Read Mayangna 2 Crónicas 6 Bible Online

2 Crónicas 6 - Mayangna bible

2 Crónicas 6

¹Kaput laih, Salomón aput yulna: “Dawan, man yulnaman puksani pasyakat yalahdaman.

²Kaunah yang lawik paktik manayang makatyulnin ūni as, yakat yalahna atnam, kidika pāni yakat ban yalahna atnam.”

³Kidika usnit kat king kidika muhni wirlana, Israel muihni balna yaklauna bangkidika bitik muhnina yakat, dawi blisdiyamwi

⁴aput yulna: “Dawan, Israel Papangni laih ayangni nuhni yamna karang, witing, yang papangki Devid kau pramis yamwi kalyulna kidika:

⁵‘Egipto kaupak yang tawanki yaknayang kidika, yang tawan nuhni as bik walyaktik dutasyang dai Israel sulani balna paskaupak, dawak kidika pāni yakat makatyulnin ūni as pakwi yāwak yang ayangki kidika yakat sak atnin yulni, dawak kaput bik laih muih al as bik walyaktik dutasyang dai, yang tawanki Israel kidika tanituna duna atnin,

⁶kaunah Jerusalén kidika yaktik dunayang dai, yang ayangki kidika yakat sak-atnin, dawak Devid kidika yaktik dunayang dai, yang tawanki Israel yakat kabamint kana atnin.’

⁷Yang papangki Devid kidika Israel Papangni Dawan ayangni usnit yakat makat yulnin ūni as paknin dai.

⁸Kaput kaunah, Dawan yaklauwi kalyulna dai: ‘Yamni yamtaman, yang akat makatyulnin ūni as pakta yanin kulta man kidika;

⁹kaunah man awaskarang pakma kidika, kauna man walamabis duma kidika yamwarang. Witing yaklauwi makatyulnin ūni kidika pakwarang.’

¹⁰“Kaput bahang, Dawan pranimis kat yamna. Witing yulna kaput, yang papangki Devid pāni kidika dunayang, dawak Israel trunni yakat ilwik yalahna yang, dawak Israel Papangni Dawan yakat makatyulnin ūni as paktik kalanayang.

¹¹Kidika minit yakat, pramis baksni kidika bik uitik ānayang, Dawan yaklauwi Israel balna yakat pranimis yamna dai kidika.”

¹²Kidika usnit kat Salomón witing Dawan kau sakripais busnin pāni muhnit yakat yaklauna, Israel muihni balna bitik muhnina yakat, dawak tingni balna dulauna.

¹³Witing kilna sakdai, pāni kidika laih bras kau yamna dai, bahang naini duwa kidika metro bu minit kau centímetro 25 dai, dawak pirihta bik sihm kaput dai, dawak maluihni laih metro as minit kau centímetro 35, bahang kidika laih yamwi dawi watak papus yakat lakna dai. Kidika usnit kat Israel muihni balna bitik muhnina yakat limbabahna, dawi tingni kidika makau kisang yakat dulauna,

¹⁴dawi parasni yulna: “Dawan, Israel Papangni: makau kisang yakat bik dawak sau yakat bik Papang ūk diski man kapat, man pramamis kat yamtaman, dawak man kulnam minikun talnin dutaman kidika lāih niningnakataman, kidika muihni kulnin bitik karak man dima yamwa balna yakat;

¹⁵yang papangki Devid yakat pramis yamna man kaput yamna man, kaput laih wark dawak yul kidika karak libitna man, adika mani.

¹⁶Kidika bahang, Dawan Israel Papangni, yang papangki, man dimayamyang kau pramis kalyamnaman kidika kaput yamtah: witing sulani as dis awaskarang, man lawa ilpni yamtangkat Israel tronni yakat kilna atnin, witingna sulanina balna kidika man lāma kat yayamwarang kat, witing man lāma kat yamna dai kapat.

¹⁷Kaput bahang Dawan, Israel Papangni, man yamtang kat, pramamis kidika kat kalahna karang yang papangki Devid, man dima yamyang dai yakat.

¹⁸“Kaunah ¿rahmyah Papang kidika sau akat muih balna karak sip yalahna atnin? Kisang dawa kidika panuhni bitik yakat sip kawas kidika, ¡mahlaih ampus sip-awas karangyah adika makatyulnin ūni paknayang kidika manyakat!

¹⁹Kaput kaunah, Dawan, yang Papangki, yang man kalma dinit yakat buktik yultayang kidika dakah; dawak adika man dima yamyang man kau minityulwa kidika dakah.

²⁰Talaman kidika dawinih, pukta dawak madah bik, makatyulnin ūni adika, adika pāni akat ban sak-awamaki atnaman kidika. Man dima yamyang man kau minit yulwa kidika kaldakah.

²¹Man kalna dinit yakat buktik yultayang kidika dakah, dawak man tawanma Israel yulwa kidika bik, yangna adika pāni akat mikitna yultanaki kat. Kisang kau yakat dakama, man kidika yakat yalahtaman kidika, dawak kaput laih dutkina datang disnin kidika yanama.

²²“Muih as kat wanaihni niningyakat dutni yamwarang, dawak papakwak man ayangma kau yakwi yulnin karangkat adika man kau sakripais busnin pāni akat, dawak adika makat yulnin ūni akat,

²³man kisang kidika kaupak dakama, dawak yamma; lā kat kidika yamma man dima yamyang balna niningna yakat. Pāt duwa muihni kidika minit kalama, yamtangkat witing minit yakat wah kidika kiwarang, witing di dutni yamna kidika yulni, dawak bik dutni yamwas muihni yakat bik lā kat kidika yamma, witing niningyakat amput yamnin kidika kaput.

