Read Mayangna Éxodo 28 Bible Online

Éxodo 28 - Mayangna bible

Éxodo 28

¹“Israel balna paskaupak, wirahma Aarón kidika yaihmat yakat dutah dawak walanibis balna kidika bik Nadab, Abiú, Eleazar dawak Itamar, kaput laih yang sumalkiyang balna atnin.

²Man wirahma Aarón prakni kidika yamta kalatah tanit yamni as, kaput witing kidika yaringni tanit yaksihni atnin.

³Man yuldibautah kidika balna bitik kau, di sip balna kidika, dawak kidika balna yakat yang lawik sinsnina yakat diatingkat di lan kakalna balna kidika, kaput laih witingna Aarón prakni kidika bibiwarang, bahang kaput laih witing kidika yang diki yakna karang, yang sumalkiyang.

⁴Prak balna bibiwarang kidika adika karang: pasni kau alahwarang dini kidika, prakni tingni kakahlni minit kau kāwa kidika, prakni naini dinitkau kāwa kidika, dawak linin asnina tunan sitwa kidika, dawak banimak sitwa kidika bik. kaput laih man wirahma prakni kidika tanit yamni yamma, dawak walanibis balna praknina bik, kaput laih yang sumalkiyang balna kapat wark yamna atnin.

⁵Prak yayamwarang balna kidika gol kau bik duwi yayamwarang ki, asna paisa sa, paisa, pauni dawak linin asnina wirna balna kidika kau bik.

⁶“Prakni tingni kakahlni minitkau kāwa kidika laih gol kau yamna karang, asna paisa sa, paisa, pauni dawak linin asnina wirna kidika kau bik yamna karang, dawak prakni kidika yamni trit kau ulna karang

⁷dawak sutni yakat wahni bu yakna dulkarang.

⁸Prakni tingni kakahlni minitkau banimak sitnin dini kidika laih prakni nuhni kidika karak aslah libitwi yamna karang, bahang kidika bik gol kau yamna karang, asna paisa sa, paisa, pauni, dawak linin asnina wirna kidika kau bik yamwarang.

⁹“Kidika usnitkat kipala pauni sa kidika bu duma, dawak kidika yakat Israel walanibis balna ayangnina kidika ulma,

¹⁰tatuna batahna kidika kaupak; kipala as yakat ayangni tiaskauas ulma, dawak tiaskauas ūk balna kidika laih kipala ūk yakat ulma.

¹¹Kipala yakat ayangnina ulwarang muihni kidika laih, gol kau di yamyang muihni as kat ulna karang, amput tamp taihwa kidika kapat yamna karang. Kidika usnit kat kinipala balna kidika gol minit yakat ilta birma,

¹²dawak dini balna kidika prakni tingni kakahlni kau wahni yakna dulkidika yakat āma, kidika kinipala balna laih Israel walanibis balna kidika yakat isningnakatwa atnin yulni karang. Kaput laih Aarón witing salahni yakat witingna ayangnina kidika duwi kiwarang Dawan muhni yakat, witing isningkatwa atnin yulni.

¹³Kinipala balna ilwi taihwarang dini kidika laih gol kau yamma;

¹⁴kidika usnit kat sīn bu yamtah gol kau, dawak ilwi taihnin dini yamna kidika yaihnit yakat laktah.

¹⁵“Pasni kau alahnin dini, dawak la barangni kat yamnin dini balna kidika laih sihm prak nuhni tingni kakahlni yamnaman kaput yamma, yuldarang kat, yamni trit kau ulma. Gol kau yamma, asna paisa sa, paisa, pauni dawak linin asnina wirna kidika kau bik,

¹⁶kidika laih lalam bu karang dawak bik rabutni karang, pirini balna kidika centímetro 22 karang.

¹⁷Minit yakat kipala minit nunuhni balna kidika manah atah, parna arungka. Tatuna parna as kidika laih kipala pauni, lalahni sang kapat, dawak sangni dibasta kapat kidika balna karang;

¹⁸dawak parna bu kidika laih, kipala pauni yaringni kidika, sangni kidika, dawak sangni dibasta kapat paruh kidika karang;

¹⁹parna bās kidika laih, pauni sa, bulni yaringni dawak paisa;

²⁰dawak parna arungka yakat laih, kipala lalahni, pauni sa dawak kipala bulni.[22] Kinipala balna kidika laih gol kau laihwi birna karang,

²¹dawak kidika balna laih 12 karang, kat Israel walanibis balna kidika laih 12 bahang. Kinipala balna kidika as as yakat tamp kapat birna karang Israel sulani balna ayangnina 12 kidika as as.

²²“Pasni kau alahwarang dini wahni kidika laih sīn as yamtah gol kau, kidika laih wah labuna wiwir kapat yamma.

