Read Mayangna Nehemías 5 Bible Online

Nehemías 5 - Mayangna bible

Nehemías 5

¹Kidika mani balna yakat, tawan muihni balna kidika yulwi ahanna, dawak yalnina balna kidika Ju yayal aslah balna niningnayakat dai,

²buas laih yuyulwadai walabis ahal dawak walabis yayalbik mahni duduwi bahang dukih mayawi plawar minik walnin, yuhdaunin-awas yulni;

³ūk balna laih yuyulwi kasnin dini dis kidika yulni witingna saunina, ūnina dawak wainnina yamak kidika di wiririhna, usnit kat watwi minitlauwi dunin,

⁴dawak ūk balna laih yuyulna, witingna lalah wayaki yulwi duduna, di tunan minit launa atnin yulni king yakat, kidika yulni laih saunina dawak wainnina yamak kidika lalah dawan yakat kalalana. Baisa minit yakat yuyulna:

⁵“Mayang mawanaihki balna kidika sihm mayang apat ki, kat á aslah dudabahang; mayang mawalakibis balna kidika satuk awaski witingna walaninabis balna karak. Kaput kauna mawalakibis ahal balna kidika, dawak yayal balna kidika warau lani yakat ādi. Uman mawalakibis yayal as as laih warau lani yakat ki, dawakat kidika yulni di asbik yamnin sip-awas mayang, kat mayang masauki dawak wain yamak balna kidika uman witingna tingnina yakat bahang.”

⁶Yang, witingna yuyulwa kidika dakanayang kat, dutni kulnayang.

⁷Yamni kultik talnayang usnit kat, muih nunuhni balna, dawak kabamint muihni balna yakat dibilnayang, truknin tikini diawa kidika yulni witingna aslah balna yakat. Uduhnin nuhni as yamnayang kidika yulni yulbauwi talna atnin yulni,

⁸dawak diyulnayang: “Mayang, angkat sip-mayang yakat mawanaihki balna kidika laihdi yaknamayang, sau ūk kau wauhwi bakanmumukna dai kidika kaupak; ¿dawak waradika manna watta wauhta bakantamanah, dawak yangna wattik laihtik yakna atnikna?” Witingna ap dadana, amanglalawas dai amput nangnitlanin kidika.

⁹Dawak baisa yang minit yakat yulnayang: “Yamtamana kidika yamni awaski. Mayang Mapapangki yakat nuhni kulnamnaki, kaput laih mawaihkila balna Papang kukulwas kidika sarahni maiyuyulwas karang.

¹⁰Yang wanaihki balna bik, tingkisut laihyang balna, dawak yang bik, witingna yakat lalah dawak plawar minik bik wayaki dianayangna bahang, ¡kidika trasni dādak diswarang!

¹¹Dawak kaput bik laih kalmana dinit yakat buktik yultayang, warminitni, saunina balna, wainnina yamak, olibnina yamak, dawak ūnina balna kidika watta diatanauh, dawak lauwi mananin dutamana kidika[3] bik datanang diswang, lalah karangpa, di minik karangpa, wain karangpa, kidika awaskat disala karangpa.”

¹²Witingna yuyulna: “Kidika bitik nawatdi diadarang, kaput bik di as bik diyuldas karang. Yamtanaki man amput yultada kidika bitik.” Kaput laih sumalyang balna kidika yulting aina, dawak paktingkat Papang ayangni kau yakwi witingna muhnina kat pramis yayamna, yuyulna kaput yamna atnin.

¹³Baisa minit yakat prakni isihtik yulnayang: “Aput Papang yaklauwi isihna karang ūnipas kaupak ahni yakat, di balna minit yakat bik, waiskat adika pranimis kat yamwas karang kidika, dawak kaput laih, waradika ais duwa balna kidika bitik dakyakna karang.” Muih balna bitik yulna: “Kaput karang”, dawak Dawan ayangni nuhni yayamna dai. Muih balna kidika praninamis kat yayamna,

¹⁴dawak kurih salap minitkau bu praisni, yuldarang kat, kidika mani kurih muihasluih yakat, king Artajerjes, yaklauwi Judá sauni yakat kabamint tunan yahana dai kaupak, witing king kana kurih muihasluih minitkau salap minitkau bu kat, yang kawak, kalpaktik wark alahwayang balna bik, kabamint muihni balna kapat kasnikna lalahni kidika dutasyangna dai.

¹⁵Kaput kauna, kabamint muihni balna tatuna kakana balna dai kidika laih tawan truknin as dai, ma bitik yakat, lalah muihasluih bu yayakna dai, kasninna dawak wain dininna minit kidika. Kaput bik kidika minit yakat wark kalahyang muihni balna kidika tawan yakat tataihwa dai. Kauna yang laih kaput yamtasyang dai, Papang risnipik kidika yulni.

¹⁶Dawak ūk yakat warkki kidika dahn yamnayang, tawan nuhni daklana dai kidika wattik yamnayang, dawak sau pis apis bik dutasyang dai. Dawak, yang karak wark kalalahwa balna bik adika warkni yayamna dai.

¹⁷Yang yalahtik dikastayang pāni yakat, muih andat as minitkau papusbah bik yalalahwa dai, Ju muihni balna, dawak kabamint muihni balna bik, kaput bik mayaihkitkau sau pis ūk muihni balna aiwi maitatalwa balna kidika laih kuldas dai.

¹⁸Dawak, yang silp ma bitik yakat ātayang kidika laih adika dai: turuh almuk as, sīp yayamni kidika tiaskauas, dawak di lawani balna duduwa kidika bik; kaput bik ma salap laihwa bitik yakat wain kidika manas palni dai. Kaput kauna kabamint muihni kapat, yang lalah dunik dai kidika di kasnik minit, yang yawik yultasyang dai, kat tawan truknin kidika uba minit bayakna dai bahang.

¹⁹¡Yang Papangki, kidika bitik yakulta, yang yamni atnik kidika yulni, adika tawanni yamni atnin yulni yamnayang balna bitik kidika!