Read Mayangna Esdras 4 Bible Online

Esdras 4 - Mayangna bible

Esdras 4

¹Judá dawi Benjamín witingna niningnakauh yaklalauwa muihni balna kidika witingna Israel muihni balna dilaihwi pa ūk kau diduwi uina kidika nawatwi aina kat Israel Papangni Dawan ūni yamwabang kidika dakakana kat,

²Zorobabel, Josué[3] dawak walnaihnina balna taninatuna yakat uiwi ditatalna dai, dawak aput diyuyulna: —Yanadatang kat makat yulnin ūni yamnin kidika yakat tingmanasut laihtanakuh, yangna bik sihm manna kapat, manna Papangmana kidika walna yangna dawak Asiria kingni Esar-hadón mani balna kaupak sakripais yamtik kalatayangna dai adika pani akat yanaduaina akat.

³Kaunah Zorobabel, Josué dawak Israel muihni walaninabis balna taninatuna balna kidika yaklau nangnitnalalana: —Yangna sip awasyangna manna karak kalpaktik Papangkina ūni kidika yamna atnikna. Israel Papangni Dawan ūni kidika laih yangna manah yamnikna ki, Persia kingni, Ciro yaklau kaput yamnin yanayulna bahang.

⁴Bahang kidika sauni muihni balna laih Judá muihni balna yakat kulninna lalakna dai makat yulnin ūni kidika yamninna awas yulni.

⁵Baisa kidika minityakat kabamint dini yamyang balna buas yakat dinina mamalna dai, adika muihni balna laih Israel muihni balna yul yuyulwa kidika niningnakauh yaklalauna dai Persia kingni Ciro king kana dai kidika mani balna bitik yakat, dawak Persia kingni Darío king kana kat.

⁶Asuero king kana kurihni tatuna balna yakat, Judá dawi Jerusalén muihni balna niningna yakat yaklauwi yulnina yayakna dai.

⁷Dawak Persia kingni Artajerjes mani balna yakat, Bislam, Mitrídates, Tabeel dawak witingna kaltalyang yayamni ūk ūk duduwa dai kidika balna karak kalpakwi Artajerjes yakat wauhtaya kaluhulna dai. Wauhtaya uhulna kidika laih arameo yulni kau[4] ulwi wirlalana dai.

⁸Kalbauyang balna taninatuna Rehum, dawak wauhtaya ulwa muihni Simsai, kidika karak kalpakwi king Artajerjes yakat wauhtaya as kaluhulna dai Jerusalén muihni balna niningna yakat.

⁹Adika wauhnitaya ulwi kalsisihna dai, kalbauyang muihni balna taninatuna Rehum yakat, wauhtaya ulyang muihni Simsai, wihta balna, tunan muihni nunuhni balna kidika Persia kabamintni dini yamyang balna, Erec, Babilonia, Susa, yuldarangkat Elam, dawak Asnapar yaklau nisan ūk ūk balna laihwi Samaria tawanni nunuhni yakat duwi kiuna dai kidika, dawak Éufrates wasni kaupak ma kawa niningkauh sau sahyakna balna yakat didukiwi dana balna dai kidika kauna: “King Artajerjes, Éufrates wasni ma kawa niningkauh sau sahyakna balna kidika kau man dima yamyang balna kidika kaupak masisihwi:

¹²“King, man yakat mayultayangna ju muihni balna man kaupak yangna akat aiwi, Jerusalén tawanni nuhni dutni daukalna dai kidika laihwi dulauwi yamwabang ki. Dawak daklana balna, sau paskau āna balna kidika laih uman dulauwi yayamna.

¹³Dawak di ūk kidika bik king man yakat mayultayangna adika tawanni nuhni adika laihwi dulauwi yamwi dawak daklana kidika bik dulalauwarang kat, kidika muihni balna laih tunan minit launin kidika yuyulwas karangki, bahang kidika karak laih king lalahni kidika dauh diswarang ki.

¹⁴Dawak yangna laih king man dima yamtayangna bahang,[5] sip datiningkat king man yakat kaput dutni mayayamwas karangki. Kidika yulni king man yakat adika yulni masihtayangna,

¹⁵king man muihmabararak balna wauhninataya yakat walta talna atnam yulni. Kidika yakat kaput yulwarang kat, king man amanglama adika tawanni nuhni laih dutni dawak yamadangni kidika king balna dawak sau sahyakna ūk balna niningna yakat bik, dawak uman ma ūk balna yakat adika pāni akat muih dudutni balna kalududuhna dai, bahang kidika yulni laih daukalmukna dai.

¹⁶Kaput bahang king man yakat mayuldi adika tawanni nuhni adika laihwi dulauwi yamwi dawak daklana balna kidika bik dulauwi yamwi yakwarang kat, king man laih Éufrates wasni kaupak ma kawa niningkauh sau sahyakna kidika minit yakat parasma diskarang ki.”

¹⁷Bahang king Artajerjes yaklau biriwi adika yulni disihna dai: “Kalbauyang muihni balna taninatuna Rehum yakat, wauhtaya ulyang muihni Simsai yakat, dawak Samaria yakat kaltalyang muihni balna yayamni duwa yakat dawak Éufrates wasni kaupak ma kawa niningkauh sau sahyakna balna yakat bik: parastanauh. “Kidika niningkauh laih

¹⁸manna lawa wauhtaya yasihnamana kidika, dawak yulni balna wirlana kidika laih yang muhki yakat yulwi talna,

¹⁹bahang walwi talna atnin paknayang dai. Dawak yayakna, rahm palni laih, tatuna kau tawanni nuhni akat king balna niningna yakat yaklalauna dai, dawak bik kidika tawanni nuhni kidika yakat muih dudutni balna kidika kalududuhna dai,

²⁰dawak Jerusalén yakat king balna pararasni bangdai kidika yaklau Éufrates kaupak ma kawa niningkauh sau sahyakna kidika witingna tingnina dinit yakat duduwa dai, bahang witingna yakat tunan minit kidika dawak muih rahmni minit kidika bik lalauwa dai.

²¹Kaput bahang, kidika ahalni balna yakat diyultanang kat wark balna kidika laihwawatwang, dawak yang lawik mampat mani yamnin yulki kat, tawan nuhni kidika laih laihwi dulauwi yamnin awaski.

²²Adika yulni manna damatnakahnin awaski, di dudutni balna kidika mahwi kidika sauni yakat daukalnin awas yulni.”

²³King Artajerjes wauhtaya ulna kidika Rehum, wauhtaya ulyang Simsai, dawak witing karak kaltalyang yayamni balna kidika bik muhnina yakat yulwi talna mani kat, kidika minitni yakat witingna bitik Jerusalén yakat uina dai, dawak ju muihni balna yakat ditaihwi diyayamna dai wark balna kidika laihwatna atninna yulni.

²⁴Aput laih Jerusalén yakat Papang ūni yamnin dai kidika laihwatna dai Persia kingni Darío king kana kurih bu laihwak kat.