Read Mayangna Nehemías 1 Bible Online

Nehemías 1 - Mayangna bible

Nehemías 1

¹Adika kuduh Nehemías yulni umani balna, Hacalías walanibis dai kidika. Artajerjes king kana, Quisleu wainiku, kurih 20 dai yakat, dawak wingnuh dawak batahndana wainiku yakat yang Nehemías, Susa tawanni yakat sakyang dai,

²dawak wirahki Hanani, witing Judá kaupak ahal buas karak kalpakwi uina dai. Kaput laih yang kalyultik dakanayang Jerusalén yulni, dawak Judá muihni balna laihwi dudimawang atwak kiri yaklalana balna yulnina bik kalyultik dakanayang dai.

³Dawak nangkitlana: “Laihdi dumawang atwak kiri yaklalana balna dai kidika laih, sihm kidika sauni yakat wawatna, bahang witingna laih dutni palni bangki, dawak bik asalniki. Kaput bik Jerusalén daklana balna dai kidika, dawak dūrni balna laih kuh busna.”

⁴Adika yulni balna dakik yalahtik aidanayang, kaput bik ma as as kulnik bukna dai, dawak di kastas mikityulnayang, Papang makau kisang yak sakyakat.

⁵Dawak kalyulnayang aput: “Dawan, makau kisang kidika Papangni, Papang yamadangni dawak yamadangni, man pramamis yakat laihta dutaman, dawak bik barangniman kidika, dalani matatalwa balna, dawak lāma kat yayamwa balna yakat;

⁶bahang waradika, kalma dinit yakat buktik yultayang, pukta madah, man warauma Israel balna yulnina, bahang daka yamtah. Wattik amanglatayangna, Israel yangna adika dutni yamnayangna, man namangyakat; ¡yang, dawak wanaihki balna kat bik dutni yamnayangna!

⁷Man namangyakat tanit dutni kidika yakat bik yawanayangna; man yamnin yulnaman dai yakat yamtasyangna dai, dawak man lāma mayanaman, dimayamyang Moisés munah dai kidika bik.

⁸Watta ismangkatta, kalyulnaman dai, yangna dutni yamtanaki kat man lawa yanaruhnin yulnaman dai, sau bitik yakat;

⁹kauna yangna wattik man yakat nawattik aiwik man yamnin yulnaman yakat yamtik praktis alahwanaki kat, sau bangni pakpuk balna bitik yakat yanaruhna kaupak watta yanauduhta yanaduyawama holi pāni as man ayangma kau yakta dunaman dai kidika.

¹⁰“Yangna kuduh man dimayamyang yangna, dawak bik man tawanma yangna, bahang man lawa parasma nuhni kau yanalaihta yaknaman.

¹¹Dawan kalma dinit yakat buktik yultayang, yang mikit yultayang adika dakah, dawak man dima yamyang balna kalma dinit yakat bukwi yuyulwa kidika bik, dukih kalawa kidika laih man ayangma nuhni yamnin kamanah ki. Mayultayang, yamni kamanah yatah, dawak kalatang sahmuhwang yang niking yakat, king, yangkau yamni yatalnin kidika.”