Read Mayangna 2 Crónicas 7 Bible Online

2 Crónicas 7 - Mayangna bible

2 Crónicas 7

¹Salomón witing minityulwi dahn dawakat, kisang kidika kaupak kuhpau kaiwi bukna, dawak sakripais karauni kauna busnin dini, dawak sakripais ūk kidika bitik busna, kaput dawak Dawan alasnina yaksihni kidika makatyulnin ūnipas kidika bitik bunghdana,

²kaput bahang sumalyang balna kidika sip-awas dai kidika yakat kawi kiuna atnin.

³Israel muihni balna bitik kuhpau kidika talwi, dawak Dawan alasnina yaksihni kaiwi bukwa kidika makatyulnin ūni yakat, witingna bitik laih limbabahwi muhnina saukat lalakna, dawak Papang ayangni nuhni yayamna, dawak Dawan yakat tingkih bik kalyuyulna, aput watwi lamwi kalyuyulna: “Kat witing laih yamni bahang, witing dalani talwa kidika laih nining ban kaput ki.”

⁴Kidika usnit kat, king dawak tawan muihni balna bitik Dawan yakat sakripais bubusna.

⁵King Salomón sakripais busnin turuh ahalmuk tausin 22, dawak sīp kidika laih tausin 120. Kaput laih king dawak Israel balna bitik witingna makat yulnin ūni kidika Papang dini yayakna.

⁶Sumalyang balna kidika laih panina kat ban bangdai, dawak libait balna bik, king yaklauwi Papang laniwana unbabauwak yakisdinin dini balna yamwi diana dai kidika tingnina yakat duwi, bahang laniwana kidika laih yulni balna ulna dai: “Kat man dalani talaman kidika laih ban kaput bahang”, kaput Devid karak unbabauna dai. Dawak sumalyang balna kidika laih muhnit yakat trumpit pupuhna, dawak Israel muihni balna kidika bitik laih yaklauna bangdai.

⁷Salomón yaklauwi Dawan ūni muhnit papus kau watak pakkidika bik Papang dini yakna dai, kidika yakat sakripais karauni kauna busna dai, dawak Papang karak watwi yamnin kalahnin yulni di sala buswa kidika bik busna, kat witing sakripais busnin pāni as bras kau yamna kidika yakat bitik sip laihwas dai bahang, minitdis kalnin dini plawar minik, dawak salani kidika bik.

⁸Kidika yakat, Salomón dawak Israel muihni balna bitik, muih mahni palni Hamat kaupak kawi aina kidika Egipto wasni kat, witingna ū labanni pan tingni kau ilwi dawi kakawa alasnina[8] kidika yayamna.

⁹Kidika mani payahwak[9] alasna as nuhni kulna kidika yayamna dai, kat ma tiaskaubu praisni sakripais busnin pāni Papang dini yaknin yulni alasnina kidika yayamna dai bahang, dawak ma tiaskaubu ūk kidika, ū labanni pan tingni kau ilwi dawi kakawa alasnina yayamna dai bahang.

¹⁰Waiku tiaskaubu laihwak ma 23 yakat, king yaklauwi muih bitik yakat diawak ūni kau mahka uina, alasna isningnalak, Dawan yaklauwi Devid yakat, Salomón yakat, dawak Israel tawanni bitik yakat yamni diyamna kidika yulwi.

¹¹Salomón witing Dawan ūni kidika, king ūni, dawak di ūk bik yamnin kulna kidika balna bitik laih yamni manah yamna dai,

¹²pukta yakat, Dawan lāih kalahna kalyulna: “Man mamat yulna man balna kidika dakanayang, dawak adika pāni walyaktik dunayang sakripais yamna atnin ūni as.

¹³Kaput bahang, kalating ma buhni manah atnin kaiwarang, was lauwas karang, sisin balna yakat paktingkat di dahna balna kidika bitik daukakalwarang, kidika awaskat sihki yang tawanki minit yakat siknis as,

¹⁴dawa yang tawanki, tawan as yang ayangki duwa kidika, sau yakat bukwarang, minityulwarang, yawalwarang dawak dutni yamwa kidika dawarangkat, yang witing yulwa kidika dakaki kisang kidika kaupak, dutni yamna balna kidika dating diswarang, dawak witing sauni yakat baraknin lani kidika nawattik sihki.

¹⁵Warmani kaupak tanit yakat adika pāni akaupak minityulwarang kat dakaki,

¹⁶kat yang waltik yaknayang, dawak adika makat yulnin ūni yang diki yaknayang, yang ayangki kidika ban nining kaput sak-atnin. Ban maintala awaki, dawak minit bitik yakat kulnik sakkarang.

¹⁷Waralaih yamniki, man, yang muhki yakat yamni manah yamma kat, sihm man papangma Devid yamna dai kapat, yang ais yamnin yulnayang kidika bitik yamma yang lāki balna yakat laihta yamma kat,

¹⁸man king āwaman kidika yang lawik ban kaput tanit yakat kalating kiwarang, man papangma Devid kau pranimis yamnayang kaput, witing yakat kalyulnayang dai man sulama as dis awaskarang Israel tawanni yakat kabamint kana atnin.

¹⁹Kaunah, manna laih yang kaupak naikau alahwama kat, dawak lāki balna kat bik yamtas awama, dawak nawatkauh dawan dauh balna yakauh dini yamma kat,

²⁰yang madaktik yakna awaki sau manayang kidika kaupak, dawak makatyulnin ūni yang diki yaknayang kidika muhki kaupak naikau yakpamki, dawak yamting kat sarahni talnin yakat bukna karang minit bitik yakat, nisan balna bitik pasyakat.

²¹Adika makatyulnin ūni, alasna yaksihni dai kidika, daukalwi bahwi uhna as kalna karang,[10] dawak muih bitik kidika yaihnit munah bayayakwarang kidika taldas dini as kapat tatalwarang, dawak yulwi dakakawarang, amput dawak Dawan kidika aput yamnayah adika sauni akat, dawak adika makatyulnin ūni kidika bik.

²²Dawakat biriwi nangnitlalawarang, kat Dawan yakat ruhmwi dadana bahang, muihnina bararak balna Papangnina Egipto kaupak diyakna dai kidika, dawak dawan dauh balna yakauh dini yayamna bahang; kidika yulni laih witingna minitna yakat dutni nuhni bukna.”