Read Mayangna Nehemías 6 Bible Online

Nehemías 6 - Mayangna bible

Nehemías 6

¹Sanbalat, Tobías, Gesem árabe, dawak mawaihkila ūk balna kidika bik witingna dakakana, yang lawik daklana balna yamnayang kidika, kaput bik sulihni as bik datasyang dai kidika, (kauna baisa dūr kidika pāni yakat ātasyang dai),

²wauhtaya as yasisihna, Sanbalat dawak Gesem karak, Ono sauni langni kau tawan binina bangkidika yakat kaluduhna atnin. Kauna witingna yamnin kukulwa kidika laih dutni yāyamna atnin.

³Kaput laih yang lawik yul muryang as sihnayang diyulna atnin, yang wark as yamnin dutayang kat yamta sakyang kidika bahang yawinik sip-awaski, kat wark kidika laih watwarang bahang, datik yawik witingna yakat ditalki kat.

⁴Wat arungka yasisihna, sihm kidika yulni manah, dawak muhnilau ais diyulnayang dai kidika kaput manah diyulnayang dai.

⁵Kaput dawak Sanbalat, witing muhna alni as munah wat singka sihna dai, sihm yulni kidika, wauhtaya as kau ulwi kurahni sihna dai,

⁶bahang aput yulna dai wauhnitaya yakat: “Muih pasyakat yul as kalahwi, dawak Gesem bik yulwi, man dawak Ju muihni balna karak ridi alahwamana kalbauna atnin, kidika yulni daklana balna kidika watta yamtamana. Adika yulni balna kidika laih yuyulwi man kidika witingna kingnina āwama ki,

⁷dawak, uman prapit ānaman, king mahana atnin Jerusalén yakat, dawak yulna atnin Judá yakat uman king sakki. Adika yulni balna sipki king Artajerjes tapani yakat kiwi kana atnin, kaput bahang aiwang yulbaudanang.”

⁸Kaput laih yang lawik nangnitlatik sihnayang, bahang kalyulnayang, kidika yulni laih rahm awaski, kauna witingna kulwi lāwi yuyulwi.

⁹Witingna bilkilaunin yayamna, dawak kukulna makulnik sau yakat bukwarang, dawak wark kidika yamdas dādarang; kauna yang laih baisa yamnayang wark kidika.[4]

¹⁰Usnitkat, Delaía walanibis, Semaías ūni yakat yawanayang, witing laih Mehetabel mani dai, bahang witing kidika laih ūnipas yakat manah tusdai, ahni kalahwas, dawak yayulna: “Papang ūni yakat kaluduhdanang, maisihnidis pasyakat, dawak dūr putdanang, kat warpukta aiwi mainin kukulwi.”

¹¹Kauna yang lawik nangnitlanayang: “Muih ahal yang apapat kidika laih kikiras ki, dawak Papang ūni yakat bik kakawas ki sangnika laihwi yakna atnin yulni. Yang laih yawik āwas awaki ki.”

¹²Baisa minit yakat amanglanayang, witing yulwa balna kidika Papang kaupak kaiwas dai, yulwa balna kidika yang nikingkauh manah dai, kat Sanbalat dawi Tobías karak yaklauwi bakakanna dai bahang;

¹³minit kalawa dai, bilkilauna atnin yulni, kaput yayamwak yang dutni yamna atnik. Kaput laih sipdai ayangki dutni kalna atnin, dawak riskipik dis yamna atnin.

¹⁴¡Papangki: ismang-aitah, Sanbalat dawak Tobías karak yayamna kidika! ¡Dawak prapit yal Noadías yamna kidika bik damatkahwinih, prapit ūk balna bik bilkilaunin yayamna kidika!

¹⁵Daklana balna kidika yamwi dahn kalna dai Elul wainiku ma muihasluih minitkau singka yakat, wark yayamna kidika, ma andat papusbah minitkau bu pasyakat yayamna dai.

¹⁶Yangna waihkinala balna kidika dakakana, dawak yaihkitna kau sau pīsni ūk balna kidika bitik, dawak uba yamaduduna, kaput laih witingna manah kapat kaldakakawa dai kidika sau yakat bukna, kat witingna amanglalana adika warkni yamwi dahn kalna dai, yangna Papangkina yaklauwi tingkinasut laihwak.

¹⁷Kidika mani balna, Tobías dawak Judá kau muih nunuhni balna karak wauhtaya manas biri biri kalsisihna dai,

¹⁸kat Judá muihni balna manas laih Papang ayangni kau yakwi yuyulna dai Tobías kidika muih yamni rispik muihni ki, Secanías unisah bahang, dawak witing kidika Ara walanibis, dawak kaput bik witing walanibis Johanán kidika Mesulam walanibis yal karak kalduduna dai, dawak Mesulam laih Berequías walanibis dai.

¹⁹Kaput laih yang muhki tani yakat ayangki dulalauwa dai, dawak kalyuyulwa kidika bitik yang kat yayulwadai. Kaput laih Tobías yaklauwi laih wauhtaya yasihwadai bilkilauna atnin yulni.