Read Mayangna 2 Crónicas 34 Bible Online

2 Crónicas 34 - Mayangna bible

2 Crónicas 34

¹Josías kidika kurih tiaskaubās duwa kat king kana, dawak Jerusalén yakat king kana kurih 31.

²Josías di yamna balna kidika barangni dai Dawan minikpa yakat, kat Devid yamna balna dai kaput usnit uina dai bahang, witing muihnibarak, kidika kaupak apis bik dawi kalahwas dai.

³Witing king kana kurih tiaskaubās laihna yakat baisa wahmabin dai, kaunah Josías witing muihni barak Devid Papangni kidika walna dai. Dawak king kana kurih 12 yakat Judá dawak Jerusalén kau pa maluihni balna yakat makat yulnin ūni balna kidika maisihnidis yamna dai mahka, Asera wayani, dawan dauh balna, dawak wayani ūk balna di kau arwi yayamna kidika balna bitik yakna,

⁴dawak witing muhni kat sakripais busnin pāni Baal satni balna ayangnina kau yayamna dai kidika bitik laih daukalmumukna dai. Kidika minityakat Josías yaklauwi pakwak kidika balna minit kau walapni busnin pāni dai kidika bik bahwi disyamna. Kaput bik sihwak bahwi dis yayamna Asera wayani, dawan dauh dawak di kau arwi wayani balna yayamna dai kidika balna bik; bahwi yahamni manah yamna dai, dawak angdik muihni balna kidika yakat sakripais yayamna dai kidika balna saunina ū minit yakat uhna dai.

⁵Kidika minit yakat, sumalniyang balna wakalnina balna dai kidika sakripais bubuswa pāni busna dai, dawak kaput laih Judá dawak Jerusalén kidika maisihnidis yamna dai.

⁶Sihm kaput yamna dai, Manasés, Efraín dawak Simeón tawanni nunuhni balna yakat, dawak Neftalí kat, tawan nunuhni balna kau muih kalududuhwa pāni[39] balna yakat.

⁷Sakripais busnin pāni balna bahwi dis yamna, Asera dawak dawan dauh wayani balna bitik bahwi yahamni manah yamna dai, dawak Israel pāni bitik kau walapni busnin pāni balna bitik bahwidis yamna dai. Kidika usnit kat nawatwi Jerusalén yakat kiuna.

⁸Witing king kana kurih 18 yakat, sauni kidik dawak makatyulnin ūni kidika bik maisihnidis yamna usnitkat, Azalía walanibis Safán kidika sihna dai, dawak tawan nuhni kau alcalde Amasías, dawak ulyang muihni Joa, Joacaz walanibis, kidika balna sihna dai Papangni Dawan ūni kidika watwi laihwi dulauwi yamna atnin.

⁹Kaput laih witingna talna uina dai sumalyang nuhni Hilcías yakat, dawak Papang ūni lalahni duwi uina dai kidika kalalana, kidika lalahni laih libait dūr maintalyang balna yaklauwi walwi ududuhna dai kidika, Manasés yakat, Efraín yakat, Israel yakat muih wawatna dai kidika balna kaupak, Judá kau wawatna balna dai kidika balna kaupak bik, Benjamín kaupak, dawak Jerusalén muihni balna kaupak bik.

¹⁰Kidika usnit kat Dawan ūni yamyang balna yakat diayana dai, kaput laih witingna lauwi diana atnin makatyulnin ūni daukalna kat laihwi dulauwi yayamwa balna yakat.

¹¹Lalah kidika diayana dai, pan kau ū pakyang balna yakat dawak wark tunan duyang balna yakat, kaput laih kipala balna dawak pan balna kidika bakanna atnin sitnin dini balna, dawak dinit kau nunuhni rabutni balna lakwa kidika, kat Judá kingni balna yaklauwi dadawak daukalna kidika.

¹²Adika ahalni balna warknina kidika barangni yayamwa dai, dawak kidika balna tunan yakat bangdai kidika laih libait balna Jahat dawak Abdías, kidika laih Merari sulani balna, Zacarías dawak Mesulam kidika balna laih Coat sulani balna dai, bahang witingna laih tatuna balna dai. Witingna balna kidika bik di trukyang balna taninatuna dai, dawak kidika yakat wark yayamwa bitik yakat tunan duduwadai. Libait balna bitik kidika laih lawana yamyang balna dai, dawakat buas kidika yul bayakna balna kidika ulyang balna dai, wihta kapat dawak dūr maintalyang balna dai.

¹³

¹⁴Dawan ūni yakat lalah duwi uina kidika yayakwa kat, sumalyang Hilcías witing Dawan lani wauhnitaya kidika yakna dai, Moses tingni munah diana dai kidika.

¹⁵Kidika minitni yakat Safán, yul bayakna balna ulyang yakat kalyulna, Dawan ūni yakat la wauhnitaya kidika yakna; dawak wauhnitaya kidika Safán yakat kalana,

¹⁶dawak witing, king yakat dukiwi isning pakwi aput kalyulna: —King dima yamyang balna kidika, man ais yamnin paknaman kidika yakat yamwa bangki.

