Read Mayangna Nehemías 8 Bible Online

Nehemías 8 - Mayangna bible

Nehemías 8

¹Kaput laih muih bitik kalududuhna dai, was dūrni muhnitkau kalududuhwa pāni yakat, dawak maestro Esdras yakat kalyuyulna, Moisés lani wauhnitaya kidika duaina atnin, bahang kidika laih Dawan yaklauwi Israel yakat kalana dai.

²Waiku tiaskaubu laihna kat mani tatuna kidika yakat, sumalyang Esdras witing la wauhnitaya duaina dai, ahal, yayal kalududuhna bangkidika muhnina yakat, di amanglalawa balna bitik yakat,

³dawak mapiris kaupak, matunak kat, yulwi talna dai, witingna bitik muhnina yakat, was dūrni muhnitkau kaluduhnin pāni pakyakat. Muih bitik laih la wauhnitaya yulwi talwasak yakatmanah dakawa bangdai.

⁴Maestro Esdras kidika yaklauna sakdai kalni kau, kidika yulwi talnin pāni as tat kau maluih yayamna pakdai yakat. kaput bik witing yaihnit tingnipal niningyakat yaklauna bangdai, Matatías, Sema, Anías, Urías, Hilcías dawak Maasías. Kaput bik laih wadahni niningyakat yaklauna bangdai Pedaías, Misael, Malquías, Hasum, Hasbadana, Zacarías dawak Mesulam.

⁵Kaput, Esdras yaklauwi wauhtaya kidika apahna dai, muih bitik miniknapa tani yakat, kat talnin sipdai bahang, muih bitik minitna kau sakkidika; wauhnitaya kidika kurahwak muih balna bitik kalnina kau yaklalauna.

⁶Kaput laih Esdras witing Dawan parasni nuhni bitik duwa yakat ayangni nuhni yamwadai, dawak muih balna kidika bitik tingnina dulauwi yuyulwadai: “Kaput kawang, kaput kawang.” Usnit kat limbabahwi muhnina sau yakat lalakna dai, dawi Dawan ayangni nuhni yayamna dai.

⁷Libait muihni balna Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán dawak Pelaía, witingna balna kidika, tawan yakat, la balna tanka kidika lāih wirlawi diyuyulwa dai. Dawak muih balna kidika laih panina kat yaklauna bangdai,

⁸witingna kidika parasni yulwi-tatalwadai, Papang lani wauhnitaya kidika, dawak kaput bik laih, wirlawi lāih yakwi yuyulna, yulwi-talwa sakkidika, muih balna amanglana atnin yulni.

⁹Dawak, la balna kidika dakawi muih balna kidika bitik kakaida bahang, kabamint tunan muihni Nehemías, dawak maestro Esdras, dawak libait balna lāih tanka lāih wirlawi yulwa bangkidika balna bik diyuyulna kaidinin-awas, kat kidika mani laih Papangni Dawan yakat kulna mani bahang.

¹⁰Baisa kidika minit yakat Esdras yaklauwi diyulna: “Yawanauh, dawak di tanit yamni kidika kastanauh, kaput bik wain damni kidika ditanauh, dawak muih balna baisa kasnin dini yayamwas kidika yakat duyawa bayahtanauh, kat warmani adika laih maPapangki dini bahang. Kulnamna buknin awaski kat mayang laih Dawan alasnina yakat mamaldinin duda bahang.”

¹¹Libait muihni balna bik, muih balna yakat walanina-ahana dai, kaput bik diyuyulwak ap danin, baisa kaidinin-awas, kat kidika mani laih Dawan mani bahang.

¹²Kaput laih muih balna bitik uina dai, dikasna atnin, dawak kasninna dini kidika biri biri yuwi kasna atnin, kaput bik laih alasna nuhni yamna atnin, kat disumamalna kidika amanglalana dai bahang.

¹³Kidika kaupak payahwa kat, tunan muihni balna, sumalyang, dawak libait muihni balna bitik kalududuhna dai, maestro Esdras karak, la balna kidika laihwi talna atnin,

¹⁴dawak ulna yakat yayakna, Dawan yaklauwi Moisés yakat pakna dai, waiku tiaskaubu laihwak alasnina kidika yamwi, dawak witingna ū labanni kau kanin dai.

¹⁵Kaput laih tawan nunuhni balna bitik, dawak Jerusalén yakat bik, yul kidika kiuna dai, muih balna kidika bitik asangpas yakat uiwi olib tingni walna atnin, dawak pan kuku basni kapapat kidika bik, kaput bik pan ūk ūk basni yayamni duduwa balna kidika bik, ū labanni yamna atnin yulni, la yakat ulna sakdai kidika kaput.

¹⁶Muih balna kidika alahwi uina dawak, watwi nawatwi aina pan basni balna kidika duwi, witingna ūnina labanni yamna atnin; ūnina tuna yakat, kidika awaskat wataknina kat bik, kaput bik sipdai yamna atnin Papang ūni watakni yakat bik, was dūrni kau langni pakyakat bik, dawak Efraín dūrni kau langni pakyakat bik.

¹⁷Muih balna bitik, laihwi duwi uina dai kaupak nawatwi aina balna kidika ū labanni yayamna dai, dawak kidika pasyakat kakana dai, kat Josué mani balna dai kidika kaupak, Nun walanibis, kidika manikat, witingna kaput yayamwas dai. Bahang kaput laih alasna nuhni yayamna dai.

¹⁸Kidika alasnina yayamna dai ma tiaskaubu, dawak kidika alasnina tunan bahna kaupak, Esdras yulwi talwa dai Papang lani wauhnitaya kidika alasnina bayakkiwak kat: dawak alasnina kidika ma tiaskaubās laihwak, kaluduhnin nuhni as yayamna dai, witingna niningh yayamwa dai kaput.