Read Mayangna Éxodo 2 Bible Online

Éxodo 2 - Mayangna bible

Éxodo 2

¹Leví sulani kaupak al as kalahwi yal as duna sihm kidika sulani kaupak,

²bahang yal kidika muihbin as duna dai al bin kat. Yal kidika talwak muih bin al bin kidika nuhni palni bin kat, malwi duna dai kurih bās witing ūni yakat;

³Kaunah sip-awas kalahna dai baisa walwi duna atnin ma mahni ki, dawak kuring bin kapat as yamna dai dawak kidika pasyakat muihbin kidika awi putwi dawi Nilo wasni yakat āna dai.

⁴Kidika minit yakat muihbin kidika wirahni as yakat kalyulna dai yaihnit ulah yakat kiwi talna atnin, ais kalahwarangpa muihbin kidika.

⁵Usnitkat, fero walanibis kidika waskana yaklakwi kiuna, dawak dini yamyang balna tatalna dai, kuring bin kapat dai kidika. Kaput laih sihna dai dini yamyang as yakwi, witing yakat laihwi duwi kiuna atnin.

⁶Putnin kidika apahwi talwak muihbin al bin nuhni bin kat kaidatusdai pasyakat, fero walanibis witing minikun talwi aput yulna: —Adika muih albin adika laih hibru bin as ki.

⁷Kaput laih muihbin wirahni kidika yaklauwi fero walanibis yakat kalyulna: —¿Man yamni talaman, muihbin muhyang yalni as yulting kainin, hibru yal kat, witing yaklauwi ta bayahna atnin?

⁸Fero walanibis yaklauwi kalyulna: —Yawa waltah. Kaput laih yal bin dai kidika muihbin nanangni yakat kiwi kalyulna atnin,

⁹dawak fero walanibis yal dai kidika yaklauwi kalyulna: —Muihbin adika duta muhta yatah, kaput laih yang lawik minitlautik maki warkma minit. Nanangni dai kidika walanibis bin duwi kiwi muhna,

¹⁰barakna kalwa kat, fero walanibis tingni yakat kalana, dawak witing walanibis kapat duna dai dawak ayangni pakna Moses,[1] dawak yulna: —Yang lawik waspa kaupak yaknayang.

¹¹Moses kidika uman muihbarak kalna kat, ma as kat witing wanaihni balna yakat talna kalahwi kiuna, bahang witing amanglana dai wark parasni kalahwa kidika. Witing talwakat, witing wanaihni balna kidika Egipto muihni as yaklauwi wisna dai.

¹²Kaput laih yaihnit balna bitik yakat talwak muih as bik disdai, bahang Egipto muihni kidika iwi kauhmak yakat nuna dai.

¹³Payahwak watwi kalahna, dawak talwak hibru muihni balna bu kalbauwa tuludai. Kaput laih kalyulwi dakana dai muih bauwa muihni yakat: —¿Ais yamta man nimasan yakat bautamahn?

¹⁴Dawak hibru muihni dai kidika yaklauwi kalyulna: —¿Wais yaklauwi wihta mahanayah yangna paskingna yakat? ¿Bahang yaīnin kultaman Egipto inaman kapat? Moses adika yulni dakawi yamaduna, kat Egipto muihni dauna kidika amanglalana bahang.

¹⁵Kaput laih fero dakana Egipto muihni dauna kidika, Moses yaklauwi ina kidika, walnin sihna dai ipamna atnin yulni; kaunah Moses laih kiri Madián sauni yakat kiwi yalahna dai. Dawak kidika yakat was pāni kuhrna kung as kat yalahna.

¹⁶Reuel Madián sumalniyang nuhni kidika walanibis yayal tiaskaubu duwadai. Kidika mani yayal balna kidika uina dai kidika pāni yakat was yakna atnin, tinglau balna bayahnin, papangni sīpni balna.

¹⁷Kaunah sīp maintalyang ahalni balna aiwi yayal balna kidika kangwi yayakna dai. Dawak Moses yaklauwi ilpnina kanadai, dawak sīp balna kidika was bayayahna dai.

¹⁸Kaput laih sirarau balna kidika papangnina yakat uiwak, witing yaklauwi diyulwi dakana: —¿Ampadawak warmani laih ma baisa aiwamanah?

¹⁹Dawak yayal balna yaklauwi nangnitlalana: —Egipto muihni as yaklauwi ilpkina kana sīp maintalyang balna niningnakauh, dawak bik was yakwi tinglau balna yakat bayahna dai.

²⁰Kaput laih Reuel yaklauwi diyulna: —¿Kidika alni angkat sakyah? ¿Ais yamta alas dapamnamanah? ¡Yawa kalyultanang kaiwi di kaswang!

²¹Kaput laih Moses witing Reuel ūni yakat watnadai, usnit Reuel yaklauwi witing walanibis yal Séfora kidika kalana dai yalni dunin,

²²kaput laih Séfora walanbis as yakna dai, dawak ayangni pakna Gersón[2] bahang kidika laih aput yulna: “Yang laih tringsar as yang pa tringsar pāni yakat.”

²³Ma balna bayakwi kiuna bahang kaput laih Egipto kingni dauna. Kaunah Israel balna lain ban kakaida dai warau lani yakat. Kaput laih Papang dakana dai kakaida kidika

²⁴dawak witingna yulnina kidika dakana, dawak Abraham, Isaac dawak Jacob karak bik pramis yamna dai kidika isningkatna dai.

²⁵Papang talna dawak bik amanglana witingna wawauhwa kidika.