Read Mayangna Éxodo 30 Bible Online

Éxodo 30 - Mayangna bible

Éxodo 30

¹“Kaput bik laih acacia panan kau sakripais busnin pāni as yamtah, kidika yakat walapni busna atnin.

²Kidika laih rabutni atnin ki, naini laih centímetro 45 atnin karang, dawak panuhni bik sihm centímetro 45 karang, dawak maluihni laih centímetro 90 karang, dawak sakripais busnin pāni kidika tamni balna kidika laih barangni aslah karang sakripais busnin pāni kidika karak.

³Dawak makau kidika laih gol kau manah kahwilana karang, pirini arungkapak, dawak tamni balna bik, dawak yaihnit awaih yakat gol kau lain as āta lama.

⁴Kaput bik laih gol kau lain awi bayakna dinit yakat gol kau tuyulta āma, sipintang as kau yakat bu āma, dawak nakaskau kidika sipintang yakat bik bu āma, kidika munah uhrlanin panan balna kidika uhrlana karang, laihwi dulauwi duwi kiunin yulni.

⁵Acacia panan kau uhrlanin panan kidika yamma, dawak gol kau manah kahta lama.

⁶Sakripais busnin pāni kidika duyawa lakma tunan muknin yakat, pramis baksni yaihnit kau kidika, kaput bik laih putnin minitkau mukwa kidika muhnit yakat, kidika yakat man karak kalpakki kidika.

⁷Mapiris bitik yakat, awas balna ridi yamni awarni yakat, Aarón laih kidika sakripais busnin pāni minit yakat walapni buswarang,

⁸kaput laih maulah yakat bik busna karang, awas dahlnin awarni yakat. Adika laih Dawan muhnit yakat yamma nining ban kaput kurih andat balna bayakwarang karang bik.

⁹Kidika walapni busnin pāni yakat walapni ūk balna busnin awaski, sakripais karauni kauna buswa kidika bik yamnin awaski, plawar minik minitdis kalawa balna kidika, dawak wain minitdis kalanin kat utuhwa kidika bik yamnin awaski.

¹⁰Adika sakripais busnin pāni laih Dawan witing manah dini yakna karang, wat aslah yamna karang Aarón kidika sakripais busnin pāni kidika tamni balna minit yakat ā kidika duwi kiuna karang, dutni dawak disnin sakripais buswa āni kidika. Kurih as pasyakat wat as yamna karang kurih balna bitik yakat, kidika sakripais busnin pāni minit yakat sakripais yamna karang dutni dawak disnin sakripaisni kidika.”

¹¹Dawan yaklauwi Moses yakat kiwi kalyulna:

¹²“Israel balna ayangnina kidika bitik āma kat, witing bitik laih Dawan yakat di as kalalana karang, witingna sangninaka laihwi yaknin yulni, daunin wahni kidika dis atnin yulni, ayangnina āwa kidika yulni.

¹³Ayangnina ahawa bitik kidika Dawan yakat kalalana karang lalah gramos singka, kidika laih holi pāni lalahni papusbah bahang.

¹⁴Kurih 20 minitkauh duduwa balna ayangnina ahana bitik kidika, kaput Dawak yakat kalalana karang,

¹⁵witingna bitik Dawan yakat kalalawarang kidika, sangninaka laihwi yaknin yulni, di duyang kidika minitkau laih kalawas karang, dawak muih minikunni kidika bik kuihwas laih kalawas karang.

¹⁶Kaput laih Israel balna witingna sangninaka laihwi yaknin yulni lalah duahaiwa kidika uduhma, dawak kalpaknin ūni labanni kau prias yayamwa kidika yakat uita āma. Kidika yaklauwi yamwak Dawan kidika isningkatwarang Israel balna yakat, kat witingna sangninaka laihwi yaknin yulni kalalana kidika.”

