Read Mayangna Éxodo 36 Bible Online

Éxodo 36 - Mayangna bible

Éxodo 36

¹Kaput bahang Bezaleel dawi Aholiab, dawak angdika muihni balna di satni yamwi sip kidika, dawak angdika muihni balna yakat Dawan yaklau sins lani diana kidika, kidika muihni balna yaklau prias yamnin holi pāni yakat yamnin dini balna kidika yayamna karang.”

²Moses yaklau Bezaleel dawak Aholiab dawi muih balna di satni yamwi sip balna kidika, dawak Dawan yaklau sins lani diawak witingna silp kulninna lani kidika warkni yakat laihwi ilp diayana kidika yakat diyulwak uina dai.

³Witingna laih Moses tingni kaupak dudunadai Israel muihni balna yaklau minitdis kalanin dini duahaina dai kidika, holi pāni yakat prias kau dunin dini balna kidika mahka yamna atnin yulni. Kaput bik Israel muihni balna kidika laih taihwatwas ma bitik yakat minitdis kalanin dini balna kidika duahaiwadai.

⁴Bahang di satni yamyang balna holi pāni yakat di dunin dini balna yamwabangdai kidika laih, warknina kidika laihwatwi uina

⁵Moses yakat kalyulna atnin: “Muih balna kidika laih Dawan yaklau wark yamnin yulna dini balna kidika minitkau duahaiwi.”

⁶Moses laih ū lababanni balna kidika bitik yakat diyulna dai muih al dawak muih yal karang bik baisa minitdis kalanin warkni kidika yamnin awas holi pāni warkni kidika yakat. Kaput laih tawan muihni balna yakat diyulwak minitdis kalanin dini kidika duahaiwas dadana dai,

⁷kat wark yamnin dini balna kidika dis laih awasdai, kaunah minit bayak dai.

⁸Di satni yamwi sip balna kidika wark ūk muihni balna kidika karak dawakat, kidika balna yaklau holi pāni kidika yayamna dai. Dūr asnina salap yayamna dai linin asnina wirna kau, asna paisa sa, asna paisa dawak asna pauni kau bik, kidika yakat di lawani bu karwi yayamna dai.

⁹Dūr asnina as kidika naini niningkauh laih metro 12 minitkau papusbah duwadai dawak pirihta niningkauh laih metro bu duwadai. Bitik kau kaput duduwadai.

¹⁰Dūr asnina singka kidika laih libitwi tilawi bibina dai, ūk balna singka kidika bik sihm kaput yayamna dai.

¹¹Usnit kat wahni paisa sa buas ahana dai uduhna as kau dūr asnina minitkau pakkidika kungni yakat, dawak uduhna ūk kau dūr asnina dinitkau pakkidika kungni yakat bik sihm kaput ahana dai.

¹²Dūr asnina uduhna tatuna kidika yakat dawak uduhna ūk kidika yakat bik sihm wahni 50 ahana dai, kaput laih wahni balna kidika muhnitna kat kat wahni balna ūk kidika as as wawatna dai.

¹³Kaput bik gol panani rahni 50 yayamna dai dūr asnina uduhna as kidika minityakat ūk kidika ilwi alahna atnin, dawak kaput laih holi pāni kidika bitik palni awaihdaklana dai.

¹⁴Bezaleel bik dūr asnina salap yamna dai kuts butuni kau, kidika kau -ū labanni as yamwak holi pāni kidika minityakat muklakna atnin yulni.

¹⁵Dūr asnina as kidika naini niningkauh laih metro 13 minitkau papusbah duwadai, dawak pirihta niningkauh laih metro bu duwadai. Bitik kau laih sihm kaput duduwadai.

¹⁶Dūr asnina balna singka kidika laih aslah libitwi bina dai, dawak ūk balna kidika laih tiaskauas libitwi bina dai.

