Read Mayangna 2 Crónicas 35 Bible Online

2 Crónicas 35 - Mayangna bible

2 Crónicas 35

¹Josías witing Jerusalén yakat Insal kaiwi bayakna alasnina kidika yamna dai, Dawan risnipik kau: kurih kawa kaupak waiku tatuna kidika kaupak ma 14 yakat sīp kidika īna dai, alasna kidika dini.

²Sumalyang balna kidika warknina pāni kat awi dana dai, dawak bik kulninna dulauna dai Dawan ūni yakat wark balna kidika yamna atnin.

³Kidika minit yakat libait balna laih muihkau sumamalwādai, Israel bitik yakat, dawak witingna kidika Dawan dini yakna balna dai, dawak adika lani balna diana: “Papang lani baksni holi yakna, Salomón, Devid Israel kingni walanibis yamna kidika makatyulnin ūni yakat uita laktanauh. Salahkau trukta duyawanamna awaski. Waradika laih manna Dawan Papangmana dini yamtanauh, dawak Israel, Dawan tawanni kidika yakat bik.

⁴Aslah alahwanauh papangni walanibis balna karak, dawak wark awarni bik, Devid Israel kingni ulwi dana kaput, dawak walanibis Salomón bik.

⁵Libait balna buas wattanauh holi pāni yakat, walanibis papangni karak kalududuhna kidika ampus bangkat kaput praisni, kidika laih kaluduhna balna kidika taninatuna, Israel wirahnina ūk balna yakat.

⁶Insal kaiwi bayakna kidika sīpni sakripais yamtanauh, maisihnidis alahwa di ampus yusyamwarang kidika ridi alahwanauh, kaput laih wirahmana balna kidika sipkarang yamna atnin, Dawan yaklauwi Moses munah pakna dai kidika yamna atnin.”

⁷Kidika usnit kat Josías witing palni tingnilau balna kau diawadai tawan muih balna bitik kalududuhna bangdai yakat insal kaiwi bayakna kidika alasnina yamna atnin: diana kidika laih sīp dawak kuts, bitik kat 30,000 dai, dawak kidika minit yakat turuh almuk wawahma binina tausin bās.

⁸Kaput bik laih kabamint warkni yamyang balna kidika witingna silp kulninna di diayawa dai tawan muihni balna yakat, sumalyang balna yakat dawak libait balna yakat bik. Dawak Hilcías, Zacarías dawak Jehiel, witingna Papang ūni kidik tingnina yakat dai kidika, sumalyang balna yakat diayana dai sumalyang balna yakat tinglau tausin bu minitkau andat tiaskauas, kidika laih insal kaiwi bayakna alasnina yamnin, dawak turuh ahalmuk wahma binina kidika 300;

⁹dawak Conanías, witingna aslah balna kidika Semaías dawak Natanael, kaput bik laih Hasabías, Jehiel dawak Jozabad, libait balna taninatuna, diayana dai tinglau tausin singka, dawak turuh ahalmuk wahma binina kidika andat singka.

¹⁰Dawak kaput laih witingna alasnina yamnin kidika ridi kalalahna kat, sumalyang balna kidika mahka panina kat kat duduna, dawak libait balna bik angdika mani warknina yayamwarang balna kidika ridi kalalahna, king yaklauwi dipakna dai kaput.

¹¹Kaput laih insal kaiwi bayakna alasnina yamnin tingnilau balna kidika sakripais yayamna dawak libait balna laih tinglau unitak kidika tatakna, dawak sumalyang balna laih libait balna yaklauwi ā diayawa kidika kau sakripais busnin pāni yakat rarasna.

¹²Usnit kat salani balna kidika silp dakwi yayakna busnin dini kidika, tawan muihni balna walaninabis, papangnina karak aslah kalahna ampus kat kaput praisni, kaput laih Dawan yakat kalana atnin, Moses wauhnitaya yakat ulna kaput; dawak turuh ahalmuk balna kidika bik sihm kaput yayamna.

¹³Kidika tanit yakat tinglau balna dai kidika bubusna insal kaiwi bayakna alasnina kidika yamna atnin, tanit mani kau ulna dai kaput; dawak minitdis kalanin Papang dini yakna kidika suba tuyuyulni kau lalahna dawak suba kau bik, dawak sirihni palni laih tawan muihni balna bitik yakat yuyuna.

