunah, tawan muihni balna kidika ban sakripais bubuswādai, Papang kukulwas muihni balna sakripais bubuswa pāni yakat, witingna Daninawan Papang kau kalalawadai karang bik.

¹⁸Manasés yulni umani balna, dawak Papang kau minit yulna kidika, dawak prapit balna Dawan ayangni kau yakwi kalyuyulna dai kidika, Israel Papangni yakat, kidika balna bitik kidika laih Israel kingni balna yulnina uhulna yakat bangki.

¹⁹Witing minityulna balna, dawak Papang yaklauwi nangnitlana kidika, dutni balna yamna dawak barangni awasdai kidika, dawak pa maluihni balna yakat makatyulnin ūni balna yamna dawak kidika yakat Asera wayani bik āna dai kidika, dawak dawan dauh balna wayani bik, witing Papang yakat bukwas tanitkauh, kidika yulni balna bitik laih pranipit yulni umani balna yakat ulna.

²⁰Witing dauwak, ūni watak kau dipulu dahna kidika yakat[38] nununa. Witing pāni yakat walanbis al Amón king kana dai.

²¹Amón kidika kurih 22 duwa kat king kana dai, Jerusalén yakat kurih bu king kana.

²²Kaunah witing di yamna balna kidika Dawan minikpa yakat dutni manah dai, witing papangni Manasés yamna dai kapat. Witing sakripais busna dawak prinias bik yamna dai, dawan dauh balna witing papangni yaklauwi yamna balna dai yakat.

²³Kaunah Dawan niningyakat buknin laih kulwas dai, witing papangni Manasés yamna kapat, kaunah nawatkauh laih pātni balna kidika manas palni witing minityakat ilna dai.

²⁴Kalbauyang balna taninatuna duwa kidika balna witing niningyakat yaklalauna, dawak witing kingni ūni yakat ihina.

²⁵Kaunah tawan muihni balna yaklauwi king Amón ihina muihni balna yakat laihwi ihina, dawak witing pāni yakat kalalawak king kana witing walanbis al Josías kidika.