¹⁷Usnit kat wahni 50 yamna dai dūr asnina uduhna as minitkau pakkidika kungni yakat, dawak wahni 50 ūk yamna dai dūr asnina dinitkau pakkidika kungni yakat.

¹⁸Kaput bik bras panani rahni 50 yamna dai ū labanni kidika bitik palni awaihdaklana atnin yulni.

¹⁹Bezaleel laih ū labanni kidika sīp almuk unitak kau daklawi pauni kahna dai, dawak minitkau kidika laih unitak yayamni balna kau daklana dai.

²⁰Usnit kat acacia panani kau tat yamna dai holi pāni kidika dini, dawak yamni papat lakna dai.

²¹Tat as kidika naini niningkauh laih metro arungka minitkau papusbah duwadai, dawak pirihta niningkauh laih centímetro singka duwadai,

²²dawak sutni balna yakat rahna bu duwadai kidika yakat tat ūk karak kawi kaswi laihwatwa dai. Holi pāni tatni balna bitik laih kaput yamna dai.

²³Wadah niningkauh kidika laih tat 20 yamna dai,

²⁴dawak kidika balna dinityakat rahni lalah kau yamna balna kidika 40 dungna dai. Tat as kidika laih dinityakat rahni bu duwadai, sutni kau rahna balna bu kidika dini.

²⁵Kaput bik holi pāni nakas niningkauh kidika, yuldarangkat tingpal niningkauh kidika, tat 20 yamna dai

²⁶rahni balna lalah kau yamna kidika kauna, kaput karak tat as kidika yakat rahni bu duna atnin yulni.

²⁷Holi pāni dangnitkauh kidika laih, yuldarangkat ma kawa niningkauh, tat tiaskauas yamna dai,

²⁸dawak baisa tat bu yamna dai holi pāni dangnitkau sipintang balna kidika dini.

²⁹Adika tatni balna laih wanaihnina karuk dai, dawak aslah libitni bangdai makau tingni ānin tatuna sakkidika kat. Adika aput yamna dai sipintang balna dini tat bu dai kidika karak,

³⁰kaput laih tat tiaskaubās bangdai rahni balna 16 kidika lalah kau yamna karuk, dawak tat as kidika dinityakat rahni balna bu bu duduwadai.

³¹Bezaleel witing acacia panani kau kuswi kararauni singka yamna dai holi pāni nakas tatni balna kidika dini,

³²holi pāni nakas ūk tatni balna kidika dini ūk singka kuswi karauni yamna dai, dawak dangnit niningkauh kidika dini bik sihm singka kuswi kararauni yamna dai, ma kawa niningkauh dai kidika.

³³Papuskau pan karauni kuswi -ana atnin yamna kidika laih sutni balna kidika kapapat watna atnin yamna dai tat balna kidika papusyakat.

³⁴Usnitkat tatni balna kidika minityakat gol kau kahwi lanadai, dawak gol kau tuyuyulni yamna dai kidika pasmunah pan kusna karauni minitkau gol kahna kidika bayakna atnin.

³⁵Kidika minityakat tunan mukwa asnina yamna dai, asna paisa sa kau, asna paisa kau, asna pauni kau dawak linin asnina wirna kau bik, dawak kidika yakat di lawani bu tingkau karwi yamna dai.

³⁶Usnitkat, gol panani rahni buas kidika, acacia panani mayakat ilwi alahna dai, kidika balna laih minityakat gol kau manah kahwi lanadai lalah panani rahni arungka minityakat.

³⁷U labanni kiwikawa yakat dūr asnina balna yamna dai, asna paisa sa kau, paisa kau, pauni kau dawak linin asnina wirna kau bik, kidika balna laih tingkau di satni balna wayani kakarna dai.

³⁸Kaput bik pan rahni karuk singka yamna dai uknin panani bras kau yamna kidika bik singka, dawak pan rahni balna sutni makau kidika dawak tingni -ānin balna kidika laih minityakat gol kau kahna dai.