Read Mayangna Éxodo 25 Bible Online

Éxodo 25 - Mayangna bible

Éxodo 25

¹Dawan, witing Moses yakat kiwi kalyulna aput:

²“Israel balna yakat diyultang minitdis kalanin dini as uduhwi yayawang. Kidika laih uduhnin karang muih balna witingna kulninna yakat yakih kidika balna pasyakat walwi uduhnin karang;

³dawak walwi uduhnin kidika laih adika ki: gol, lalah, bras,

⁴asna paisa sa, paisa, asna pauni, linin asnina yamni balna kidika, kuts butuni,

⁵sīp unitak pauna kidika, di utak tanit yayamni kidika,[21] acacia panani,

⁶awas balna kidika awasni, dia wasni walapni muih tunan yakat utuhwi Papang dini yakwa kidika bik, dawak walapni busnin dini kidika bik,

⁷kipala pauni sa kidika, dawak kipala ūk balna tanit yayamni kidika sumalyang prakni nuhni kidika yakat ānin dawak sumalyang nuhni pasni kau yakat bik ānin.

⁸Dawak holi pāni as yamta yanatangkat kidika yakat yang yalahkuh witingna pasningna yakat.

⁹Kaunah kidika pāni yakat yang yalahnik kidika laih, ū paskau yalahnin dini kapat tibil balna kapat kidika laih, yang amput namangkaki kidika kaput palni yamnin karang.

¹⁰“Acacia panan kau baks as yamtah, kidika laih naini niningkauh metro as minit kau centímetro salap duwarang, dawak panuhni niningkauh laih centímetro 65 duwa karang, dawak maluihni niningkauh bik sihm centímetro 65 duwa karang.

¹¹Gol kau manah kahta latah paskau kidika dawak ahni kau kidika bik, dawak yaihnit awaih kidika kungni yakat gol kau lain as kahta latah.

¹²Dawak gol kau tuyuyulni yamtah arungka, dawak kalni arungka yakat ātah, pirini nakaskau bu dawak nakas yakat bik bu atah.

¹³Dawak acacia panan kau uhrlanin dini balna kidika yamtah, dawak gol kau manah kahta latah,

¹⁴dawak baksni sipintang balna kau sulihni uhrlanin balna dulyakat uhrlatah, kaput laih sipkarang kidika yakat laihwi dulaunin,

¹⁵dawak kidika kaupak watta yakwinih; kidika yakat bang datang dulkawang,

¹⁶dawak kidika baksni yakat āma yang lawik lā balna maki kidika.

¹⁷“Dawak putnin kidika gol kau manah yamtah, naini kidika laih metro as minitkau centímetro salap karang, dawak panuhni laih centímetro 65,

¹⁸dawak sangnika duwa dawak lawani balna bik duduwa kidika bu yamma gol kau, bahang kidika laih amar kau tista yamma, dawak sutni nakaskau as as lakma.

¹⁹Putnin kidika dawak di lawani duyang balna kidika laih aslah atnin ki, lawani duyang as kidika laih putnin sutni as yakat sakkarang, dawak ūk kidika laih sutni ūk yakat,

²⁰kalmuhpuk raukarang, kaunah muhnina kidika laih putnin kidika yakat muh raukarang, dawak lawanina balna kidika laih ririh raukarang, kaput laih baksni kidika muklak karang lawanina kau.

²¹Kidika usnit kat putnin kidika baks yakat putma, dawak kidika pasyakat lā maki kidika āma.

²²Kidika yakat man karak awaki, dawak putnin makau kidika lawani duyang balna rau kidika, pramis baksni minityakat, Israel balna yakat ais yamnin paktayang kidika bitik namangkaki.

²³“Acacia panan kau tibil as yamtah, naini kidika laih centímetro 90 karang, dawak panuhni kidika laih centímetro 45, dawak maluihni kidika laih centímetro 65 karang.

²⁴Gol kau manah kahtah bitik, dawak yaihnit yakat laih gol kau lain as kahta latah.

²⁵Ū rahni balna walsah kau kidika bik yamma, kidika laih panuhni centímetro tiaskaubu karang, dawak kidika yakat gol kau kahta lama lain as;

²⁶kaput bik gol kau tuyuyulni arungka yamtah, dawak sipintang arungka yakat atah, yuldarangkat kalni arungka yakat,

²⁷kaput laih rahni balna walsah kidika libitna karang, dawak sip karang panan uhrlawa balna kidika uhrlawi tinibil kidika dulauwi dukiuna atnin.

²⁸Acacia panan kau yamtah, tibil yakat uhrlawi dukiunin kidika, dawak gol kau manah kahtah,

²⁹plitni balna kidika bik gol kau manah yamtah, isnipun nunuhni balna kidika bik, was punin dini balna, sunitak balna, kidika laih minitdis kalanin dini was balna duwi uiwa kidika dini.

³⁰Yang muhki tani yakat, plawar busna yang akat yayawa kidika, nining ban kaput iltah tibil yakat.

³¹“Kaput bik awas ilnin pāni ūk yamtah gol kau, kaunah amar kau tista yamtah. Sau kau taihwa kidika, panan nuhni, awas ilnin pāni kudungni binina kidika bitik laih aslah yamna karang,

³²yaihnit balna kidika yakaupak tingni tiaskauas kalahna karang, bās kidika pirini as kaupak kalahwarang, dawak bās ūk balna kidika laih pirini nakas ukkaupak kalahwarang.

³³Tingni tiaskauas balna panan nuhni kaupak kalahwa balna kidika, tingni as kidika yakat awas ilnin pāni bās duwa karang, sihm dipulu sahna kapat karang wayani kidika.

³⁴dawak panan nuhni palni kidika bik awas ilnin pāni arungka duwarang, sihm dipulu sahna kapat.

³⁵Tingni tiaskauas panan nunuhni balna kaupak kalalahwa kidika, sar yakat awas laknin pāni as sakkarang tingni balna bitik kau.

³⁶Awas ilnin pāni binina kidika dawak tingni balna kidika aslah karang, bahang kidika laih gol kau manah yamna karang, amar kau tiswi.

³⁷Awas tiaskaubu yamtah, dawak iltah, bahang kidika balna laih muhnit niningyakauh yaringni kana karang,

³⁸dawak di itiswi dulaunin dini balna plitni balna kidika bik gol kau manah yamna karang.

³⁹Dutah gol kilo 33, kidika kau awas pāni kidika yamtah, dawak di dunin ūk balna kidika bik,

⁴⁰yamni tala yamma, asang kau wayani namangkakana dai kidika kaput.