Read Mayangna Éxodo 19 Bible Online

Éxodo 19 - Mayangna bible

Éxodo 19

¹Israel balna Sinaí kauhnimak wanilang yakat uiwi kakana, Egipto kaupak kalalahna kidika waiku bās laihwakat.

²Refidim kaupak kalalahna kidika usnitkat, Sinaí kauhnimak wanilang yakat uiwi kakana, dawak kidika yakat watwi ūnina labanni yayamna, asang kidika muhnit yakat.

³Kidika yakat Moses kilwi kiuna Papang karak kalpakna atnin, kat Dawan yaklauwi kidika asangni kaupak kalyulna dai: —Sihm adika yulni balna adik Jacob sulani balna yakat, Israel balna yakat:

⁴‘Manna talnamana, yang lawik Egipto muihni balna yakat ais diyamnayang kidika, dawak bik amput manaduainayang kidika, yang sakyang akat, sihm yakalnuh lawani kau aiwanamana kapat ki.

⁵Kaput bahang manna yang yulki dakanama kat, di bitik yakat, dawak bik pramis kat yamtanama kat, kidika laih yang tawanki awanama, tawan balna kidika bitik pasyakat manayaktik dunayang kidika, kat sau bitik kidika laih yang diki.

⁶Manna laih yang sumalkiyang balna awanama, tawan as yang diki kidika.’ Diyultah Israel balna yakat adika balna bitik.

⁷Moses kiwi tawan muihnibararak balna kat diyulwak uiwak diyulna, Dawan yaklauwi yamnin pakna balna kidika bitik.

⁸Kaput dawak Israel balna kidika dinitna aslah yuyulna: —Dawan yaklauwi yamnin yulna balna kidika yamtanaki. Kaput laih Moses yaklauwi tawan ais yulna kidika Dawan yakat duwi kiuna,

⁹dawak Dawan yaklauwi kalyulna: —Talah, yang man yakat lāih alahwaki mukus munah, kaput laih yang man karak yulbautayang kidika muih balna dakakawarang, dawak muih balna kidika kulninna man yakat āwi duduwarang. Moses yaklauwi Dawan yakat kalyulna, muih balna yuyulna yulni kidika,

¹⁰dawak Dawan yaklauwi kalyulna: —Warmani yawa tawan kidika ridi yamtah, dawak yahan mani yang kau prias as yayamwarang. Asninana suhnin ki

¹¹dawak ridi kalnin ki yahan mani pukwak, kat yahan mani pukwak, yang Dawan yang adika, Sinaí asangni yakat lakwaki ki, tawan kidika bitik muhni yakat.

¹²Asang kidika yakat lain as atah, muih balna bayaknin awas yulni, dawak bik diyultah, asang kidika witingna rispik yamninna, kidika yakat kilnin awaski, dawak bik yaihnit yakat bik kiunin awaski, kat wais kidika yaihnit yakat kiwarang kat daunin yakat wirlana karang.

¹³Dawak muih as bik tingni kau laihnin awaski, wais laihwarang kat kipala kau bahrwi īna karang, kidika awaskat sibang kau baswi īna karang, sangka kaldanin awas karang. Muih balna kidika asang yakat kikilna karang, sīp almuk tamni kidika puhwak dakakawarang kat.

¹⁴Moses witing asang kaupak yaklakwi kiuna, tawan kidika ridi yamnin yulni, kaput laih Papang yakat prias yamnin. Muih balna kidika asninana susuhna,

¹⁵dawak Moses yaklauwi diyulna: —Manna ridi alahwanauh warmani, yahan mani pukwak di yamtanama kidika yulni, dawak kaput bik laih manna yal karak kalduwi payayahwinih.

¹⁶Ma bās laihwak payahlawa yakat, alwana parasni lapna dawak bik ruhmna, dawak mukus as asangtuna yakat kaiwi watna. Dawak trumpit parasni puhwak muih balna kidika dakawi muihsak dadauna, witingna bitik, ū labanni kau bangdai kidika balna.

¹⁷Kaput laih Moses yaklauwi muih balna kidika ūnina labanni kaupak naikau yakwi duwi kiuna Papang karak kalpakna atnin, dawak asang sar yakat uiwi wawatna.

¹⁸Sinaí asangni bitik kidika wayau manah kalahna, kat Dawan kidika kaiwi bukna dai bahang kidika asang minit yakat kuhpau karak. Wayau kidika kalahwasakdai sihm plawar bubuswa pāni kaupak kalahwa kapat, dawak asangni kidika bitik laih yukna dai parasni palni.

¹⁹Trumpit puhwa kidika baisa, baisa parasni puhna dai; dawak Moses kidika yulbauwak Papang yaklauwi nangnitlana dai, dinitsuru kidika laih alwana kapat yulna dai.

²⁰Dawan kidika yaklakwi kaina dai Sinaí asangni tuna tanit maluihni yakat, dawak Moses yakat kalyulna sihm kidika pāni yakat kilwi kiuna atnin. Dawak Moses kilwi kiuna,

²¹kaput laih Dawan yaklauwi kalyulna: —Lakyawa muih balna yakat diyultah, lain kidika kaupak bayaknin awaski, dawak yatalnin bik witingna kulnin awaski, kidika awaskat muih balna kidika manas dadauwarang.

²²Sumalyang balna karang bik, yang yaihkit yakat ainin sip kidika, witingna maisihnidis kalahnin ki, kidika awaskat witingna pasyakat īki.

²³Dawak Moses yaklauwi Dawan yakat nangnitlana: —Tawan muihni balna sip Sinaí asangni akat kilwi aiwas karang, kat man lawa yanayulnaman, lain as ānikna, dawak kidika laih man dima yakna atnin.

²⁴Kaunah Dawan yaklauwi kalyulna: —Lakyawah, usnit kat Aarón karak ilwa aiwanama. Kaunah sumalyang balna dawak tawan muihni balna kidika laih sip laih kidika bayakwi kilwi aiwas karang yang sakyang akat, kidika awaskat witingna pasyakat īki.

²⁵Moses yaklakkiwi, adika yulni Israel balna yakat diyulna.