Read Mayangna Esdras 7 Bible Online

Esdras 7 - Mayangna bible

Esdras 7

¹Persia kingni Artajerjes king kana mani balna bayakna yakat, muih al as sakdai ayangni laih Esdras; Seraías, Azarías, Hilcías,

²Salum, Sadoc, Ahitob,

³Amarías, Azarías, Meraiot,

⁴Zeraías, Uzi, Buqui,

⁵Abisúa, Finees, Eleazar dawak sumalyang tatuna Aarón kidika balna witingna wanaihnina sulanina palni dai.

⁶Esdras laih sumalwi lan yamna muihni as dai Israel Papangni Dawan yaklau Moses munah la kalana dai kidika yakat, dawak Dawan yaklau ilp kalawa dai, bahang kaput laih witing ais yulna kidika bitik kalana dai king Artajerjes yaklau. Kaput laih Esdras witing Babilonia kaupak nawatwi

⁷Jerusalén yakat kiuna dai Israel muihni sumalyang, libait, unbauyang, dūr maintalyang dawak makatyulnin ūni yakat wark yamyang balna kidika karak kalpakwi, Artajerjes king kana kaupak kurih tiaskaubu laihwa yakat.

⁸Esdras witing Papang dalani lani duwa kidika karak Babilonia kaupak nawatwi kiuna dai Artajerjes king kana kaupak kurih tiaskaubu laihwakat waiku tatuna kawakat ma tatuna yakat, dawak Jerusalén yakat kiwi kana dai sihm kidika kurihni waiku singka laihwakat ma tatuna yakat.

¹⁰Dawak Esdras laih barangni kulna dai Dawan lani kidika laihwi yamna atnin dawak bik witing lani balna kidika Israel muihni balna yakat niningna kana atnin.

¹¹Adika wauhnitaya ulna[8] adika king Artajerjes yaklau sumalyang as Dawan lāni balna Israel yakat kalawakat sumalwi lan yamna muihni Esdras yakat kalana dai:

¹²“King Artajerjes yaklau sumalyang as Papang kisang kau sakkidika lāni yakat sumalwi lan yamna muihni, Esdras yakat kalparaswi.[9]

¹³“Yang lawik yamnin yulnayang Israel muihni balna yang sauki yakat bangkauna Jerusalén yakat man karak mawang atwarang kat, uininna sipki, kidika minityakat libait muihni kidik awaskat sumalyang karang bik uinin sipki.

¹⁴Kat king witing yaihnit kau yul sumalyang muihni balna tiaskaubu duwa kidika balna karak kalpakwi masisihwi Judá dawi Jerusalén yakat amput yalalahwa kidika lakta talna atnam, man Papangma lani tingma yakat dutaman kidika kau.

¹⁵King witing yaihnitkau yul sumalyang balna duwa kidika karak kalpakwi witingna silp kulninna lani Israel Papangni Jerusalén kau yalahwa kidika yakat lalah dawak gol kalalawa kidika duta yawah,

¹⁶dawak Babilonia sauni sahyakna bitik yakat lalah dawak gol yakma kidika dawak baisa kidika minityakat tawan muihni balna dawi sumalyang balna kauna witingna silp kulninna lani Jerusalén kau Papang ūni yamnin kidika yulni lalah dawak gol mamawarang kidika bik duta yawama.

¹⁷Kidika lalahni kau turuh ahalmuk wawahma, sīp ahalmuk dawak sīp kurih as duduwa balna kidika bik bakanma, dawak minit dis kalanin dini plawar minik dawak wain bik bakanma, Jerusalén yakat Papangmana ūni kau sakripais busnin pāni minit yakat sakripais busna atnin yulni.

¹⁸Gol dawak lalah wawatwarang balna kidika laih, man dawak kaltalyang muihni yayamni dutaman kidika balna karak kalpakta yamtanama, angdika dini manna yamni talamana kidika, Papang kulnin lani kidika kaput.

¹⁹Kaunah Papangma ūni yakat, prias yakat dunin dini balna mamana kidika laih, man lawa Israel Papangni tingni yakat kalatah.

²⁰“Papangma ūni yakat di ūk kalanin kultaman kat, king dini balna puwa ūni kidika kaupak dunam sipki.

²¹Dawak yang, king Artajerjes, lawik yamnin yultayang, Éufrates kaupak ma kawa niningkauh lalah laihyang muihni balna bitik yakat, rahm palni manna sumalyang as Papang lani yakat sumalwi lan yamna muihni Esdras witing ais yulwarang kidika bitik kalatanauh,

²²lalah manah 3,300 kilos, plawar minik manah batal 22,000, wain batal kau puna manah 2,200, disala manah batal 2,200 dawak, kuma yulwarang kidika bitik kalatanama.

²³“Kisang kau Papang sakkidika witing ūni dini yulwarang kidika, sirihni palni kalana atninki, king walanibis balna dawak witing tingni dinit kau bangkidika minitna yakat bik wah sihnin awas yulni.

²⁴Manna amanglanamnaki sumalyang balna, libait muihni balna, unbauyang balna, dūr maintalyang balna dawak Papang ūni yakat wark yamyang balna yakat tunan minit daknin kidika laih sip awaski.

²⁵“Esdras man namangkauh laih, Papangma yaklau sins lani balna mana kidika karak, wihta balna dawak kabamint balna ātang kat Éufrates wasni kaupak ma kawa niningkauh sau sahyakna muihni balna yakat la kat kidika yayamwang, yuldarang kat man Papangma lani amanglalawa muihni balna yakat; dawak amanglalawas muihni balna yakat laih, man lawa niningnakatah.

²⁶Dawak angdika muihni man Papangma lani kidika dawak king lani balna kidika laihwi yamwas karang kat, kidika minitni yakat daunin tingni yakat ana karang, laihwi pa ūk kau duwi kiuna karang, dutni yamna kidika minit launa karang kidik awaskat silak yakat bukna karang.”

²⁷Bahang Esdras minit yulna: “Mayang mamuihkibararak balna Papangnina Dawan kidika laih ayangni nuhni yamna ki, kat king yakat kalyamwakat Jerusalén kau Dawan ūni yakat ayangni tanit nuhni yamna,

²⁸bahang witing dalani lani duwa kidika laih king dawak yaihnit kau yul sumalyang balna duwa kidika dawak la balna yamnin paskau tanit nunuhni dikulna ahalni balna niningna yakat nikingkana, dawak witing yaklau kulninna dulauwi yana, bahang witing ilpni karak Israel muihni balna tanit nunuhni dikulna kidika uduhnayang dai yang karak nawatwi uina atninna.”