¹⁷Makatyulnin ūni kau lalah bangdai kidika aharna dawi wark yamyang tunan balna yakat dawak yamnin pakna balna yakat bik.

¹⁸Kaput bik Safán yaklauwi king yakat isning pakna, sumalyang Hilcías yaklauwi witing yakat wauhtaya as kalana; dawak Safán yulwi talwadai king muhni yakat.

¹⁹La wauhnitaya ais yulwa kidika king dakawi prakni iswi bisna,

²⁰dawak kidika minitni yakat pakna Hilcías yakat, Safán walanbis al Ahicam yakat, Abdón, Micaías walanbis yakat, Safán yul bayakna balna ulyang yakat, dawak Asaías kalbauyang balna taninatuna king duwa dai kidika:

²¹—Yang paki yakat yawa Dawan kau yulta dakanauh, dawak Israel, Judá kau muih bangkidika bitik yulnina bik, adika wauhnitaya akat ulna balna yulni kidika; Dawan kidika kulnin daukalna atnin ki manikingkauh, kat mamuihki bararak balna laih adika Dawan yulwa yakat yayamwasdai bahang, dawak adika wauhnitaya ulna adika kaput bik yayamwasdai bahang.

²²Hilcías dawak king yaklauwi ayangni yulwadai kidika balna uiwi kaltatalna prapit yal Hulda yakat, Salum yalni, Ticva walanibis al, dawak Harhas mani, witing kidika laih makatyulnin ūni asnina balna kidika maintalwa dai. Hulda kidika Jerusalén tawanni nuhni Sahyakna Bu yakat yalahwadai, dawak adika yulni kalyuyulwak yulna,

²³witing yaklauwi nangnitnalana: —Adika kuduh Dawan yaklauwi yulwa kidika, Israel Papangni: ‘Kalyultanauh angdika muihni yaklauwi manasihna kidika yang akat yayulta dakanamna,

²⁴yang, Dawan yang adika yultayang: Adika pāni akat dutni kidika sihki, dawak muihni balna minitna yakat bik, adika wauhnitaya yakat blisin dutni ulna bangkidika bitik, manna Judá kingni muhni yakat yulta talnamana kidika.

²⁵Kat manna yaruhmta danamana, dawak dawan dauh balna yakat walapni busnamana, manna yamtamana bitik kidika yulni kulnin daukalwi; kidika bahang kulnik daukalna kidika adika pāni minit yakat kiwi, dawak bik sip piwas karang.

²⁶Judá kingni yakat kalyultanauh, sihna Dawan yakat kalyulwi dakana atnin, dawak Dawan, Israel Papangni yaklau yulwi: Mana dakanaman yakat tapayuta dakanaman kidika yulni,

²⁷dawak bik kulnam bitik bik maisihwada kidika, kaput bik sau yakat buktada kidika, adika pāni dawak muihni balna minitna yakat yulnayang kidika daka, dawak bik yang muhki yakat saukat buknaman kidika, asmana bisnaman kidika, dawak yang muhki yakat aidanaman kidika, yang nikingkauh laih madakanayang. Yang Dawan yang kat mayultayang.

²⁸Kulnin aslah kidika mating dauma, dawak muihma bararak balna karak kalpakma, dawak adika pāni minit akat dawak muihni balna minitna yakat bik dutni kalating kaiwarang kidika talas awama.’ King sihna balna dai kidika nawatwi adika yulni duwi uina.

²⁹Kaput dawak king yaklauwi Judá dawak Jerusalén muihni bararak balna kidika bitik yakat diyulna, uiwi kaluduhna atnin.

³⁰Usnit kat king dawak Judá ahalni balna, Jerusalén muihni balna, dawak sumalyang balna, libait balna, dawak kidika nisan bitik, dibin kaupak nuhni kat, Dawan ūni yakat uina. Kidika yakat king yaklauwi parasni yulwi talna aslah kalahna wauhnitaya yakat yulwa kidika, dawak kidika wauhnitaya laih Dawan ūni yakat tuskat yayakna dai.

³¹Usnit kat king witing yaklauna dai ū rahni nuhni yaihnit yakat, dawak Dawan yakat pramis yamna yulni dakana atnin, dawak bik yamna atnin barangni palni, dawak alas dis palni bik lāni balna kidika, dawak bik aslah kalahna kidika kaput yamna atnin, kidika wauhnitaya ulna yakat.

³²Usnit kat dipakna Jerusalén muihni balna, Benjamín muihni balna kidika bitik yakat bangdai kidika witingna pramis yamna atnin kidika lani kat yamna atnin. Jerusalén muihni balna laih Papang karak aslah kalahna kidika kat yayamna, witingna muihnina bararak balna Papangnina.

³³Josías yaklauwi yakpamna ayangni dutni warkni balna yamwa dai kidika Israel balna saunina bitik yakat, dawak bik Israel yakat muih bangkidika bitik yakat pakna witingna Daninawan Papang yakat prias yamna atnin. Witing sangka mani balna yakat, Dawan kaupak naikau kalalahwasdai, muihnina bararak balna Papangnina.