¹⁷Dawak yaklauwi Moses yakat kiwi kalyulna:

¹⁸“Ting suhnin dini as yamtah bras kau, dawak uknin panani kidika bik sihm bras kau yamtah kidika yakat ting suhna atnin; dawak kalpaknin ūni labanni dawak sakripais busnin pāni kidika walsah yakat uita laktah, dawak was utuhta buhng datah.

¹⁹Aarón dawak walanibis balna bik kidika kaupak was yakwi tingnina dawak kalnina bik susuhna karang.

²⁰Kalpaknin ūni labanni yakat uiwi kakawarang kat susuhna karang, kaput bik laih sakripais busnin pāni yaihnit yakat uiwarang kat wark yamna atnin, Dawan yakat minitdis kalanin dini kidika busnin. Kaput laih witingna dadauwas karang.

²¹Witingna dadauwas atnin kat tingnina, kalnina suhnin karang. Adika laih LA-a as ban kaput karang Aarón yakat dawak sulani balna kau bik, kurih andat balna bayakwarang bik.”

²²Dawan yaklauwi Moses yakat kiwi kalyulna:

²³“Man lawa dibasta balna walalapni kidika walta yaktah, tanit walapni yamni kidika kilo tiaskauas, dawak canela kidika kilo bās, dawak suku walalapni kidika bik kilo bās;

²⁴Casia kidika kilo tiaskauas —holi pāni paunni kidika kau— dawak kilo bās minitkau papusbah olib salani.

²⁵Adika balna bitik kau holi dini kidika yamma, adika dini kau utuhwi yang diki yakwa kidika, di walapni yamyang amput di walapni yamwa kaput. Adika laih dia as holi karang, adika kau utuhwi yang diki yakwa kidika,

²⁶dawak kalpaknin ūni labanni yakat utuhna karang, pramis baksni yakat bik,

²⁷tibil dawak minit kau di yusyamwa balna kidika bitik yakat, awas balna panina yakat di yusyamwa balna yakat bik, dawak walapni busnin pāni minityakat bik,

²⁸sakripais karauni kauna buswa pāni minit yakat, dawak di balna yusyamwa kidika bitik, tingsuhnin dini kidika bik.

²⁹Kaput yamta yang diki balna yakma, bahang kidika dini balna laih holi palni karang; ais dini karangbik libitwarang kat kidika laih yang diki kalna karang.

³⁰“Sihm kidika dini kau Aarón minit yakat utuhma, dawak walanibis balna minitna yakat bik, kidika laih yang diki kakalna karang, yang sumalkiyang balna,

³¹dawak Israel balna yakat adika yulni diyultah: ‘Kurih andat balna kaiwi bayakwarang bik, kidika laih yang diaki holi karang.

³²Muih ahal pini balna minitna yakat utuhwinih, dawak dia ūk apat bik yayamwinih. Adika laih dia as holi ki, bahang holi dini kapat dunamna karang.

³³Muih as kat adika dini apat yamwarang, dawak muih pini balna yakat utuhwarang kat, witing wanaihni balna paskaupak ipamna karang.’ ”

³⁴Dawan yaklauwi Moses yakat kalyulna: “Sihm kaput duma dini balna kidika mahni: pan yani, tipisnimak walapni, walapni busnin dini dawak gálbano panan walapni kidika bik,

³⁵dawak kidika dini balna yakau, walapni busnin dini holi kidika yamma, yamni bahama, di walapni kalnin dini yamyang yamwa kapat.

³⁶Kidika dini apis duta yamni lungni tikma, dawak pramis baksni muhnit yakat lakma, kalpaknin ūni labanni kiwi kāwa kau yakat, yang mankarak kalpakki pāni yakat. Adika walapni busnin dini adika laih tanit holi karang manna namangna yakat,

³⁷dawak manna yusyamnamna dini kidika sihm apat yamnamna awaski. Kidika laih Dawan dini, dawak man namangyakat laih Dawan dini yakwa kidika karang.

³⁸Wais kat di walapni sihm apat yamwarangkat witing yusyamnin dini, kidika muihni laih ipamna karang wanaihni balna paskaupak.”