Read Mayangna Éxodo 16 Bible Online

Éxodo 16 - Mayangna bible

Éxodo 16

¹Israel muihni balna bitik Elim kaupak kalahwi uina kidika Sin kauhnimak wanilang kat uiwi kakana, bahang kidika laih Elim Sinaí karak walsah yakat pakki. Bahang mani laih ma 15 dai, Egipto kaupak kalalahna waiku bu kāwa yakat dai.

²Kidika kauhnimak wanilang yakat muih bitik laih Moses dawak Aarón niningkauh manah yuyulna dai.

³Aput yuyulna dai: —¡Dawan yaklauwi maiyamwak Egipto yakat dauna mayang kat tanit yamni dai! kidika yakat laih mayang dimuihni lahna subani yaihnit yakat yalahda dai, bahang kasdak maibuhng dawa dai, kaunah manna lawa kauhmak wanilang akat yanaduainamana bitik yakat yuh kau yana imuknin yulni.

⁴Kaput laih Dawan yaklauwi Moses yakat kalyulna: —Yamting kat kasnin dini kidika makau kisang kaupak uhwarang. Muih balna kidika ma bitik yakat kalahwi ananana karang, witingna ma as kasnin praisni kat, Kaput laih yang talki wais kidika yang yulki kat dakawa kidika, dawak wais kidika yang yulki dakawas kidika.

⁵Ma tiaskauas yakat laihwak, ananamana karang, ma bitik anatamana kidika minit yakat wat praisni.

⁶Moses dawak Aarón karak witingna Israel balna yakat diyuyulna: —Ma ulahu yakat manna talnama, Dawan yaklauwi witing Egipto kaupak manayakna kidika,

⁷mapiris yakat manna talnama Dawan alasnina yaksihni kidika, kat witing dakana niningkauh yulna mana kidika. Kat ¿yangna adika wais yangna manna yangna nikingna yakat dutni yamna yangna kidika yulna mana?

⁸Dawak Moses yaklauwi minit yakat lakwi yulna: —Ma ulahu yakat Dawan yaklauwi dimuihni manawak kastanama, dawak mapiris yakat laih plawar busna kidika mahni manana karang, kat witing dakna niningkauh yultamana kidika. Kat ¿mayang wais mayang? Kat manna yangna nikingna yakat lawas mana dawak bik yultasmana, kaunah Dawan niningkauh lawanamana.

⁹Usnit kat Moses yaklauwi Aarón yakat kalyulna: —Israel balna yakat diyultang Dawan muhni yakat uiwang, kat witingna yuyulwa kidika dakana bahang.

¹⁰Aarón witing Israel balna karak yulbauwasak minitni yakat witingna bitik kauhmak wanilang nining yakat tatalna, dawak Dawan alasnina yaksihni kidika mukus yakat lāih kalahna.

¹¹Dawak Dawan yaklauwi Moses yakat kalyulna:

¹²—Israel balna dutni kidika yulni ap yuyulwa kidika dakanayang. Witingna karak yulbauta diyultah: ‘Ma ulahu yakat, manna dimuihni kastanama, dawak mapiris yakat laih plawar busna kastanama, kaput laih ismangnalak dana karang. Kaput laih manna amanglatanama yang manna Dawan yang kidika.’

¹³Sihm kidika manisan yakat wahng binina aina, muih bang kidika bitik laih bungdana dai, dawak mapiris yakat laih muih balna bang kidika yaihnitna awaih kidika yakat diwas uhna dai.

¹⁴Diwas uhna kidika buhlawak, diwas buhlana usnit kat, sihm was dadasni kapat kalahna dai sau kauhmak wanilang minit yakat.

¹⁵Israel balna witingna laih amanglalawas dai bahang talwi biri biri yuyulna: “¿Adika ais diniyah?”[10] Dawak Moses yaklauwi diyulna: —Adika kuduh kasnin dini Dawan yaklauwi manawa kidika kasnamna.

¹⁶Dawan yaklauwi adika lani āna: Manna anata dutanauh ampus kasnamna dukih manawa kaput, dawak manna ūmana yakat muih ampus mana kat kaput anata dutanauh muihmana kat litro bu.

