Read Mayangna Nehemías 3 Bible Online

Nehemías 3 - Mayangna bible

Nehemías 3

¹Kaput laih sumalyang nuhni Eliasib, dawak witing wanaihni sumalyang ūk balna karak kalpakwi yayamna, sīp balna dūrnina kidika. Pan rabutni nunuhni kidika ahana,[1] dawak dūrni kidika ahana, kaput bik laih daklana balna kidika, makau kilwi talnin Andat kaupak, makau kilwi talnin pāni Hananeel kat kidika witingna yayamna dai.

²Dawak daklana pis kidika laih Jericó muihni balna yayamna dai; kidika kaupak tanityakat laih Imri walanibis Zacur yaklauwi yamna dai.

³Senaa sulani balna laih, waspa dini dūrni kidika yayamna dai. Pan rabutni nunuhni kidika ahana, dawak dūrni kidika kiniting putnin dini bik ahana dai.

⁴Kidika kaupak tanityakat laih Meremot yaklauwi yamna, bahang witing laih Urías walanibis dawak, kaput bik laih Cos mani dai; dawak kidika kaupak tanityakat laih Mesulam yamna dai, Berequías walanibis dawak Mesezabeel mani dai; dawak tanit yakat laih Sadoc yamna dai, Baana walanibis.

⁵Kidika kaupak tanityakat laih Tecoa muihni balna laihwi yayamna dai, muih buas taninatuna yakat tingnisut laihwas dadana dai kauna.

⁶Joiada, Paseah walanibis, dawak Mesulam, Besodías walanibis, bahang witingna yaklauwi Jesana dūrni kidika yayamna dai. Pan rabutni nunuhni awi dawi, dūrni bik lāk ānin dini bik ahana dai.

⁷Kidika kaupak tanityakat laih, Melatías, Gabaón kaupak kidika, dawak Jadón Meronot kaupak kidika, kaput bik Gabaón muihni balna, dawak Mizpa muihni balna karak kalpakwi yayamna, bahang kidika pāni laih kabamint tanituna muihni balna tingnina dinit yakat dai, makawa niningkauh éufrates wasni kidika yakat.

⁸Kidika kaupak yamwi kiuna kidika laih Harhaía walanibis Uziel yamna dai, lalah kidika awaskat gol kau di yamwa dai kidika, dawak kidika kaupak tanityakat yamwi kiuna kidika laih Hananías, di walapni yamyang dai kidika yamna dai. Witingna bu kidika, Jerusalén daklana dai kidika watwi laihwi dulauwi yayamna dai, daklana panuhni kat yamwi duwi uina dai.

⁹Kidika kaupak tanityakat laih Hur walanibis Refaías yamna dai, bahang witing laih Jerusalén sauni papusdak kidika yakat tunan dai.

¹⁰Kidika kaupak tanityakat laih Harumaf walanibis Jedaías yamna dai, bahang kidika pīsni laih, witing ūni muhnitkat dai, dawak kidika kaupak tanityakat yamna kidika laih Hasabnías walanibis Hatus yamna dai.

¹¹Harim walanibis Malquías dawak, dawak Pahat-moab walanibis Hasub, witingna laih tanityakat yamwi uina dai, makau kilwi talnin pāni Hornos yakat yamwi wawatna dai.

¹²Kidika kaupak tanityakat laih Halohes walanibis Salum yamna dai, witing walanibis yayal balna karak, kat witing laih Jerusalén sauni papusdak ūk kidika yakat tunan kawa dai.

¹³Hanún dawak Zanoa muihni balna karak kalpakwi langnikau dūrni kidika yayamna, kaput laih yamwi dawi lākni bik ahana dai, kaput bik laih metro andat arungka minitkau papusbah naini kidika laihwi yayamwi duwi uina dai, bubuh ruruhmwa pāni kau dūrni yakat.

¹⁴Recab walanibis Malquías, witing laih Bet-haquerem sauni paskidika yakat kabamint muihni as dai, bahang bubuh ruruhmwa pāni kau dūrni kidika yamwi dawi lākni bitik āna dai.

¹⁵Colhoze walanibis Salum, witing laih Mizpa sauni kidika kabamintni dai, bahang witing laih was kalahwa dūrni kidika yamna, dawak minit yakat bik muknin kapat bik yamna dai, dawak dūrni putnin lākni bik āna dai, dawak bik Siloé kau daklana dai kidika bik laihwi dulauwi yamna dai, bahang kidika laih king witing wingnita puhwa pāni kidika yaihnit yakat dai; yamwi dukiuna kidika atakwi yaklalakwa dai kidika king Devid tawanni nuhni yakat yamwi kiwi watna dai.