²⁴“Waihla kidika yaklauwi man tawanma Israel yakat minit bayakwarang kat, man namangyakat dutni yamna kidika yulni, kauna usnit kat witing nawatwi kaiwi man ayangma nuhni yamwarang, dawak adika ūni akat witing minityulwi kalma dinit yakat bukwarang kat,

²⁵man dakama kisang kidika kaupak, dawak witing dutni kidika datang diswarang, dawak kalatang kat, man sau kalanaman pāni yakat nawatwi kiuna karang, dawak muihninabararak balna kau bik dianaman dai yakat.

²⁶“Ma daihni lakwarang kat, was lauwas, tawan kidika man namang yakat dutni yamna kidika yulni, kaunah kidika usnit kat, adika pāni akat kaiwi minit yulwi man ayangma nuhni yamwi, witing dutni yamna kidika kaupak kulnin wirlawarang kat, wah duwa kidika yulni,

²⁷man kisang kidika kaupak kaldakama, dawak dima yamyang dutni yamna kidika datang diswarang, dawak man tawanma Israel bik, dawak ta yamni munah uinin kidika niningnakatah. Kaput bahang, adika sauni man tawanma yakat dinina dianaman yakat was launin sihtah.

²⁸“Kidika sauni yakat yuh lakwarang, kidika awaskat siknis bukwarang, pan balna kidika bitik kusulawarang daihni kidika yulni, kidika awaskat puputni laihwarang, dimuih sisin balna kalalahwarang; waihla balna kidika tawan nuhni yakat awaihwi daklawi niningyakat kalbabauwarang, kidika awas bik di dutni ūk as kaiwarang, siknis satni,

²⁹kaput laih angdika muihni man kalma dinit yakat bukwi minityulwarang kidika dakama, kidika awaskat man tawanma Israel muihni balna bitik, witing yakat dutni dawak dalani kidika talwi witingna tingnina dulauwi minitna yuyulwarang, makatyulnin ūni akat. Man lawa kisang yalahtaman kidika kaupak didakama, kaput laih dutnina dawak disnin kidika diama; dawak witingna bitik yakat yayamna kidika yulni ampus dianin kidika praisni kat diama, kat man manah muih al ais yamnin kulwa kidika, dawak kulnin yakat bik talaman.

³⁰

³¹Kaput laih man yakat rismapik nuhni mamawarang, yulma dakakawarang, witingna muihnina bararak balna kau sau dianaman dai kau yalalahwa mani balna yakat.

³²“Tringsar muihni karang bik, man tawanma muihni awas kidika, witing pa naikaupak kaiwarang kat man ayangma nuhni kidika yulni, dawak parasma nuhni yulni bik, dawak adika makat yulnin ūni akat kawi minityulwarang kat,

³³kisang kidika kaupak didakama, man yalahtaman pāni kidika kaupak, dawak man lawa kalama di mayulwa kidika bitik, kaput laih sau akat nisan balna bitik laih amangmalalawarang dawak bik rismapik mamawarang, man tawanma Israel yamwa kaput, dawak bik amanglalawarang man ayangma kidika laih yulna ki adika yang lawik ū yamtik manayang akat.

³⁴“Man tawanma kidika waihnila niningyak kalahwi kalbauwarang kat, angkat angkat man lawa kalsihma kidika, witing adika tawanni man walta yaknaman nining akauh muhdawi minityulwarang kat, yang lawik makatyulnin ūni yamtik manayang akat,

³⁵man kisang kidika kaupak dakama minityulwa kidika, dawak kalma dinit yakat bik bukwi yulwa kidika, dawak witing yulni kidika nanitdakma.

³⁶“Man namangyak dutni yayamwarang kat, kaunah muih as bik diski dutni yamwas kidika, bahang man kulnam daukalwak waihla balna tingnina yakat āma kat, warau lani yakat buknin, dawak duwi uiwarang sau ūk yakat, naikau karangpa, kidika awaskat ulis karangpa,

³⁷kidika sauni yakaupak kulninna wirlalawarang kat man yak, dawak kalma dinit yakat bukwi yuyulwarang, dawak bik amanglalawarang witingna dutni yayamna kidika,

³⁸witingna kulninna bitik, sulnina bitik man yakat uiwarang kat, kidika sauni yakat laihwi duwi uina kidika kaupak, dawak adika sauni witingna muihnina bararak balna yakat dianaman nining akauh muhwi minitna yuyulwarang kat, dawak bik, tawan nuhni man lawa walta yaknaman yakat makatyulnin ūni as yamtik manayang nining-akauh,

³⁹witingna minitnayuyulwi man kalma dinit yakat bukwi yuyulwa kidika dakah kisang kau yalahtaman kidika kaupak, dawak witingna yulnina nanitdakma, dawak tawanma dutni yamna kidika man namangyakat datang diswarang.

⁴⁰“Yang Papangki, adika pāni akat minitna yuyulwarang kidika dakama.

⁴¹“Lawah, Papang dawak Dawan, man lāma baksni parasni nuhni kidika karak, dawak aiwah, man urupnam pāni akat. Man sumalmayang balna, Papang dawak Dawan, witingna laihwi yakna asnina kakawang, man kau bangni balna kidika baraknin alasnina yamni kidika duduwang.

⁴²Kulnam daukalwinih, Papang dawak Dawan, man king as walyakta dunaman kidika. Man dima yamyang Devid niningyakat man dalani kaltalnam kidika, ismangpuk awah.”