Read Mayangna 2 Crónicas 8 Bible Online

2 Crónicas 8 - Mayangna bible

2 Crónicas 8

¹Kurih 20 bayakna dai, Salomón Dawan ūni dawi kingni ūni pakna kidika kaupak,

²kaput laih Hiram yaklauwi tawan nunuhni balna kalana dai kidika laihwi dulauwi yamna, bahang kidika yakat Israel balna kidika panina duduna bangdai.

³Kidika usnit, Soba kau Hamat kidika niningyakat kiwi kalbauwi dakyakwi duna.

⁴Kaput bik laih kauhmak wanilang kau Tadmor kidika bik laihwi dulauwi yamna, tawan nunuhni balna kau diminik balna puwa pāni bitik kau, bahang kidika laih Hamat sauni yakat pakna bangdai.

⁵Sihm kaput bik laih Bet-horón kidika kaupak tangyakauh, dawak parahyakau bik watwi laihwi dulauwi yamna dai, tawan nunuhni pararasni balna kidika, daklawi awaihna balna bitik, dūrni balna, dawak panan ayan balna bik yamna dai,

⁶dawak Baalat bik laihwi dulauwi yamna dai, kaput bik laih tawan nunuhni ūk balna diminik puwa pāni balna bitik, dawak ū pararasni balna kau kalbaunin kārni balna bangkidika bik, aras kau kilwi kalbauyang balna ūnina parasni kidika bik, Jerusalén yakat ais yamnin kulna dai kidika bitik, dawak Líbano yakat, dawak kaput bik laih witing tingni dinit yakat sau duwa kidika bitik yak.

⁷Dawak, hitita, amorreo, heveo, ferezeo dawak jebuseo balna bitik wawatna dai kidika, bahang kidika balna laih Israel muihni balna awasdai,

⁸yuldarang kat, witingna usnitna kauh sulanina balna Israel sauni yak wawatna kidika, dawak Israel balna bik sip bitik imukwas dadana dai kidika, Salomón yaklauwi wark pararasni yakat āna dai, bahang kaput laih warmani kat.

⁹Kaunah Israel balna laih as bik dipakwasdai taihwi yamnin balna warkni yakat, kaunah kalbauyang balna kapat laih āna dai, tatuna muihni, dawak kalbaunin kārni balna tanituna nuhni, aras kau kilwi kalbauyang balna tanituna bik.

¹⁰Wark minit talyang balna Salomón duwadai kidika laih 250 dai.

¹¹Salomón yaklauwi fero walanibis yal kidika Devid tawanni nuhni kaupak lapamna witing king ūni as yamwi kalana dai yakat, kat kulna witing yalni kidika sip-awaski Israel kingni Devid ūni yakat sak-atnin, kat Papang baksni kana pāni balna kidika laih Dawan dini kulna dai bahang.

¹²Salomón yaklauwi Dawan yakat sakripais karauni kauna buswadai, Dawan kau sakripais busnin pāni makat yulnin ūni dūrni kiwi kawa muhnit kau yamna dai yakat,

¹³sakripais busnin mani balna, Moses yaklauwi lā āna dai yakat, yuldarangkat yakurupdinin mani[11], yakat, waiku wisamni yakat alasna yamnin kidika, dai kurih as pasyakat alasna watbās yamnin kidika: plawar pupuhnin awas busna alasnina kidika, wīk balna alasnina kidika, dawak ū labanni minit yakat pan tingni kau ilwi dawi kakawa alasnina.

¹⁴Witing Papangni Devid yaklauwi mani balna āna dai kaput witing bik āna dai, sumalyang balna kidika warknina yayamwarang, dawak libait balna kidika Dawan ayangni nuhni yayamwarang, dawak sumalyang balna yakat ilp diayawarang, ma balna kaiwa bitik yakat ais yus yayamwarang kidika. Kaput bik laih dūr maintalyang balna dūr bitik yakat maintatalwarang kidika, kat Devid yaklauwi kaput yamnin pakna dai bahang, Papang alni kidika.

¹⁵Kaput laih, king Devid la āna dai kidika kaupak naikau kalalahwas dai, sumalyang balna, libait balna, dawak lalah maintalyang bik.

¹⁶Salomón witing di yamnin balna dai kidika bitik yamna, makatyulnin ūni rahni ukna dai kidika mani kaupak, yamwi yakna kat. Dawan ūni kidika bitik palni laih yamwi dana dai.

¹⁷Kaput laih Salomón witing kiuna dai Ezión-geber dawak kuma kungkau Elat yakat bik, Edom sauni kau yakat.

¹⁸Hiram witing kalbauyang balna taninatuna duwa kidika munah kuma kuring sihna dai, dawak muih ahal bik witing dini yamyang balna kidika, dawak kidika balna bik kuma yakat lik-atnin lan dai, dawak witingna kidika Salomón witing ahal kalbauyang balna taninatuna balna duwa kidika karak kalpakwi uina Ofir yakat, kaput laih kidika yakat witingna gol kidika kilo tausin 15 kanin manah duduna, dawak king Salomón yakat uiwi kalalana.