Read Mayangna Ester 9 Bible Online

Ester 9 - Mayangna bible

Ester 9

¹Waiku 12 kaupak ma 13 yakat, yuldarang laih Adar wainiku yakat kuduh king yaklauwi adar āna kidika yamna atnin dai; kaput bik laih Ju balna waihninala bik tahahawa dai taihna atnin Ju balna yakat.

²King Asuero sauni sahyakna bitik yakat, Ju balna kidika kalududuhna yalalahwa tawanni nunuhni balna yakat, witingna kau dutni dikukulna balna niningna yakat kalbauna atnin. Muih as bik disdai niningna yakat yaklauna atnin, kat yamadunin kidika tawan bitik yakat dilaihna dai bahang.

³Sau sahyakna bitik kau parasni duyang balna, kabamint muihni balna, dawak kabamint pasyakat wark nuhni duduwa balna, kidika yaklauwi Ju muihni balna ilpnina kakana, Mardoqueo yamani duduwa yulni,

⁴kat witing laih uman muih nuhni dai bahang king ūni yakat, dawak witing ayangni nuhni kidika sau sahyakna bitik yakat kiuna dai, dawak ma bayakwa bitik yakat baisa parasni duna dai.

⁵Isparah kau manah, Ju balna yaklauwi waihninala balna kidika bitik dahnyayamna dai; bitik palni laih dahnyayamna dai, dawak witingna ais yamkih kidika kaput yayamna dai.

⁶Susa yakat manah ahal andat singka ihina;

⁷dawak sihm ihina Parsandata, Dalfón, Aspata,

⁸Porata, Adalía, Aridata,

⁹Parmasta, Arisai, Aridai dawak Vaizata,

¹⁰kidika laih Amán walanibis ahal salap dai kidika, Ju waihninala balna; kauna dinina balna laih lalaihwasdai.

¹¹Sihm kidika mani, king dakana kat muih ampus dadauna kidika kalbauyang balna ūnina Susa kau yakat,

¹²Ester yakat kalyulna: —Ju balna ahal 500 ihina, dawak Amán walanibis ahal salap dai kidika bik ihina, kalbauyang balna ūnina Susa kau yakat, ¿ais baisa di ūk yayamna pa sau sahyakna ūk balna yakat? ¡Yayultah ais baisa dukih mawih, yang lawik maki!

¹³Dawak Ester yaklauwi nangnitlana: —King man yamni talaman kat, Ju balna niningna yakat lā ahana dai kidika, sihm biriwi kidika lani ahana dai kaput diyayamna karang; dawak Amán walanibis ahal salap kidika sitwi mur'ihilwarang.

¹⁴King yaklauwi pakna, kaput yamna atnin. Dawak kidika lāni laih Susa yakat ulwi yayakna muih bitik dakana atnin, dawakat Amán walanibis ahal salap dadauna balna muihnina dai kidika sitwi mur'ihilna.

¹⁵Ju balna Susa yakat yalalahwa dai kidika watwi kalududuhna, Adar wainiku ma 14 yakat, dawakat ahal andat bās ihina kidika mani; kauna dinina balna laih lalaihwas dadana.

¹⁶Ju balna sau sahyakna ūk yakat yalalahwa dai kidika kalududuhna, sihm kidika wainiku ma 13 yakat, sangninaka nanitdakna atnin yulni dawak waihninala balna kidik dis yamna atnin yulni; dawak kidika balna yakat ihina tausin 75, kauna dinina balna kidika laih lalaihwasdai. Dawak ma 14 yakat, yak-ururupdana, dawak alasna kasnin as yayamna.

¹⁸Susa kau Ju balna bangdai kidika laih ma 13 dawak 14 bik kalududuhna dai bahang, ma 15 yakat laih yak-ururupdana dai, dawak witingna bik kasnin alasnina yayamna dai.

¹⁹Kauna Ju balna tawan binina kau yalalahwa dai kidika laih, ma 14 Adar wainiku yakat alasnina yayamna dawak biri biri di kalyuyuna.

²⁰Mardoqueo yaklauwi adika di kalahna kidik ulna, dawak Ju balna Asuero sauni sahyakna balna kau yalalahwa yakat bitik sihna dai,

²¹yamnin diyulna, kurih kaiwa bitik yakat alasnina kidika, ma 14 dawak 15 balna yakat, Adar wainiku yakat

²²kidika mani balna yakat Ju balna yaklauwi waihninala yakat ihina dai bahang, dawak kidika wainiku yakat kulninna bukwak dalani yulni sarahwi kakaidana dai kidika kaupak alasna yakat wirlana bahang. Kidika mani balna laih alasna yamnamna ki, dawak kasnin dini bik yamnin, biri biri di kalyunin, dawak muih miniknakunni yakat minitdis dini dianin.

²³Ju balna kaput yamwi lan kakalna dai, Mardoqueo yaklauwi wauhtaya diulna dai kidika kaupak.

²⁴Amán, Ju balna waihninala kulna dai suerte ruhmwi kaput yamwi bitik īwi disyamnin;

²⁵kauna Ester king muhni yakat kiwak, adika yaklauwi ulwi kalyulna, dutni balna bitik Amán kulna dai kidika Ju balna yakat diyamna atnin, waradika laih witing silp minit yakat bukna karang. Kaput laih Amán walanibis balna bitik sitwi ihilna.

²⁶Kidika yulni, adika mani balna ayangni papakna Purim adika laih pur[7] yulni kidika mahni kau yulwi. Kaput laih, Mardoqueo wauhtaya ulna dai kaput dawak witingna tatalna dai kidika, dawak bik kaput wawauhna dai kidika,

²⁷bahang Ju balna witingna niningh kaput ban āwi duduna kulnin lani kidika, witingna sulanina balna kau bik, dawak Ju balna yakat wiryaklalawarang bitik kau witingna adika mani bu kidika alasnina yamnin, kurih kaiwa balna bitik yakat, dawak bik amput yamnin lani balna āna kidika yakat;

²⁸dawakat kidika mani balna kidik ban isningna yakat duna atnin, dawak bik alasnina kidikayamna atnin, sulani balna kat kat, sau sahyakna balna kau bik dawak tawan nunuhni balna yakat bik, kaput laih dinitnakahnin-awas Ju balna pasningna kaupak dawak sulanina balna kau bik.

²⁹King yalni Ester, Abihail walanibis yal, dawak Mardoqueo Ju al kidika witingna watwi wauhta ūk uhulna parasni bitik duwi, bahang uhulna kidika Purim alasnina yamnin. kidika laih tatuna uhulna kidika kau tanit parasni kalana atnin,

³⁰dawak sisihna Ju balna yakat, sau sahyakna 127 yakat, Asuero king kawa sauni paskau, uhulna kidika laih dalani dakawa yulni kau, dawak, rahm yulni karak bik,

³¹dawak dipakna, Purim alasnina kidika yamninna mani āna yakat, Mardoqueo dawi Ester karak yamnin yuyulna kaput witingna dawak sulani balna kau bik. Sihm kaput bik laih, lā as as ahana, dikaswas dawak bik kulninna tikini wauhnin kidika bik,

³²dawak, Ester yaklauwi pakwak kidika laih, Purim alasnina amput yamnin lāni ahana kidika baisa parasni kalana. Adika bitik laih wauhtaya as kau ulwi dadana.