Read Mayangna Esdras 3 Bible Online

Esdras 3 - Mayangna bible

Esdras 3

¹Waiku tiaskaubu kidika kiwi kana kat, Israel balna kidika uman panina duduna dai, dawak muih balna kidika bitik Jerusalén yakat kalududuhna dai.

²Bahang Josadac walanibis al Josué dawak sumalyang balna karak kaltalyang yayamni, Salatiel walanibis Zorobabel kidika dawak wanaihni balna kauna, witingna sakripais busnin pāni Israel Papangni dini kidika yayamna dai, Papang dini yamyang Moses lani balna yakat sakripais karauni kauna busnin yulwa kaput yamna atnin yulni.

³Sakripais busnin pāni kidika yamni barangni yayamna dai, kat kidika sauni muihni balna yakat yamaninaduduwadai kidika yulni, dawak mapiris bitik yakat dawak ma ulah bitik yakat bik kidika minityakat sakripais karauni kauna kidika bubuswa dai Dawan risnipik yakat.

⁴Baisa kidika minit yakat dibasta balna lalakna kidika kasnin alasnina yayamna dai, la yakat amput ulna kat kaput, witingna niningh ma bitik yakat sakripais karauni kauna bubuswa dai kaput bubusna dai, ma as yakat ampus busnin kat kaput,

⁵baisa kidika minit yakat ma bitik yakat sakripais karauni kauna busnin balna kidika, waiku wisamni yakat, kasnin alasnina balna holi Dawan dini balna kidika yakat, dawak muih as yaklau witing silp kulnin lani Dawan yakat minitdis kalanin dini balna kalawa kidika kauna bubuswa dai.

⁶Waiku tiaskaubu kawakat ma tatuna kidika kaupak Dawan yakat sakripais karauni kauna buswi kalalana dai, baisa Dawan ūni kidika laihwi dulauwi yayamwas dai tanitkauh.

⁷Usnit kat simint kau ū yamyang balna dawak tat kau ū yamyang balna yakat lalah diayana dai, dawak kasnin dini balna, dinin dini balna dawak di sala bik diayana dai Tiro dawi Sidón muihni balna yakat bik, Líbano kaupak kuma wasni munah suhun tatni Jope kat duwi uina atnin yulni, Persia kingni, Ciro yaklau duwi uinin diyulna dai kaput.

⁸Salatiel walanibis Zorobabel dawak Josadac walanibis Josué, witing kaltalyang yayamni sumalyang balna kidika, libait muihni balna dawak pa ūk kau dilaihwi diduwi uina kat Jerusalén yakat nawatwi uina balna kidika karak kalpakwi, Papang ūni kidika laihwi dulauwi yayamna dai Jerusalén yakat kiwi kana kaupak kurih bu laihwakat waiku bu laihwa yakat, wark balna kidika laih libait muihni balna kurih 20 minitkauh duduwa balna kidika tingnina yakat dana dai.

⁹Josué walanibis balna, dawak wirahni balna karak aslah kalududuhna dai Cadmiel dawak walanibis balna karak, bahang kidika laih Judá sulani balna dai, dawakat Henadad sulani balna, walanibis balna, dawak wirahni balna kidika laih libait balna dai, kaput laih Papang ūni yakat wark yayamwa balna yakat taninatuna kana atnin yulni.

¹⁰Ū yamyang balna kidika Dawan ūni rahni balna kidika sau pasyakat ahana mani kat, sumalyang balna kidika laih praknina awi trumpit balna duwi kasakni yaklalauna dai. Asaf sulani libait muihni balna kidika laih wisnin plitni duwi uina dai Dawan yakat ayangni nuhni yamna atnin yulni, Israel kingni Devid yaklau yamnin yulna dai kaput.

¹¹Buas balna kidika laih unbabauwakat ūk balna kidika laih aput yuyulwa dai: “Dawan yakat tingkih lani kalatanauh, kat witing laih yamni dawak Israel yakat dalani lani duwa kidika bik ban kaput atnin bahang.” Dawak tawan muihni balna bitik laih alasna kalahwi sarahwi Dawan ayangni nuhni yayamwa dai, kat Dawan ūni yamnin kidika laih uman sarpapakna dai kidika yulni.

¹²Dawak libait muihni sumalyang balna dawak walaninabis balna taninatuna balna mahni palni witingna uman muihbarak kakalna dai kidika dawak bik witingna makat yulnin ūni tatuna tatalna dai kidika, parasni sarahwi kakaidana dai kat tatalwakat makat yulnin ūni wisam yayamwa dai kidika yulni. Sihm kidika yakat witingna kaupak mahni palni bik alasna duwi sararahna dai.

¹³Muih as bik sip amanglawas dai muih balna alasna duwi sararahwa kidika dawak kaidi sararahwa kidika karak, bang parasni sararahwa kidika naikau bik laih dai.