Read Mayangna 2 Crónicas 5 Bible Online

2 Crónicas 5 - Mayangna bible

2 Crónicas 5

¹Dawan ūni yakat Salomón yaklauwi wark balna yamnin paknadai kidika bitik yamna usnit kat, Salomón witing di dunin dini gol balna, dawak lalah, kau bik yamna balna dai kidika witing papangni Devid yaklauwi Dawan yakat kalana dai, bahang dini balna kidika laih Papang ūni yakat dukiwi āna dai.

²Kaput laih Salomón yaklauwi uduhna Jerusalén yakat, Israel muihni barak balna bitik, sulani balna taninatuna balna bitik, dawak Israel pas yakat muih nunuhni dikulna balna bitik, kidika laih Dawan pranimis lani baksni Devid tawanni nuhni Sayan kaupak duwi kiuna atnin yulni.

³Alasna as kulnin nuhni kalawa yakat, kidika laih kurih kawa kaupak waiku tiaskaubu yakat Israel muihni balna bitik aslah kalalahwadai king Salomón karak.

⁴Israel muihnibararak balna bitik uina, dawak libait balna lā baksni kidika laihwi dulalauna

⁵dawak duwi uina Papang karak kalpaknin ūni labanni karak libitwi, dawak kidika pasyakat di dunin dini balna maisihni dis kulna balna kidika bitik karak, bahang kidika dini balna laih libait balna dawak sumalyang balna witingna duwi uina dai.

⁶King Salomón dawi Israel muihni balna bitik witing karak kalududuhna dai kidika, witingna lā baksni muhnit yakat bangdai sakripais yamwi, sīp kau dawak turuh ahalmuk kau bik, kidika laih mahni palni yayamna kidika bahang sip-awas palni dai kulwi talna atnin.

⁷Kidika usnit kat sumalyang balna yaklauwi Dawan karak pramis yamna lāni baksni kidika makatyulnin ūni pasyakat duwi kawi uina, holi palni pāni yakat, di lawani duyang balna kidika lawanina dinitna yakat,

⁸bahang kidika balna lawanina laih ririh raudai lā baksni tuskidika minit yakat, minit yakat mumukwa kidika laih baksni dawak panan uhrlana balna kidika bik mumukwadai.

⁹Kaunah panan uhrlana balna kidika nanaini dai bahang, holi pāni kaupak[7] sutni balna kidika lāih dai, holi palni pāni muhnit yakat, kaunah ahni kaupak laih lāih awasdai; bahang kaput laih watna dai warmani kat.

¹⁰Kidika baksni pasyakat di ūk laih dis dai, kaunah kipala lababanni bu Moses yaklauwi āna dai kidika Horeb asangni yakat, kidika pramis kinipala lababanni Dawan yaklauwi Israel balna yakat yamwadai kidika Egipto kaupak kalalahna dai yakat.

¹¹Sumalyang balna kidika holi pāni kaupak kalalahna. Sumalyang balna bitik kidika yakat bangdai kidika laih maisihnidis kalalahna dai, witingna maisihnidis kalahnin mani kidika kaiwi kawasdai kaunah, witingna kidika mani balna yakat kulwas dawi maisihnidis kalalahna dai.

¹²Libait muihni unbauyang balna, Asaf, Hemán duwak Jedutún, witing walaninabis bitik dawak wanaihnina balna ūk bik, witingna kalnina kau yaklauna bangdai, sakripais busnin pāni ma kilwa niningkauh yakat, witingna asninana kakana kidika laih linin asnina dai. Tingnina yakat duwa bangdai, plit kapat wisnin dini kidika, pasnin dini wahni duwa balna kidika bik. Witingna karak bangdai sumalyang balna 120, kidika balna laih trumpit puhwa bangdai.

¹³Kaput laih witingna bitik kalpakwi trumpit pupuhna, dawak dinitna aslah unbauwi Dawan ayangni nuhni yamwi kaput bik laih tingki bik kalyuyulna, kalalawak trumpit bik parasni yulna dai, wisnin plitni balna, dawak paswi yakisdinin satni balna bik, witingna unbauwa bangkat aput: “Dawan ayangni nuhni yamtanauh witing laih yamni bahang, kat witing dalani duwa kidika laih ban kaput bahang.” Kidika minitni yakat, Dawan ūni kidika mukus manah banghna dai,

¹⁴mukus kidika yulni sumalyang balna kidika sip-awas dai baisa watwi kidika prinias yamna atnin, kat Dawan alasnina yaksihni kidika laih makatyulnin ūni yakat buhngdana dai bahang.