²³Kaput bik laih tuyuyulni bu yamtah gol kau, dawak pasni kau alahwarang dini sipintang bu yakat atah;

²⁴kidika usnit kat sīn binina bu kidika, pasni alahnin dini sipintang kau tuyuyulni bu ānaman kidika yakat alahtah,

²⁵dawak sutni balna kidika laih uita libitma kipala gol kau birna kidika balna bu yakat, dawak kidika laih prakni tingni kakahlni yakat yamni laihwarang muhnit niningkauh yakat.

²⁶Dawak tuyuyulni kidika baisa bu yamtah gol kau, dawak pasni kau rabutni alahwa sipintang sutni sau kau yakat atah, prakni tingni kakahlni karak libitna yakat.

²⁷Dawak baisa minit yakat tuyuyulni balna kidika bu yamtah gol kau, dawak prakni nuhni tingni kakahlni kidika muhnit niningkauh wahni balna dulkidika yakat atah, kaunah dinit niningkauh biwi lana yakat, dawak banimak minit kau yakat.

²⁸Kaput laih tuyuyulni balna kidika dawak pasni kau alahwa kidika yakarak libit sitwarang wahni paisa sa kidika karak, kaput laih pasni kau alahna kidika banimak minityakat watwarang, dawak bil silp silp awas karang.

²⁹Dawak kaput laih Aarón kidika holi pāni yakat kawi pasni kau alahnin dini la kat yamwa kidika duwi kiwarang, dawak bik witing pasni minit yakat Israel walanibis balna ayangnina kidika duwi kiwarang Dawan muhni tani yakat, kaput laih witing ban isningkatwa atnin kidika.

³⁰Pasni kau alahwa dini Urim dawak Tumim yakat atah, kidika la barangni yamnin dini, kidika dini laih Aarón witing pasni yakat duwi kiwarang Dawan muhni yakat kiwarang balna yakat. Kaput laih nining duwi kiwarang Aarón witing pasni yakat, la barangni yamnin dini balna kidika Dawan muhni yakat.

³¹“Asna paisa sa kidika kau prakni nuhni tingni kakahlni kidika yamtah,

³²papus kau yakat ahlma tunan kawi bayaknin kidika. Dawak prakni kungnimak balna kidika pitul-āwi binin karang, sihm di unitak kau prak kapat minit yakat kakawa kapat, kidika laih biswas atnin yulni.

³³Kalmukwarang asnina kidika kungni yakat trit kau ulma granado minik balna kidika asna paisa sa kau, dawak asna pauni kau bik, dawak bīl binina wayani karak wirih yamma kungni yakat;

³⁴yuldarang kat, bīl wayani as yamwarang dawak kidika kaupak usnit yakat granado minik kidika wayani as yamwarang, kaput laih wirih yamwi kiwarang kungni bitik kidika.

³⁵Aarón witing sumalyang kapat warkni yamna kiwarang yakat prakni balna kidika kawi kiunin karang, Dawan muhni yakat kiwarang kidika, dawak mahka nawatwi kalahwi kiwarang kidika bik, bīl binina lingwa kidika dakana karang, kaput laih witing dauwas karang.

³⁶“Gol kau labanni as yamtah, dawak kidika yakat yamtah sihm tamp kapat yulni balna ‘Dawan dini yakna’.

³⁷Gol kau labanna dini kidika tunan sitwa asnina yakat atah, muhnit niningyakauh, bahang kidika laih wahni paisa sa kau sitma pamni atnin yulni.

³⁸Kaput laih ban pakkarang Aarón sapani yakat, dawak kaput laih Aarón witing trukna karang Israel muihni balna dutni yayamwa bitik kidika, holi dini balna kidika niningyakat, minitdis kalanin dini balna Dawan dini yayakwarang balna yakat bik; kaunah gol labanni duwa kidika yulni laih Dawan ban kidika minitdis dini dukiwi kalalawa kidika duna karang.

³⁹“Linin asnina kau prakni kidika bitah dawak bik trit kau ultah, kaput bik laih tunan sitwa asnina kidika bik linin asnina kau yamtah. Dawak banimak sitwa kidika bik yamni trit kau ulna karang.

⁴⁰Aarón walanibis balna kidika laih praknina nuhni barangni aslah kidika bita diatah, baninamak sitnin dawak tunanina sitnin kidika bik yamta diatah, kaput laih witingna kidika yaksasihn karang.

⁴¹“Kaput laih wirahma Aarón dawak walanibis balna kidika bik praknina bima, dawak kidika usnit kat tunanina yakat dia utuhma, bahang kaput laih parasni kidika bitik palni duduna karang, dawak yang sumalkiyang balna yamma.

⁴²Kaput bik laih ipnina kidika linin asnina kau yamta diama, baninamak kaupak barahninamak kat muklakna karang,

⁴³dawak Aarón, witing walanibis balna, kalpaknin ūni labanni yakat uiwarang kat, kidika kawi uinin karang, kidika awas bik sakripais busnin pāni yaihnit yakat uiwarang kat, sumalyang kapat holi pāni yakat wark yayamwarang mani balna yakat, kaput laih di yamnin dini awasdai kidika yamwi dadauwas karang. Adika laih lā as nining ban kaput karang, witing sulani balna kau bik.