Read Mayangna Éxodo 22 Bible Online

Éxodo 22 - Mayangna bible

Éxodo 22

¹“Muih as kat turuh kidika awaskat sīp malwarang, dawak iwarang, kidika awaskat wauhwi bakanwarang kat, turuh singka praisni lauwi kalawarang, sīp dai karang kat, sīp arungka kalana karang.

²“Di malyang as, di malwa kidika minitni yakat lalaihwarang dawak muihni yakat dadakwak dauwarang kat, dauna kidika muih yaklauwi īna laih kukulwas karang.

³Kaunah uman payahlana karang kat, dauna kidika kulna karang muih yaklauwi ihina. “Wais kat di malwarang kat, kidika dini minit kidika ampus kat kaput launa karang, kaunah lalah dis karang kat, witing muihni nuhni kidika wauhwi bakanpamwi di malna minit kidika lauwarang.

⁴“Tinglau malna kidika witing tingni yakat sakkat yayakwarang kat sangka, kidika dini minit kidika watbu praisni lauwi kalana karang, turuh karangpa, biriku karangpa, dawak kidika awaskat sīp karangpa.

⁵“Muih as kat tingnilau balna kidika di kakaswang ti uluhmukwak uiwarang kat, wain yamak yaihnitkau balna kapatnah kat, dawak witing tingnilau balna kidika muih ūk sauni yakat kawi di kakaswarang kat, kidika laih minitlauna karang witing sauni tanit yamni kidika karak, kidika awas bik wainni yamak tanit yamni kidika karak.

⁶“Muih as kuh biwarang, dawak kuhnipau kidika pan bikikisni yakat laihwi kiwi plawar minik dakwi ududuhna sakkat buswarang, kidika awas bik yanimak yakat minik bahnin manah kat buswarang kat dahna balna kidika bitik, kuh bina muihni kidika yaklauwi di daukalna balna kidika minitlauna karang.

⁷“Muih as kat witing muih ūk yakat kulnin kalkulwarang muih yamni, bahang kaput laih kidika muihni yakat lalah pa kidika awaskat di minit nuhni as tingni yakat āwarang, dawak kidika muihni ūni kaupak di balna dai kidika mamalwarang kat, di malyang kidika yaklauwi dini praisni kidika watbu minitlakwi lauwi kalana karang, muihni kidika lalaihwarang kat;

⁸kaunah sip lalaihwas dadawarang kat, ū dawan kidika duwi uiwarang Papang muhni yakat, kaput laih talna atnin witing kidika pasyakat tingni āwas pa kidika awas bik laihwas pa.

⁹“Muih as, turuh almuk as, biriku as, kidika awaskat sīp as laihwi duwarang kat, kidik awaskat asna kapat bik duna karang, di ūk ūk balna bik didisna karang kat, dini dawan kidika yaklauwi yulwarang kat, kidika muihni balna bu kidika duwi kiuna karang Papang muhni yakat, bahang angdika muihni dutni yamna karang kat, minit kidika watbu praisni lauwi kalana karang.

¹⁰“Muih as kat witing tingnilau balna, turuh pa, biriku pa, sīp pa, kidika awasbik tinglau ūk karang bik muih ūk tingni yakat āwak dauwarang pa, dalani duna karangpa, kidika awasbik mamalna karang kat, muih as bik talwas kat,

¹¹kidika muihni laih Dawan ayangni kau yakwi kalyulwarang tinglau daniwan yakat, witing tingni laihwas ki tinglau disna kidika. Dawak di dawan kidika, muih ūk yulni balna yulwa kidika dakana karang, kaput laih as kidika witing lauwas karang tinglau disna kidika yulni.

¹²Kaunah tinglau kidika mamalna karang laih witing talwa sakkat, di dawan yakat minit lauwi kalana karang.

