Read Mayangna Esdras 6 Bible Online

Esdras 6 - Mayangna bible

Esdras 6

¹Bahang king Darío yaklau walnin pakna dai Babilonia kau di minit nunuhni balna uhulna wauhnitaya balna bangdai yakat;

²dawak Ecbatana ūni nuhni Media sauni sahyakna kau sakkidika yakat wauhtaya nuhni as yakna kidika yakat adika yulni ulna dai:

³“Ciro king kana kurihni tatuna yakat adika lani ulna dai: ‘Jerusalén yakat Papang ūni kidika yulni: Ū rahni balna sau paskau kawa kidika sau pasyakat awi ū kidika laihwi dulauwi yayamwang, kidika yakat sakripais yamna atninna yulni. Maluihni niningkauh kidika metro 27 duwa atnin ki dawak pirihta niningkauh kidika bik sihm metro 27 duwa atnin ki;

⁴Baisa kidika minit yakat, kipala nunuhni kau lakwi parna kidika bas dawak tat wisamni kau lakwi parna kidika laih as. Di balna bakannin kidika laih king lalahni kau bakanna karang.

⁵Papang ūni dini balna gol dawak lalah kau yamna kat Nabuconodosor yaklau Jerusalén kau makat yulni ūni kidika kaupak yakwi Babilonia yakat duwi kiuna kidika laih, nawatwi Jerusalén yakat duwi uiwi witing pāni yakat lalakwang, Papang ūni yakat.’ ”

⁶Bahang king Darío yaklau adika lani diana Éufrates wasni kaupak ma kawa niningkauh sau sahyakna kabamintni kayang Tatnai yakat, Setar-boznai yakat dawak witingna karak kaltalyang yayamni balna kidika yakat dawak kidika sauni sahyakna kabamintni dini yamyang balna yakat bik: “Jerusalén kaupak alah'yawanauh

⁷dawak datanangkat ju balna kabamintnina kayang kidika dawak tunan duyang balna kauna kalpakwi Papang ūni kidika pāni yakat laihwi dulauwi yayamwang.

⁸Adika balna ki yang lawik yamnin yultayang kidika laih Ju muihni tunan duyang balna yakat, Papang ūni kidika yamna atninna yulni: Éufrates wasni kaupak ma kawa niningkauh sau sahyakna kidika kaupak king ūni lalahni baksni yakat tunan minit lalahni kalalawa kidika kau wark muihni balna yakat lauwi diayawang wark balna kidika laihwatnin awas yulni.

⁹Dawak ma balna bitik yakat Jerusalén sumalniyang balna yakat diyuyulwang witingna ais dukih diawa kidika, turuh ahalmuk wawahma, sīp ahalmuk kidik awaskat sīp kurih as duduwa balna kidika karangpa kisang kau Papang sakyakat sakripais yamwi kalana atnin yulni; kidik awaskat plawar minik, kuma, wain kidik awaskat di sala karangpa,

¹⁰kisang kau Papang sakyakat sakripais yayamni yamwi kalana atninna dawak king sangnika dawak walaninabis balna yulnina bik kalni dinit bukna atninna yulni.

¹¹“Di ūk bik yamnin yultayang waiskat adika yamnin adika yamwas karangkat, witing ūni dinitkau pan rabutni nunuhni taihwa kidika dutwi kidika yakat mur'ilwi sitna karang;[6] dawak ūni kidika laih bukkiwi dutlawi mahilna karang.

¹²¡Dawak Papang yaklau Jerusalén kidika wal'yakwi yakwi witing ayangni pāni duna kidika, witing yaklau daukalwarang angdika kingni kidik awaskat angdika ninisan yaklau Jerusalén kau Dawan ūni sakyakat daukalnin kulwarang kidika! Yang king Darío yang adika lawik adika yamnin yultayang. Amput ulna kat kaput yamtah.”

¹³Bahang Éufrates wasni kaupak ma kawa niningkauh sau sahyakna kabamintni kayang Tatnai kidika, Setar-boznai dawak witingna karak kaltalyang yayamni balna kidika kauna, witingna king Darío la ana kidika kaput yayamna dai.

¹⁴Kaput laih ju muihni tunan duyang balna kidika makat yulnin ūni warkni balna kidika tanitna yakat duwi uina dai, prapit balna Hageo dawak Ido walanibis Zacarías witingna amput yuyulna dai kat kaput. Dawak makat yulnin ūni kidika laih Israel Papangni dawak Persia kingni balna Ciro, Darío dawak Artajerjes witingna amput yamnin yuyulna kat kaput yamwi yayakna dai.

¹⁵Makat yulnin ūni kidika laih Adar wainiku ma bas yakat yamwi yayakna dai, Persia kingni Darío king kana kurih tiaskauas laihwa yakat.

¹⁶Israel muihni balna, sumalyang balna, libait balna dawak muih ūk ūk balna pa ūk kau laihwi duwi uina kat bangdai kidika kauna, witingna Papang ūni kidika kasnin alasnina karuk yamwi Papang tingni yakat ahana dai.

¹⁷Kidika mani yakat turuh ahalmuk wawahma 100, sīp ahalmuk 200 dawak sīp kurih as laihna kidika 400 sakripais yayamna dai, dawak baisa kidika minit yakat kuts ahalmuk 12 sakripais yayamna dai Israel sulani balna kat kat as as, kidika dini balna laih minit dis dini kalalana dai Israel muihni balna bitik dutnina yulni.

¹⁸Usnit kat sumalyang balna dawak libait muihni balna kidika witingna warknina kat kat diayana dai, Jerusalén yakat Papang prinias yamna atnin yulni, Moses wauhnitaya yakat ulna kaput.

¹⁹Baisa kidika minit yakat pa ūk kau laihwi duwi uiwakat nawatwi aina balna kidika kulnin aslah lani alasnina yayamna dai waiku tatuna kawak ma 14 laihwayakat.

²⁰Sumalyang balna dawakat libait muihni balna witingna uman maisihni dis kalalahna dai, kaput bahang witingna bitik palni maisihni dis bangdai. Bahang pa ūk kau laihwi duwi uina muihni balna, sumalyang balna dawak witingna yulnina kauna kulnin aslah lani sakripais kidika yayamna dai.

²¹Israel muihni balna bitik laihwi pa ūk kau duwi uina dai kidika balna dawak nisan balna Papang yakat kukulwas balna kidika kaupak dakwi kalalahna kidika karak kalpakwi kulnin aslah lani kasnin alasnina yakat kakasna dai dawak witingna laih Dawan Israel Papangni prinias yamnin yakat kalududuhna dai.

²²Ma tiaskaubu pasyakat plawar pupuhnin dini dis busna kasnin alasnina kidika yayamna dai, bahang Dawan yaklau alasna diyamna dai Persia kingni[7] yaklau yamni ditalwi ilp diawakat Israel Papangni ūni kidika laihwi dulauwi yamna atnin yulni.