Read Mayangna Éxodo 3 Bible Online

Éxodo 3 - Mayangna bible

Éxodo 3

¹Moses laih witing unisah Jetro,[3] Madián sumalniyang nuhni dai kidika sīpni balna maintalwa dai, ma as kat kauhmak wanilang munah duwi kiuna dai, Papang asangni kat ayangni laih Horeb.[4]

²Kidika yakat Dawan innisal as lāih kalahna, dai pan wakal as dahlwa munah. Moses witing yamni talwak pan wakal duwa kidika daihwa sakdai kaunah sip buswi bayakkiwas dai.

³Kaput laih witing kulna: “¡Di taldas dini as yah! Yawik talki amput dawak pan wakal dahlwa kidika dahnkalwas banyah.”

⁴Dawan talwak Moses kidika dahlwa yaihnit yakat kiwak, dahlwa sakkidika kaupak kalyulna: —¡Moses, Moses! Dawak Moses yaklauwi kalyulna: —Akat sakyang.

⁵Kaput laih Papang yaklauwi kalyulna: —Yaihnit yakat kiwinih. Susma kidika yaktah, kat man lawana sakman pāni kidika laih maisihni diski.

⁶Dawak baisa minit yakat lakwi kalyulna: —Yang kuduh man muihma bararak balna Papangnina yang. Yang Abraham, Isaac dawak Jacob Papangni yang. Kaput laih Moses muhni putna dai, kat Papang yakat talnin kidika yamaduna dai bahang,

⁷kaunah Dawan baisa yulwadai: —Lāih palni talnayang, tawanki ampus wauhwa kidika Egipto yakat, wark tunan muihni balna yaklauwi diyayamwa kidika yulni, yang yamni amanglatayang ampus wawauhwa kidika.

⁸Kidika bahang aiwayang Egipto muihni balna parasnina kaupak manalaihtik dakyaknik; adika sauni kaupak manayaktik manaduyawaki, sau ūk nuhni yamni yakat, tāwas dawak amak kidika balna was kapat kira kidika. Kidika pāni yakat kuduh cananeo balna yalalahwa kidika, hitita balna, amorreo balna, ferezeo balna, heveo balna, dawak jebuseo balna.

⁹Talah Israel balna dalani wauhwi yuyulwa balna kidika dakanayang, dawak dibilnayang Egipto muihni balna yaklauwi tataihwa kidika.

¹⁰Kaput bahang mahka ta yakat alahwa lapaktah, yang masihki ki fero muhni yakat, kaput laih yang tawanki Israel kidika Egipto kaupak yakna atnin.

¹¹Kaput laih Moses yaklauwi Papang yakat kalyulna: —¿Yang adika waisyang fero muhni yakat yawik Israel balna kidika Egipto kaupak yakkiyah?

¹²Papang yaklauwi nangnitlana: —Yang man karak awaki, dawak adika sainni kuduh yang lawik masihtayang kidika: Egipto kaupak yakma kat, manna Israel balna bitik mana kidika adika sangni akat aiwa ayangni nuhni yamtanama.

¹³Moses yaklauwi nangnitlana: —Yang yawik Israel balna yakat diyulki kat: ‘Muihmana bararak balna Papangnina yaklauwi yasihna kidika’, witingna yayulwi dakakawarang: ‘¿Ayangma aisyah?’ Dawakat, ¿ais diyulkiyah?

¹⁴Dawak Papang yaklauwi kalyulna: —YANG KUDUH, YANG KIDIKA. Dawak Israel balna yakat diyulma: ‘YANG KUDUH yasihna manna akat.’

¹⁵Baisa kidika minit yakat Papang yaklau Moses yakat kalyulna: —Israel balna yakat bik diyultah: ‘Dawan, manna muihmana bararak balna Papangnina, Abraham, Isaac dawak Jacob Papangnina kidika yaklauwi yasihna manna akat.’ Adika kuduh yang ayangki ban kaput kidika, adika kuduh yang ayangni kurih andat bayakwarang bik ban karang kidika.

¹⁶Yawa, Israel muihbarak balna kidika uduhta diyultah: ‘Dawan, manna muihmanabararak balna Papangnina, Abraham, Isaac dawak Jacob Papangnina kidika, yang akat lāih kalahwi yayulna, waralaih manna yulmana kidika laihwi talwi, dawak bik Egipto akat amput manayayamwa kidika.

¹⁷Dawak bik yayulna, Egipto akat wauhtaman kidika kaupak manalaihwi yakwarang ki, dawak manaduwi kiwarang ki, cananeo, hitita, amorreo, ferezeo, heveo dawak jebuseo balna saunina yakat; bahang kidika pāni laih sau as tāwas dawak amak kidika bik was kapat kira kidika.’

¹⁸Muih bararak balna kidika yulna dakawarang; kaput laih witingna karak kalpakta Egipto kingni yakat talna yawanama, dawak kalyultanama: ‘Dawan, hibru balna Papangnina kidika yangna nikingnakauh kalahna. Kaput bahang yanadatang kauhmak wanilang yakat yanadatang yawanakuh, ma bās lapaktik yawinikna praisni, bahang yakat Dawan Papangkina yak sakripais busna atnikna.’

¹⁹Kaput kaunah yang amanglatayang, Egipto kingni kidika manadawak alahwas awanama, parasni kaupak awaskat.

²⁰Kaput bahang, yang paraski kidika niningnakaki, dawak wah diaki daunin wahni Egipto muihni balna yakat, dawak di taldas dini kidika yamna awaki witingna saunina yakat; kidika usnit dawak fero yaklauwi dawak alahwanama.

²¹Baisa minit yakat, yang lawik yamting kat Egipto muihni balna yaklauwi yamni ditatalna karang. Kaput laih kalahwi uiwarang kat tingnina manah laih kalahwi uiwas karang.

²²Yayal bitik yaklauwi yaihnitna kau muih balna yakat di yulwi duduwarang yayal ūk balna yakat, gol kapat dawak lalah kapat bik, kaput bik asna bik yuyulna karang, kaput yamwi, Egipto muihni balna dinina bitik laih dakyayakna karang.