¹³Tinglau kidika nawah satni balna kat īna karang kat, witing minit launin awas kulwa kat, tinglau dauna wakalni balna kidika duwi kiwi niningkanin karang.

¹⁴“Muih as yaklauwi muih ūk yakat kalyulwarang tinglau as wayaki kalawarang, bahang tinglau kidika dauwarang, kidika awaskat dalani duna karang kat didawan kidika dis kat, angdika muihni witing wayaki yulwi duna muihni kidika yaklauwi minitlauna karang;

¹⁵kaunah daniwan kidika sakdai kat, witing minit lauwas karang. Tinglau kidika wayaki yulwi duna dai kat minitlauwi kalana atnin, kaput laih minit ampus kalkulna dai kidika kat manah launa karang.

¹⁶“Muih as kat, yal sirau as baisa al kalpakwas, dawak bik al dunin pramis as dis kat, kidika yal yakat dutni kalyamna karang kat, kidika laih minitlauna atnin karang ki, nining amput lalauwa kidika yakat, dawak yal kidika duna karang witing yalni.

¹⁷Dawakat sirau papangni kidika kalanin yulwas karang kat, yalni dunin, muih yal sirau as baisa al kalpakwas kidika minit ampus nining lalauwa yakat launa karang.

¹⁸“Sitan parasni duyang balna kidika sangninaka karuk laih dadawinih.

¹⁹“Angdika muihni wahni dutwi tinglau karak dutni yamwarang kat, daunin yakat wirlana karang kidika muihni.

²⁰“Angdika muihni kat dawan dauh yakat sakripais yamwarang kat, Dawan yakat manah sakripais yamwas dawi, kidika muihni laih daunin yakat wirlana karang.

²¹“Tringsar yakat dutni kalyamwinih dawak bik taihwinih, kat manna bik Egipto yakat tringsar mana dai bahang.

²²“Tingmak balna yakat dutni diyayamwinih, dawak warau balna yakat bik,

²³kat witingna yakat dutni diyamtanang yang akat yayuyulwarang kat, yang witingna ilpnina yawaki,

²⁴kulnik daukalna karak, isparah kau, manna sangmanaka kidika daktik yakna awaki. Kaput laih wais balna tingmak kakalwarang kidika, dawak warau kakalwarang kidika balna laih manna yalmana balna dawak walamanabis balna karang ki.

²⁵“Yang tawanki pasyakat muih miniknakunni man karak balna yakat lalah wayaki diama kat, man laih muih kau lalah wayaki diayang muihni balna kapat laih yamwinih, dawak minitkau bik ilwi duwinih.

²⁶Kidika muihni witing lalah wayaki kalataman kidika yulni witing asnina kidika tingma yakat āwarang kat, nawatta kalatah, ma kakiwa kaput dawak,

²⁷kat kidik asnina laih kamanah duwi, witing sanni kat kalsuruhmnin. Kidika awaskat, ¿ais kau riwi minit yakat kalangwarangyah? Witing yang akat yayulwi ilp yulwarang kat, yang ilp kalana yawaki, kat yang laih minikun talnin kidika lan yang bahang.

²⁸“Papang yakat uswinih, dawak bik dutni kalyulwinih man tawanma yakat kabamint kāwa kidika yakat.

²⁹“Man di dahna man minik balna dawak wainma yanimak kaupak wain yaknaman balna bitik kidika, minitdis kalanin dini kidika laihwattas duaita yatah. “Walamabis al tatuna kidika laih yāma,

³⁰sihm kaput bik laih tumaruh walanibis tatuna kidika, dawak sīpma walanibis tatuna kidika bik yāma. Tinglau bin kidika nanangni karak tiaskaubu watna karang, kaunah ma tiaskaubās laihwa yakat laih yang akat yāma.

³¹“Manna laih ahal as yang diki alahwanamna ki. “Asangpas kau nawah balna di iwi dadana muihni kidika kakaswinih; kidika laih sul balna yakat diatanauh.