Read Mayangna 2 Crónicas 4 Bible Online

2 Crónicas 4 - Mayangna bible

2 Crónicas 4

¹Salomón yamna sakripais busnin pāni as bras kau naini laih metro tiaskauarungka dawak panuhni bik sihm kaput, dawak maluihni laih metro arungka minit kau papusbah.

²Kaput bik was laihnin dini as bras kau yamna dai. Tuyulni dai, kidika laih kungnimak as kaupak kungnimak ūk yakat duwadai metro arungka minit kau papusbah. Maluihni laih metro bu minit kau centímetro 25 dai, kungnimak awaih kidika laih metro 13 minit kau papusdak duwadai.

³Was laihnin dini dinit yakat, dawak yaihnit awaih yakat, Turuh ahalmuk wayani kidika yamna bangdai, bahang kidika balna laih was laihnin dini kidika karak aslah yamna dai.

⁴Was laihnin dini kidika turuh almuk bras kau yamna kidika 12 balna minitna yakat sakdai, bahang bās kidika tingpal niningyakauh talwa raudai, bas ūk kidika wadah niningyakat talwaraudai, dawak bās ūk kidika ma kilwa nining yakat talwaraudai, dawak bās witni balna kidika ma kawa niningyakat talwa raudai. Kalnina dangnitna kau kidika laih pastawa yakauh dai, bahang kidika minit yakat was laihnin dini kidika ilna sakdai.

⁵Was laihnin dini kidika tubakni centímetro tiaskaubās duwa dai; dawak kungnimak kidika laih sihm lirio kapat dai, bahang dini kidika laih was litro tausin 66 laihwadai.

⁶Was laihnin dini ūk salap yamna dai bras kau, kidika laih di suhnin, dawak tingpal niningyak singka āna, dawak wadah niningyak singka ūk āna dai. Bahang kidika yakat sakripais karauni kauna bubuswa kidika suhnin kat yakat susuhwādai; kaunah was laihnin dini nuhni kidika laih sumalyang balna kalsusuhwādai.

⁷Kaput bik laih awas dahlwi ilnin pāni gol kau yamna dai, amput yamnin yulna kaput, tingnipal niningyakat singka, dawak wadah niningyakat singka āna dai.

⁸Kidika minit yakat tibil salap yamna, dawak makat yulnin ūni yakat āna. Kaput bik gol sūnitak nunuhni andat yamna dai.

⁹Kidika minit yakat watak yamna dai sumalyang balna wataknina, dawak watak tanit nuhni kalkulwa kidika bik, dūrni balna bitik yamna dai, bahang kidika balna bitik laih minit yakat bras kau kahwilana dai.

¹⁰Dawak was laihnin dini nuhni kidika laih makatyulnin ūni tingpal yakat āna dai, wadah kaupak ma kawa kidika walsah yakat.

¹¹Kidika minit yakat baisa Hiram yamna, suba lababanni kidika, subil dawak sutak nunuhni balna bik, kaput laih witing Salomón warkni kidika yamwi dana dai Papang ūni yakat.

¹²Kidika warkni balna yamna kidika laih rahni balna bu kidika, dawak rahni tunan kau ilnin tuyulni balna yamna dai kidika, dawak ayan lakwi par dawi birna balna bu yamna dai kidika, rahni tunan kau ānin dini kidika minit yakat muknin dini,

¹³granado minik 400 yamna dai kidika, ayan lakwi par dawi birna balna bu kidika dini balna, parna bu kidika laih ayan lakwi par dawi birna kidika balna as dinina dai, bahang kidika balna kuduh ū rahni tunan kau ilwa balna kidika minit yakat muknin dai kidika;

¹⁴rahni balna salap kidika minit yakat was laihnin dini balna salap ilna dai kidika,

¹⁵dawak was laihnin dini nuhni kidika dinit yakat, turuh almuk wayani 12 bangdai kidika,

¹⁶kidika minit yakat suba lababanni yamna dai kidika, subil dawak park balna bik yamna dai kidika. Hiram yaklauwi king Salomón yakat di dunin dini balna yamwi kalana dai kidika, Dawan ūni yakat yusyamna atnin, kidika balna laih bras kau manah yamna dai.

¹⁷Kidika laih arwi maulni yakat awi yamna dai, bahang yamna pāni kidika laih Jordán, Sucot dawak Saretán[6] kidika pāni balna yakat yamna dai.

¹⁸Salomón witing, di dunin dini balna kidika mahni yamna dai bras kau, kaunah witing kulwas dai dini balna kidika paun awi talna atnin.

¹⁹Kaput bik laih Salomón witing yaklauwi pakwak Papang ūni kau di dunin dini ūk balna kidika bitik yayamna dai: sakripais busnin pāni gol kau yamna dai kidika, Dawan dini plawar busna balna ilnin pāni tinibil kidika,

²⁰awas ilnin pāni gol kau yamna dai kidika, dawak awasni balna bitik holi palni pāni muhnit kau sakdai kidika, bahang kidika laih dahlna atnindai witing yaklauwi pakna dai kaput;

²¹dipulu wayani, awas balna, dawi di itiswi laihnin dini, kidika bitik gol kau manah yamna dai;

²²awas pinin dini, sutak nunuhni, ispun nunuhni balna, dawak walapni puwi busnin dini kidika balna bitik laih gol manah dai. Kaput bik laih makatyulnin ūni kiwi kawa kidika bitik laih gol manahdai, pasniningkauh dūr putnin kidika balna bitik, holi palni pāni kidika bik, kaput bik laih makatyulnin dūrni balna kidika bitik laih kaput dai.