Read Mayangna 2 Crónicas 9 Bible Online

2 Crónicas 9 - Mayangna bible

2 Crónicas 9

¹Sabá kingni yal witing dakana Salomón ayangni nuhni dulauna kidika, bahang witing Jerusalén yakat kiuna yulwi dakanin dadasni balna kalyulwi dakana atnin. Witing kiuna kidika laih di yayamni yaksisihni manah awaihdak kiuna, kiamil balna kidika dia walapni satni balna kidika trukwi uina, gol dawak kipala minit nunuhni kidika mahni palni duwi kiuna dai. Witing Salomón nuhni yakat kiuna kat ais yulwi dakanin kulna kidika bitik kalyulwi dakana,

²dawak Salomón yaklauwi biriwi bitik nangnitlana. Yulwi dakana balna kidika as bik laih sip-awas awasdai nangnitlana atnin.

³Sabá kingni yal kidika talna Salomón sinsni nuhni kidika, dawak king ūni bik pakna kidika,

⁴tinibil yakat kasnin dini auhni balna lakna kidika, dawak kalbauyang balna taninatuna pāni kidika bik amput kidika, dini yamyang balna praknina kidika dawak tibil yakat wain utuhwi ilyang balna praknina bik dawak, amput makatyulnin ūni yakat kilwi kiwa dai kidika bik,[12] bahang kidika balna bitik witing niningyakat taldas dini talna

⁵bahang king yakat kalyulna: “Yang sauki yakat dakana yang dai kidika man sinsma nuhni dutaman yulni kidika laih rahm palni ki;

⁶kaunah yang kidika rahm kulnik sipdai, yang palni aiwik mikpa kau talikda bahang. Di rahm palni kidika laih man sinsma nuhni kidika papuswayah bik yāyuyulwasdai, kat yang dakana yang kidika minit yakat bayaknaman.

⁷¡Ampus isningnalakpa man yalma balna[13] kidika, dawak man dima yamyang balna kidika ampat isningnalak dakakawapa, kaput ban man yaihmat yakat sinsma lani nuhni kidika dakawi!

⁸¡Man Papangma Dawan kidika ayangni yamni kalyulna karang, man yakat yamni matalwi, witing tronni minityakat mailna, kingni atnam yulni! ¡Man Papangma dalani talwa kidika Israel, dawak parasni yamnin yulni, man kidika king mahana kidika minit yakat, man barangni la kat king awana atnam yulni!”

⁹Kidika usnit kat, yal kidika yaklauwi king yakat kalana gol manah paun 7,920, dawak kahnin walapni bik mahni dawak kipala minit nuhni balna kidika bik. Israel yakat laih wat as bik kiwi kawas dai kahnin dini walapni mahni kapat, Sabá kingni yal yaklau king Salomón yakat kalana kapat.

¹⁰Kidika minit yakat, Hiram dini yamyang balna dawak Salomón dini yamyang balna karak kalpakwi Ofir kaupak gol duwi aina dai, dawak kidika minit yakat sándalo panan, kipala minit nuhni bik duwi uina dai.

¹¹Sándalo panan yakau king yaklauwi Dawan kau makatyulnin ūni dawak king ūni kau ta kilitna balna kidika yamna dai, dawak kaput bik laih paswi yakisdinin dini balna bik yamna dai, unbauyang muihni balna kidika yus yamna atnin yulni. Judá sauni yakat kidika satni dini balna kidika watas bik tatalwasdai.

¹²Biriwi, king Salomón yaklauiwi Sabá kingni yal yakat kalana dai, witing ais dukih kalana kidika bitik, witing di duaiwi kalana dai kidika minit biriwi kalana dai kidika minit yakat.[14] Kidika usnit kat Sabá kingni yal kidika mahka witing sauni yakat nawatwi kiuna dai witing dini yamyang balna karak kalpakwi.

¹³Salomón kurih kaiwa bitik yakat gol duwadai kidika laih tausin 22 kilo dai,

¹⁴di wauhwi bakanyang balna dawak pa ūk kaupak aiwi bayayakwa kidika tunan minit lalauwa kidika balna laih bahawi kulwas dai. Kidika minit yakat Arabia kingni balna, kidika sauni kabamintni balna yaklauwi gol dawak lalah duahaiwi kalalawadai Salomón yakat.