¹⁷Israel balna witingna kaput yayamna. Buas kat mahni bik ananana, dawak ūk balna laih bulah ananana,

¹⁸witingna ampus dunin diyulna yakat; ananana dai kidika mahni minitkau laih bayakwas dai, dawak bulah anana dai kidika kalkuihwas laih awas dai. witingna bitik laih ananana dai kasninna praisni kat.

¹⁹Usnitkat Moses yaklauwi diyulna: —Muih as bik di balna kidika danin awaski yahan dini.

²⁰Kaput kaunah, muih buas Moses yulni kawas dadana, bahang yahan dini kidika dadana dai; kaunah kidika dini balna dai kidika babil manah kalahna kat wayani kakalna dai. Kaput laih Moses witingna niningna yakat kulnin daukalna dai.

²¹Muih bitik laih mapiris yakat ampus kasnin kat kaput ananawadai, kat madaihni laihwak arlawa dai bahang.

²²Kaunah ma tiaskauas laihwa yakat laih, ananawa kidika kasna bu bu ananawa dai yuldarangkat, muihnina kat kat litro arungka; kaput laih tunan muihni balna kidika; uiwi kal yuyulna dai Moses yakat,

²³dawak Moses yaklauwi diyulna: —Kidika laih Dawan yaklauwi kaput la āna. Yahan kuduh yakurupdinin mani,[11] yakurupdinin mani as Dawan dini yakna kidika. Warmani ais lahnamna kidika lahtanauh, dawak ampus di sutni watwarang kidika yahan dini apaktanauh.

²⁴Moses yaklau yamnin yulna kaput, witingna kasninna dini ais sutni watna kidika payahwakat dini apapakna dai, dawak wayani kalwas dai dawak bik babil kakawasdai.

²⁵Bahang Moses yaklau aput yulna dai: —Warmani kastanauh, yakurupdinin mani Dawan dini yakna kidika akat, bahang warmani manna di dahnin pāni yakat di as bik yaktas awanama.

²⁶Ma tiaskauas pasyakat ananamna sipki, kaunah ma tiaskaubu kidika yakat laih, yakurupdinin mani kidika, di as bik dis karang.

²⁷Witingna kaupak buas kidika laih ma tiaskaubu yakat buas anadang atwi kalalahna dai, kaunah di as bik yayakwas dai.

²⁸Bahang Dawan yaklau Moses yakat aput kalyulna dai: —¿Mampat mani kat manna yang lāki balna dawak yulki balna kidika bik dakas awanamayah?

²⁹Manna yamni amanglatanauh, yang Dawan yang adika lawik, yakurupdinin mani as mananayang kidika; kidika bahang ma tiaskauas kidika yakat kasnin dini manatayang ma bu dini. Kaput bahang muih bitik ma tiaskaubu kidika ūnina kaupak kalahwas atninna ki.

³⁰Kaput bahang ma tiaskaubu kidika laih muih bitik kidika yakururupdana dai.

³¹Israel muihni balna yaklau maná papakna dai,[12] ananawa dai dini kidika. Kidika laih di as pihni sihm cilantro minik kapat dai, dawak damni dai sihm plawar baini laihwi kiswi minityakat amak utuhna kapat.

³²Usnit kat Moses yaklau aput yulna dai: —Adika ki Dawan yaklau yamnin yulna kidika: ‘Maná manah anata litro bu bahngtanauh, dawak apaktanauh sulamana balna dinina, kaput laih witingna talna atninna yang lawik kauhmak wanilang yakat ais kasnin dini mananayang dai kidika, Egipto kaupak manayaknayang dai kidika mani.’

³³Aarón yakat laih aput kalyulna dai: —Uslun as duta kidika yakat maná litro bu[13] putah. Usnit kat Dawan muhni yakat laktah, manna sulamana balna dinina apakna atnin yulni.

³⁴Dawan yaklau Moses yakat yamnin kalyulna kaput, Aarón yaklau uslun kidika pramis baksni kidika muhnityakat lakna dai, apakna atnin yulni.

³⁵Israel muihni balna laih kurih 40 maná manah kakasna dai, witingna uiwi saunina duduna kat; yuldarang kat, Canaán sauni kiwi watwa kat kaswi dadana dai.

³⁶(Gomer as kidika laih efa sahyakna salap dai.)[14]