¹⁶Azbuc walanibis Nehemías, Bet-sur kabamintni dai, kidika laih yamwi kiuna dai Devid sauni ū muhnitkat, kaput bik was mahwa pāni kat, kidika kaupak kalbauyang balna ūnina kat.

¹⁷Kidika kaupak tanityakat laih, libait balna yayamna dai: Bani walanibis Rehum, dawak tanityakat laih Hasabías, Keila sauni papusdak yakat kabamint dai kidika ayangni kau yamna dai.

¹⁸Kidika kaupak tanityakat laih witingna wanaihnina balna yayamna: Henadad walanibis Bavai, witing laih Keila sauni papustirh kidika yakat kabamint dai;

¹⁹dawak Josué walanibis Ezer, witing laih Mizpa kabamintni dai, bahang tanityakat daukalna balna kidika yamwi kiuna, sipintang kau kalbaunin dini balna pupuwa pāni yakat.

²⁰Kidika kaupak tanityakat laih, Zabai walanibis Baruc yamna dai, sipintang dai kidika kaupak Eliasib ūni dūrni kat; Eliasib laih sumalyang nuhni as dai;

²¹dawak Meremot Urías walanbis dawak Cos mani, witing laih kidika tanityakat yamwi kiuna dai, Eliasib ūni dūrni kaupak kiwi witna kat.

²²Kidika kaupak tanityakat laih sumalyang balna Jordán sauni langni kau yalalahwa balna dai kidika yayamna dai.

²³Kidika kaupak tanityakat laih Benjamín dawak Hasub karak yayamna dai, witingna ūnina muhnit kau yakat. Dawak witingna usnitna yakat Azarías Maasías walanibis dawak Hananías mani kidika yamna dai, witing ūni yaihnit kauyakat.

²⁴Kidika kaupak tanityakat yamna kidika laih Henadad walanibis Binuy yamna dai, Azarías ūni kaupak sipintangkat.

²⁵Kidika kaupak tanityakat laih, Uzai walanibis Palal, witing laihwi yamna dai daklana balna daukalna kidika, sipintang muhnikau dai yakat, dawak bik yamna kidika makau kilwi talnin tanit maluihni dai kidika, king ūni karak dawakat; bahang kidika laih kalbauyang balna ūnina watak yakat sakdai. Kidika kaupak tanityakat laih, Faros walanibis Pedaías yamna dai,

²⁶was dūrni muhnit tani yakat ma kilwa niningkauh, kaput bik laih makau kilwi talnin pāni naini kidika bik. (Ofel yakat yalahwa balna kidika laih makatyulnin ūni dini yamyang balna dai.)

²⁷Tecoa muihni balna kidika bik tanityakat yamwi uina dai, makau kilwi talwa pāni naini kidika kaupak, Ofel kau daklana yakat.

²⁸Sumalyang balna laih, witingna ūnina muhnitkau daklana balna kidika yamwi duwi uina dai, aras balna dūrnina kat.

²⁹Kidika kaupak, witingna yayamna tanityakat, yamwi kiuna kidika laih Imer walanibis Sadoc yamna dai, witing ūni muhnitkau yakat; kidika kaupak tanityakat laih, Secanías walanibis Semaías yaklauwi yamna dai, bahang witingna kidika laih makilwa niningkauh dūrni yakat maintalwa dai.

³⁰Kidika kaupak, witing usnit yakat yamwi uina dai kidika laih Selemías walanibis Hananías, dawak Hanún karak yayamna dai, bahang Hanún laih Salaf walanibis tiaskauas kidika witing dai; dawak kidika kaupak tanityakat laih Berequías walanibis Mesulam yamna dai, witing ūni muhnit kat.

³¹Lalah kau di yamyang muihni Malquías, witing yamwi kiuna dai tanityakat, makatyulnin ūni dawak, di bakanyang balna kat, kaput bik wark yayamwak lakwi talyang balna ūnina muhnitkat, dawak kaput bik sipintang kau maintalwa balna panina kat.

³²Lalah kau di yamyang balna, dawak di bakanyang balna kidika witingna yayamna dai, sipintang kau maintalnin pāni kidika kaupak sīp balna dūrnina yakat.