¹⁵King Salomón yaklauwi pakna dai kalbauyang balna tanitna daknin dini nunuhni gol kau manah 200 yamna atnin, bahang nanitdaknin aslah yakat gol manah paun 12 āna dai.

¹⁶Kaput bik pakwakat tanit daknin dibinina kidika andat bās yayamna dai; bahang kidika aslah gol kilo bās minit yakau apis āna dai, dawak kidika dini balna laih king ūni “Líbano asangni pas” ta kidika watakni yakat lakna dai.

¹⁷Kaput bik pakwakat trun nuhni as yayamna dai, marfil kau, dawak dipakna gol kau manah kahna atnin minit yakat.

¹⁸Tronni kidika kilitna tiaskauas duwa dai, kilitna as kidika laih gol manah dai, dawak yalahnin sinini tingni taihnin dini balna kidika pirini nabupak duwa dai, kidika yaihnit yakat layan bu yaklauna raudai.

¹⁹Kaput bik layan ūk salap minitkau bu kidika balna bik bangdai yaklauna, ta kilitna tiaskauas kidika pirini nakaskau as as yaklalauna bangdai. ¡King sauni ūk balna yakat kapat as bik yayamwas dai!

²⁰Kidika minit yakat, king sūnitak balna kidika bitik laih gol manah dai, kaput bik king ūni ayangni “Líbano asangni pas” ta kidika paskau di yusyamwa balna kidika bitik laih gol manah dai. Lalah kau di yamna balna kidika laih as bik disdai, kat Salomón mani balna yakat lalah kidika minit nuhni kulwas dai bahang,

²¹kat, king kuringni nunuhni balna kidika Tarsis yakat uiwa dai Hiram dini yamyang ahalni balna kidika, kurih bās pasyakat wat as, bahang kidika yakaupak duahaiwadai, gol, lalah, marfil, urus dawi pikak balna bik.

²²King Salomón kidika sau bitik kingni balna minitna bayakna dai, ritsni dawak sins kidika bik.

²³Sau bitik kingni balna kidika witing yakat talkih diawadai, dawak Papang yaklauwi sinsni nuhni kalana kidika yulbauwak dakana atnin,

²⁴witingna bitik laih kurih kaiwa balna yakat minitdis kalanin dini as uiwi kalalawadai: lalah kau, gol kau di yamna balna kidika, kalmuknin asnina, kalbaunin dini, wasni walalapni balna, aras dawak muyul bik.

²⁵Salomón duwa dai aniras balna payayahwa pāni tausin arungka, witing aniras balna panina dawak kār balna bik, dawak aras kilyang balna kidika tausin , bahang kidika balna laih sihna dai kalbauyang balna ūnina pararasni yakat, dawak kalbauyang muihni balna king yaihnitkau duwasak kidika Jerusalén yakat, kidika balna yakat sihna dai.

²⁶Salomón laih parasni tanit duwa dai, Eufrates wasni kaupak filisteo balna saunina kat, kidika kaupak Egipto sauni kat, kidika sauni balna pasyakat king balna bangdai kidika bitik minitna yakat tanit parasni dai.

²⁷King yaklauwi yamna dai, Jerusalén yakat lalah manas atnin, sihm kipala kapat; kaput bik laih suhun kidika bik manas atnin sihm ani damni panan asangpas kau kapat.

²⁸Salomón aniras balna kidika Muzri[15] dawi sau ūk mahni kaupak bik duahaiwadai.

²⁹Salomón yulni umani balna kidika tatuna kaupak witni kat kidika, prapit Natán ulna wauhnitaya yakat ulna bangki, prapit Ahías, Silo kaupak dai kidika yulna balna yakat, dawak kaput bik prapit Iddo lāih yakwi yulna balna dai kidika walanbis al Jeroboam yulni.

³⁰Salomón witing king kana Jerusalén yakat, dawak baisa king kana kidika laih Israel minit yakat, kurih 40,

³¹witing dauwakat Papangni Devid sauni yakat nununa. Witing usnit yakat, walanibis al Roboam kidika king kana dai.