Read Mayangna Éxodo 12 Bible Online

Éxodo 12 - Mayangna bible

Éxodo 12

¹Egipto yakat Dawan yaklauwi yuldibauna Moses dawak Aarón yakat, bahang aput yulna:

²“Manna namangna yakat adika wainiku laih waiku tatuna karang kurih pasyakat.

³Israel balna bitik yakat diyultanauh: ‘Adika wainiku ma salap yakat, manna ūmana pasyakat sīp kidika awas kat kuts as as dutanama.

⁴Umana pasyakat muih bulah mana kat, dimuihni kidika sip bitik kaspamtas awanama kat, yaihmatna kau ū ūk muihni balna karak kalpakta kastanama, muih ampus kasnin sip yakat.

⁵Tinglau kidika laih kurih as laihna kat duna atninki, almuk dawak sakahwa awas atnin ki, bahang kidika laih sīp kidika awaskat kuts atninki.

⁶Bahang kidika laih apakna karang ki adika wainiku ma salap arungka kat, dawak kidika mani Israel balna bitik tingninalau kidika ihina karang ma ulahu yakat

⁷āni duta, dūr yakat kahtanama, kidika uni pasyakat dimuihni kastanama kidika.

⁸Kidika puknita dimuihni kidika kuh kau busta kastanama, dibasta tapalhni dawak plawar busna pupuhnin dini awas kidika karak.

⁹Sangka kidika awaskat waskau lahnin laih kasnin awaski. Dimuihni kidika bitik, tunan, kalni balna dawak bāni balna bitik, kidika laih kuh kau busna atnin ki,

¹⁰dimuihni kidika danamna awaski payahwak kat kasnin. Sutni bayakwarang kat kuhpa yakat putanang buswarang.

¹¹Uman prakmana awa, susmana āta dawak tingmana yakat tulmananah duta dawak, sirihni kastanama dimana kidika, kat Dawan innisal kaiwi bayakna mani bahang.

¹²Adika pukta yang Egipto munah bayakki ki, dawak walaninabis tatuna kidika bitik laih īki ki kaput bik tinglau balna walaninabis tatuna balna kidika bik īki ki, kaput bik dawan dauh balna kidika bik lanina yamki Egipto yakat bang kidika. Yang Dawan yang kat yultayang.

¹³‘A kidika kau manna angdika ūni yakat bangmana kidika lāih yakna karang. Dawak kaput laih Egipto muihni balna yakat īki kidika manna laih dautas awanama as bik, kat á kidika talik naikau lawaki.

¹⁴Adika mani manna ismangna kattanama, dawak alasna nuhni yamtamana Dawan risnipik kau. Adika alasnina yamta awanama la as kapat ban kaput atnin, papang balna kaupak walaninabis balna kidika yakat diayana karang.

¹⁵Plawar pupuhnin dini dis busna kidika manh kastanama, ma tiaskaubu, kaput bahang kidika mani kaiwi kāwa tatuna kaupak pupuhnin dini kidika dis atninki ūmana yakat. Angdika muihni, adika ma tiaskaubu pasyakat plawar pupuhwa dini kidika āwi kaswarang kat, Israel paskaupak yakpamna karang.

¹⁶Adika mani tatuna dawak tiaskaubu kidika bik, kal-uduhnin maisihni dis kidika yamtanama. Kidika mani wark kalahnin awas karang, kaunah kasnin dini manah laih sip karang yamna atnin muih bitik.

¹⁷Plawar pupuhnin dini dis āwi busna kidika alasnina laih manna ismangnakatta atnamna ki kat sihm kidika mani mana yakna yang bahang manna bitik. Kidika laih la as kapat manna yamta awanama bahang papang balna kaupak bayakna karang walaninabis balna kat.

¹⁸Waiku tatuna, ma salap minitkau arungka laihwak ma ulahu kaupak plawar pupuhnin dini āwas busna kidika kastanama, sihm kidika wainiku ma 21 laihwak ma ulahu kat.