¹⁴Usnit kat libait balna witingna yamnin dai kidika yayamna, dawak sumalyang balna yamninna dai kidika bik, kat sumalyang balna, Aarón sulani balna kidika uba wark duduna dai bahang pukta kat sakripais karauni kauna bubuswa kidika buswi, dawak salani kidika bik buswi. Kidika bahang libait balna kidika witingna yamninna dai kidika dawak sumalyang Aarón sulani balna yamninna dai kidika bik yayamna dai.

¹⁵Unbauyang, Asaf sulani balna dai kidika, witingna bik warknina pāni kat bangdai, Devid, Asaf, Hemán dawak Jedutún di talyang as king duwa dai kidika balna yaklauwi ahana dai kidika kat. Dūr maintalyang balna laih dūrnina kat kat bangdai; witingna as bik warknina panina kaupak dawi kalahnin awasdai, kat witingna aslah libait balna yaklauwi ridi yayamna dai bahang witingna bik sakripais yamnin duduwa dai kidika bik.

¹⁶Kaput aslah kalahna dai, kidika mani Dawan warkni balna yamnin bitik kidika, insal kaiwi bayakna mani kidika alasna yamnin yulni, dawak sakripais busnin pāni Dawan dini kidika yakat sakripais karauni kauna kidika bubusna dai, king Josías yaklauwi yamnin yulna dai kaput.

¹⁷Kidika mani Israel balna bitik kaluduhna bangdai kidika, insal kaiwi bayakna alasnina kidika yayamna dai, dawak ma tiaskaubu plawar pupuhnin dini dis busna kidika kakasna dai.

¹⁸Israel yakat wat as bik kaput alasna yayamwas dai insal bayakna mani kidika, prapit Samuel mani balna dai kidika kaupak; dawak Israel kingni balna pasyakat kaput yayamwas dai wat as bik, Josías yamna kaput, sumalyang balna, libait balna, Judá dawak Israel muihni balna karak kalpakwi yamna dai kidika, dawak Jerusalén muihni balna karak bitik.

¹⁹Josías king kana kurih 18 laihna yakat kidika insal bayakna mani alasnina yayamna dai.

²⁰Josías yaklauwi makatyulnin ūni kidika watwi laihwi dulauwi yamna usnit kat, Egipto kingni Necao, witing Éufrates wasni yakat kiuna Carquemis niningyakat kalbauna atnin. Josías yaklauwi niningyakat kalahna;

²¹kaunah Necao yaklauwi muih yakwi sihna Josías yakat kalyulna atnin: “Kulnin aslah karak yadatah, Judá kingni. Waradika laih man namangyakat aiwasyang, kaunah nisan ūk niningyakat aiwayang, kidika karak kalbautayang kidika. Papang yaklauwi yayulwi bainah yawinik, kaput bahang man yamni atnam yulni, Papang niningyakat yaklauwinih, witing yang karak kidika, kaput laih man kidika madaukalpamwas karang.”

²²Kaunah Josías witing dangsawas dai, nawatkauh laih kalbaunin kidika yamna[40] witing niningyakat, Necao yulwa kidika kaldakawas dawi, kat kidika laih sihm Papangni kidika kaupak kaiwa kidika. Kaput bahang Meguido sauni langni yakat kalbabauna,

²³dawak sibang ruhmyang balna kidika Josías yakat ruruhmna. Kaput dawak king kidika yaklauwi kalbauyang balna taninatuna balna duwa kidika yakat diyulna: “¡Akaupak yāyaktanauh, dutni palni yaina!”

²⁴Kalbauyang balna tanituna kidika yaklauwi kalbaunin kārni kaupak yakwi kār ūk yakat lalana, dawak Jerusalén yakat duwi uina, bahang kidika yakat dauna. Kaput laih muihni bararak balna saunina ū yakat nununa. Judá dawak Jerusalén muihni balna bitik laih Josías yulni kakaidana.

²⁵Jeremías yaklauwi Josías risnipik kau muih dauna yulni damni as ulna. Warmani kat unbauyang ahal dawak yayal bik isningnakatwi Josías yakat adika dauna laniwana yakat. Adika laniwana laih Israel yakat witingna nining unbauwi lan kakalna, bahang lawana balna walwi yayakna balna pasyakat ulna tuski.

²⁶Josías yulni umani balna dawak, wark yamni balna yamna kidika, Dawan lāni wauhnitaya yakat ulna kaput,

²⁷dawak yamna balna kidika, tatuna kaupak witni kat, ulna ki Israel dawak Judá balna kingnina wauhninataya yakat.