Read Mayangna Ester 2 Bible Online

Ester 2 - Mayangna bible

Ester 2

¹Ma as bayakwak usnit kat, king Asuero kidika kulnin lungna, dawak isningkatna Vasti yakat, witing di balna yamna dai kidika, dawak Vasti niningyakat lā āna dai kidika.

²Dawak witing king kawa yaihnit kau muih nunuhni bangdai kidika balna yaklauwi kalyuyulna: —Walna atninki sirarau yayamni baisa al kalpapakwas balna kidika king dini atnin.

³King yaklauwi muih āna atnin karang, witing kingkawa sau bitik yakat, sirarau balna kidika walwi dukiwi yayal ūnina yakat āna atnin, Susa tawanni yakat; dawak Hegai tingni yakat āna karang maintalna atnin, kat kidika al yakat laih witing yaklauwi yamni kalkulwa bahang, kaput bik laih al kidika laih yayal maintalyang dai. Dawak Hegai yaklauwi yayal balna yakat diyamwang yaksihni atnin,

⁴dawak angdika sirauni kat king yaklauwi tanit yaksihni talwarang kidika, king yalni kalna karang, dawak Vasti pani kidika witing duna karang. Kidika kulnin lani laih king yamni talna, bahang kaput laih yamna dai.

⁵Susa tawanni nuhni yakat Ju as yalahwa dai ayangni laih Mardoqueo, witing laih Jaír walanibis dai, dawak Simei, kaput bik laih Cis dawak Benjamín kidika balna kaupak sulanina dai.

⁶Babilon kingni Nebokatnesar muih mahni Jerusalén kaupak yakwi duwi kiuna, dawak Judá kingni Jeconías yakabik duwi kiuna pasyakat likdai.

⁷Mardoqueo witing papani walanibis yal as tingni yakat duwa dai, bahang yal kidika papangni dawak nanangni kidika bupak dadauna dai, bahang witing walanibis kapat duwi muhna. Ayangni laih Hadasa kidika awaskat Ester, witing laih yal as yaksihn dai, dawak muihni nuhni bik yamni dai.

⁸King yaklauwi lani āna kat, sirarau mahni laih uduhwi king ūni Susa kau yakat uiwi ahana, dawak Hegai tingni yakat ahana dai maintalnin, kat witing laih yayal maintalyang dai bahang, kidika pasyakat Ester likdai.

⁹Hegai yaklauwi Ester yakat uba yamni kaltalna, kaput laih kulnin dalani kaltalna, bahang witing yaklauwi maintalna yaksihn kalyamna atnin, kasnin tanit yamni kalana, dawak yayal tiaskau bu king ūnipas kau wark kalalahwa balna tanit yayamni kidika yakwi pakna mainkaltalna atnin, dawak kidika balna karak yayal ūnina nuhni yakat duwi kiuna, dawak payahnin pani tanit yamni kidika diana

¹⁰Ester yul as bik yulwas dai, witing kidika ais ninisanpa dawak bik wais wanaihnipa, kat Mardoqueo yaklauwi kalyulna dai yulnin-awas.

¹¹Dawak Mardoqueo, ma bitik yakat witing awaihwa dai yayal balna ūnina nuhni watakni muhnit tani yakat, kidika laih amanglana atnin Ester kidika yamni sakpa, kidika awaskat ais kalyayamwapa.

¹²Kidika yayal sirarau balna bitik laih maintatalwa dai waiku 12 praisni, yaksihn diyamna atnin yulni. Tatuna waiku tiaskawas kidika laih muihnina yakat pan yāni walapni kidika kakahwa dai, dawak waiku tiaskawas ūk kidika laih walapni ūk balna yayal kakahwa kidika kakahna dai. Kidika mani balna bayak dawakat, sirarau kidika king Asuero muhni yakat aslah aslah uiwa dai,

¹³dawakat, king ūni kaupak witingna ais yuyulwa kidika uiwi diayawa dai yayal ūnina nuhni yakat.

¹⁴Dawak pukta yakat kiwadai king ūni yakat, dawak payahwak yayal balna ūnina nuhni kidika pasyakat pa ūk yakat yaklawadai, bahang kidika laih Saasgaz tingni yakat dai, bahang kidika alni laih king yaklauwi yamni kalkulwadai, kaput bahang king ialni balna kidika maintalyang dai; kidika bayakwak usnit kat, watwi king muhni yakat kiwasdai, kaunah king yaklauwi yamni kaltalna kat, kalyulwa laihtakat kiunin dai.

¹⁵Mardoqueo papani Abihail walanibis yal Ester kidika, king muhni yakat kiunin mani kidika kana kat, Hegai king yaklauwi yamni kalkulwa alni dawak yayal maintalyang dai kidika yaklauwi ais duwi kiunin kalatna kidika manah duwi kiuna. Bahang uman Ester yaklauwi kidika yakat wark kalalahwa balna bitik yakat kulninna laihna dai bahang.

¹⁶Ester kidika king ūni yakat duwi uina dai, king Asuero muhni yakat kiuna atnin, waiku salap laihna yakat, dawak kidika wainiku laih Tebet dai, bahang kidika kurihni laih Asuero king kana kaupak kurih tiaskaubu laihna dai.

¹⁷Dawak Asuero yaklauwi yaksihn talna Ester yakat, yayal as kau bik kaput yaksihni talwasdai, bahang kaput laih Ester yaklauwi king Asuero kulnin laihna dai, bahang king yaklauwi tanit yamni kalyamna yayal ūk balna witing karak dai kapat-awas, kaput laih Asuero kulnin laihna dai, Ester kau tanit yamni kalyamna dai, sirarau uk balna witing karak dai kidika, dawak king kraunni kidika Ester tunan yakat pakna dai, dawak king yalni ānadai, Vasti pani yakat.

¹⁸Usnit kat kasnin alasnina nuhni yamna Ester ayangni kau, dawak witing king kawa pasyakat wark kalalahwa balna bitik yulwi duwi kiuna, dawak tunan minit yakwa dai kidika kuihwas lakna, dawak presant dini bik manas diana dai, king risnipik duwa lani kat.

¹⁹Yayal ūnina nuhni pasyakat sirarau balna kidika panina ūk dilawa mani yakat, Mardoqueo laih king ūni durnikung yakat yalahna sakdai.

²⁰Mardoqueo yaklauwi sumalna kaput, Ester yulwasdai witing tawanni dawak wanaihni balna yulnina kidika, dawak witing Mardoqueo ais kalyulna yakat yamna, tingni dinit kau lik-awa dai kidika mani yulni kat dakawi yamwa dai kaput.

²¹Mardoqueo kidika king ūni dūrni yakat yalahna sakkat, Bigtán dawak Teres, kidika balna laih king yaihnit kau kalbauyang balna duwasak dai kidika balna pasyakat tunan balna, bahang witingna laih king ūni dūrni main talwaraudai. Kidika balna kulninna daukalwi, king Asuero īnin yuyulwak dakana.

²²Mardoqueo, witing king inin yayamwa kidika dakana kat, king yalni Ester yakat kalyulna, dawak tilahwi king yakat kalyulna Mardoqueo yulwa kidika.

²³Kidika yulni laihwi tatalwak rahm lāih kalahwakat, kalbauyang balna bu kidika dininamak yakat sitwi murilwi inin yakat wiryaklalana dai. Adika dini kalahna kidika king muhni tani kat ulwi dana dai, kidika sauni bitik yakat di balna kalahwak ulwa wauhnitaya yakat.