¹⁹Manna ūmana yak pupuhnin dini kidika dis-awanama ma tiaskaubu praisni, kat angdika muihni plawar pupuhwa dini kidika āwi busna kidika kaswarang kat Israel tawanni paskaupak yakpamna karang, pa ūk muihni balna bik sihm kaput di yayamna karang, Israel pasyakat yalalahwa karang kat.

²⁰Kaput bahang, pupuhwa dini kau āwi di yamna balna kidika kakaswinih. Angkat pāni manna yalahtamana karang bik, plawar pupuhnin dini dis āwi busna dini kidika kakaswinih.’ ”

²¹Moses yaklauwi Israel muihni bararak balna bitik yulwak uiwak diyulna: “Manna yawa sīp karangpa kidika awaskat kuts karangpa as yakat dutanauh manna walamanabis balna karak dimana kidika, dawak ita alasna yamtanauh kaiwi bayakna mani kidika.

²²A kidika di as kau utuhsaknin; usnit kat pan basni walalapni kidika kau duta ā yakat suihta data dūr kungni balna yakat kahtanama ū balna yakat. Muih as bik ahni yakat kalahnin-awaski baisa payahlawas kat.

²³Dawan kaiwi bayakwi Egipto muihni balna yakat iwarang mani kat, dūr kung balna bitik kidika ā manah kat talwi ū kaupak naikau bayakna karang. Kaput laih Dawan yaklauwi dawas karang iyang kidika manna ūmana yakat kana atnin.

²⁴Adika yamnin manapaktayang adika manna dawak sulamana balna bik rispik yamtanama, lā as nining ban kapat.

²⁵Manna Dawan sau manawarang yakat awanama kat, witing pramis manayulna kaput, adika yamtanama adika ban yamta awanama.

²⁶Dawak walamanabis balna manayulwi dakakawarang kat: ‘¿Ais tanka yah adika dini yamtaman adika?’,

²⁷manna laih aput nangnitlanamna ki: ‘Adika tinglau laih sakripais yamwi kaiwi bayakna kidika yulni, Dawan kau nuhni kalkulnin yulni. Witing yaklauwi Egipto muihni balna īna kat, Egipto kau Israel balna yalalahwa balna ūnina kidika naikau bayakna dai, kaput laih yangna yanalaihwi yakna dai.’ ” Kaput laih Israel balna kidika minitna yulwi abubukna dai,

²⁸dawak usnit kat witingna uiwi yayamna dai Dawan yaklauwi dipakna dai kaput Moses dawak Aarón yakat.

²⁹Pukpapus kat, Dawan yaklauwi īna dai Egipto muihni balna walaninabis tatuna balna kidika bitik, sihm kaput bik laih fero walanibis king yalahwa kau yalahwa dai kidika bik īna, dawak bik silak muihni balna walaninabis tatuna balna bik īna, kaput bik laih tinglau balna walaninabis tatuna yayakna dai kidika bitik īna dai.

³⁰Fero dawak tunan nunuhni balna duwa dai kidika balna, dawak Egipto muihni balna bitik yaklalauna kidika puknita, dawak Egipto sauni bitik parasni sarahwi kakaidana. Ū as bik dis dai kidika pasyakat muih dauwas kidika.

³¹Kidika puknita, fero yaklauwi diyulna dai Moses dawak Aarón yakat uina atnin witing yakat, dawak diyulna: —Yawanauh, yangna paskaupak naikau lawanauh, manna dawak Israel balna bitik. Yawa Dawan kau ayangni nuhni yamtanauh, manna amput yulnamana kaput.

³²Tingmanalau balna bitik duyawanauh, dukih manawa kaput, mahka yawanauh. Dawak Papang kalni dinit yakat bukta yultanauh yang yulki bik.

³³Egipto muihni balna yaklauwi sirihni diyayamna Israel balna yakat, witingna mahka kalahwi uinin yulni, witingna saunina kaupak, kat witingna kukulna kidika bitik dadauwarang.

