Read Mayangna Nehemías 4 Bible Online

Nehemías 4 - Mayangna bible

Nehemías 4

¹Daklana balna dai kidika wattik dulautik yamtiningkat, parasni anna Sanbalat dakawi, dawak mahka laih Ju muihni balna yakat sarahni yulna dai,

²dawak diyulna, wanaihni balna muhnina yakat, dawak Samaria ahalni kalbauyang balna yakat bik: “¿Ais kaldakakawih Ju balna yuh dauyang balna kidika? ¿Witingna kukulwakatpah watdi dādakat sakripais busna atnin? ¿Kidika awaskat warkni kidika ma aslah yamwi dadawarang? ¿Dawak bahwi uhna kidika kaupak di wisam as yayakwarang kukulwih, kipala busna balna kidika kaupak?”

³Yaihnit yakat sakdai Amón muihni as ayangni Tobías, dawak witingbik minit yakat lakwi aput yulna: “Talnauh daklana balna watwi yayamwa kidika: ¡Wassala yal as kidika minit yakat kilwarangkat, sipki bahwi sauyakat bukna atnin!”

⁴Kaput dawak, yang mikit yulnayang aput: “Mayang Mapapangki: dakah, aput sarahni yanayuyulwa kidika. Yamtangkat nikingnakauh yuyulwa kidika witingna minitna yakat kiwang, dawak waihla tingni yakat bukwang, kaput laih pa ūk yakat laihwi dukiuna karang.

⁵Witingna dutnina kidika datang disnin-awas ki, dawak man muhma tani kaupak bik yakwinih, kat tawan daklana balna dai kidika watwi laihwi dulauwi yayamwa muihni balna yakat uhusna bahang.”

⁶Kaput laih ban daklana balna kidika yamdi mawana, papusdak dulaunamayang dai. Muih balna kidika kulninna bitik wark kalalahna.

⁷Kauna Sanbalat, Tobías, árabes balna, Amón muihni balna, dawak Asdod muihni balna, witingna dakakawak, Jerusalén daklana balna kidika ban yamtik yawiningkat, sulihni balna kidika mahka puttiningkat parasni kulninna daukakalna,

⁸witingna aslah kalpapakna, Jerusalén niningnayakat kalbauna atnin, kaput yamwi witingna watwi daukalpamna atnin.

⁹Kaput dawak Papangkina yakat mikitna yulnayangna, dawak maintalnin ānayangna pukta madah, kidika laih nakitna dakna atnin witingna niningnayakat.

¹⁰Judá muihni balna kidika yuyulwa dai: “Trukyang balna kidika parasninadis sangka dadauwi, kat bahwi uhna balna kidika mahni palni bahang, mayang laih sip-awas mayang daklana adika watwi laihwi dulauwi yamna atnin.”

¹¹Yangna waihkinala balna kidika kukulna dai, yangna amanglatas awanaki, dawak bik yangna di talas awanaki, kaput laih bilkinalalauwi yanaihiwak wark balna kidika laihwatna atnin.

¹²Kauna Ju muihni balna witingna yaihnitna yakat yalalahna balna kidika wat wat aiwi yanayuyulna, kidika muihni balna aiwi nikingna kauh kalbabauwarang ki,

¹³dawak paknayang, muih balna kidika kalwanaih balna manah kalpakwi daklana piningyakat kana atnin sau nining yakat, daklana sulihni yakat duwi kana atnin, isparah langsa, sibang.

¹⁴Talingkat yamaduduwak, lawik yulnayang muih nunuhni balna yakat, kabamint muihni balna yakat, kaput bik tawan muihni balna bitik yakat: “Yamaniduduwinih, ismangna-aitanauh, Dawan laih nuhni ki, dawak bik yamadangni ki, wanaihmana balna yulnina kalbautanauh, walamanabis ahal, yayal, yalmana balna dawak ūmana balna yulni kalbautanauh.”

¹⁵Yangna waihkinala balna kidika dakakana, yangna ridi alahwanayangna kalbauna atnin, dawak Papang yaklauwi witingna warknina kidika dauh yamna, kaput dawak wattik pakina, pakina yawanayangna, daklana balna kidika yamna atnin.

¹⁶Kidika kaupak wark kalahyang ahal balna papuswayah kidika wark yayamwa dai, dawak papuswayah ūk kidika laih kalbaunin dini langsa, nanitna daknin dini, sibang, las, kalbaunin prakni duwi maintatalwa dai. Tunan muihni balna kidika Judá muihni balna yakat kasak ilp diayawa dai,

¹⁷daklana yamwa bangkidika yakat. Di trukyang balna kidika ban trurukna, kauna tingnina as wark yayamna, dawak tingnina ūk kidika laih kalbaunin dini kidika duduwa dai.

¹⁸Dawak wark muihni balna kidika bitik baninamak yakat isparah sisitna dai, dawak yaihkit yakat laih trumpit puhyang kidika sakdai,

¹⁹kat yang lawik diyulnayang dai muih nunuhni balna yakat, kabamint muihni balna yakat, dawak tawan muihni balna yakat “Wark kidika laih nuhni palni ki, bahang mayanglaih sahdi malahwana ki daklana kidika yakat, naikau, naikau.

²⁰Kaput bahang trumpit puhwak dakanamakat, aiwa kaluduhtanama yangna karak, dawak mayang Mapapangki kidika kalbauna karang mayaihkit yakat.”

²¹Kaput laih yangna mapiris kaupak masan kat wark alahwining kat muih papuswayah balna kidika witingna tingnina yakat langsa duwi maintatalwa dai.

²²Baisa minit yakat kidika mani, muih balna yakat diyulnayang dai, muih bitik laih payahna atnin Jerusalén pasyakat, kaput laih pukta yakat matakit dakna atnin, dawak madah yakat laih wark kalahna atnin.

²³Baisa minit yakat, yang wanaihki balna, dawakat tingkisut lalaihwa muihni balna, kaput bik maintalyang muihni balna yaihkit yakat bangdai kidika bik, yangna parakkina yaktas yangna dai dawak yangna bitik laih tingnina yakat langsa duduwadai.[2]