³⁴Israel balna plawar kidika tikwi duduna kaunah baisa pupuhnin dini kidika ahawas dai, dawak witingna asnina kau balakwi duduna, kaput laih mahka trukwi uina.

³⁵Witingna Moses yulwa yakat dakawi yayamna, bahang Egipto muihni balna yakat diyuyulna gol, lalah, dawak asna bik yuyulna.

³⁶Dawan yaklauwi Egipto muihni balna yakat diyamwak kulninna yamni kulwi diyuyulwa kidika bitik laih diayana, dawak kaput laih Israel balna yaklauwi dinina bitik dakyayakna dai.

³⁷Israel balna kidika Ramsés kaupak kalahna bahang Sucot pāni kat uina. Yayal dawak walabis balna kidika laih kukulwas dai, bahang witingna kalahna kidika ahal manah 600 tausin dai, kalkau lapakwi uina kidika, bahang kidika balna laih war kalbaunin sip balna kidika.

³⁸Witingna karak muih satni balna mahni uina dai, dawak sīp mahni, turuh bik mahni duwi uina dai.

³⁹Witingna kasninna kidika lahwi dunin sip-awas dai, kat Egipto muihni balna yaklauwi kangwi yayakna dai bahang, witingna plawar tikna duwi kalalahna dai kidika kau kasninna yayamna, bahang kidika dini laih pupuhnin dini ahawas dai, dawak kaput laih sapahwas dai.

⁴⁰Israel balna kidika Egipto yakat yalalahna dai kurih 430,

⁴¹kurih 430 lalaihna mani kidika, Dawan muihni kalbauyang balna dai kidika kalahwi uina, kidika sauni kaupak.

⁴²Kidika puknita, Dawan kidika talwa sak dai Egipto kaupak yakwi duwi kiunin kidika, kidika puknita laih Dawan puknita dai, kidika puknita yakat, Dawan nuhni kalkulna kidika, Israel balna bik tahaninna ki, sulanina kaiwarang balna bitik yakat.

⁴³Dawan yaklauwi diyulna Moses dawak Aarón yakat: “Kaiwi bayakna lani balna kidika laih adika ki: Muih pini ūk sip-awaskarang dimuihni sakripais busna kidika kasna atnin,

⁴⁴kaunah, warau as bakanna kidika laih sip karang kasna atnin, kaput bik witing kidika uman muihni yakat sain duwa karang kat.

⁴⁵Pa ūk muihni kat kaiwi sirihni bayak'kiwapa kidika awaskat kidika pāni yakat yalahwi wark kalahwi minit duyang as pa, sip-awas karang dinimuihni kidika kasna atnin,

⁴⁶kidika dinimuihni laih ū aslah pasyakat kakasna karang. Dimuihni sakripais yamna kidika ahni yakat dakni dibin bik sip-awas karang yakna atnin, dawak wakalni bik bahnin awas karang.

⁴⁷Israel muihni balna kidika bitik adika yayamna karang.

⁴⁸Kaput kaunah, pa ūk muihni as manna pasmangna yakat yalahwa karang kat, insal kaiwi bayakna mani kidika yulni Dawan yakat nuhni kulwi witing bik alasna yamkuhtarang kat, witing ūnipas kau ahal kidika bitik laih Papang sainni kidika duninna karang, dawak kaput laih sip karang kidika alasnina yamna atnin, bahang kaput laih witing kidika adika sauni akat batanh dana kapat karang. Kaunah kidika dini muihni kaupak kasnin sip-awas karang Papang sainni duwas muihni kidika.

⁴⁹Sihm kidika lani dinit yakat bubukna karang adika sauni akat batahn dadana balna dawak pa ūk muihni balna manna pasmangna yakat yalalahwa balna kidika bik.”

⁵⁰Israel balna witingna Dawan yaklauwi Moses dawak Aarón yakat dipakna dai kaput witingna yayamna dai.

⁵¹Sihm kidika mani, Dawan yaklauwi yakna dai Egipto kaupak Israel balna kidika.