Read Mayangna Éxodo 38 Bible Online

Éxodo 38 - Mayangna bible

Éxodo 38

¹Bezaleel laih sakripais karauni kauna busnin pāni kidika acacia panani kau yamna dai. Kidika laih rabutni dai, pirini arungkapak kidika metro bu minitkau centímetro 25 duwadai, naini niningkauh dawak pirihta niningkauh bik sihm kapat, dawak maluihni niningkauh laih metro as minitkau centímetro 25 duwadai.

²Sipintang balna arungka yakat tamni as as yamna dai, kidika balna laih sakripais busnin pāni kidika karak libitni aslah dai dawak bik minit kidika bras kau kahna dai.

³Sakripais busnin pāni yakat dunin dini balna kidika bik bras kau manah yamna dai, wan punin dini, subil, sutak nunuhni, park dawak kuh tuturni punin dini balna kidika kauna.

⁴Bras panani lakwi pardawi birna kidika bik as yamna, dawi sakripais busnin pāni yaihnit kidika dinityakat lakna dai, sakripais busnin pāni kidika bamak yakat.

⁵Tuyuyulni arungka bik yamna, bras panani lakwi pardawi birna kidika sipintang balna yakat dini, kidika munah pan kuswi karauna balna kidika uhrlana atnin.

⁶Usnitkat acacia panani kau kuswi karauni yamna dai sakripais busnin pāni kidika dini, kidika balna laih minit kidika bras kau kahna dai,

⁷dawak sakripais busnin pāni pirini kau tuyuyulni bangdai kidika munah uhrlana dai, kaput karak pa ūk kau duwi kiuna atnin. Sakripais busnin pāni kidika laih kudungni yamna dai tat kau.

⁸Bezaleel laih kalpaknin ūni labanni kau yayal balna kaltatalwa wayanital balna[29] bangdai kidika kau, bras kau ting suhnin dini as yamna dai dawak rahni kidika bik sihm bras kau yamna dai.

⁹Bezaleel laih watak kidika yamna dai. Wadah niningkauh watak rinin asnina linin wirna kidika metro 45 duwadai.

¹⁰Pan ukna balna kidika dawak ū rahni balna kidika laih bras kau manahdai, dawak pan rahni balna dawak ting-ānin balna kidika laih lalah kau manah yamna dai.

¹¹Tingpal niningkauh dūr rinin asnina naini kidika laih metro 45 duwadai, ū rahni dawi uknin panani bras kau 20 yamna kidika kauna, dawak panani rahni dawi ting-ānin balna kidika laih lalah kau yamna dai.

¹²Ma kawa niningkauh dūr rinin asnina naini kidika laih metro 22 minitkau papusbah duwadai, ū rahni salap dawi uknin panani salap karak. Uknin panani rahni balna kidika dawak ting-ānin balna kidika laih lalah kau yamna dai.

¹³Ma kilwa niningkauh dūr rinin asnina naini kidika laih metro 22 minitkau papusbah duwadai.

¹⁴Kiwikawa kaupak nakas kidika laih dūr rinin asnina naini metro tiaskaubu duwadai, ū rahni bas dawak uknin panani bik bas;

¹⁵dawak nakas ūk kidika laih, watak kiwikawa nakaskau kidika dūr rinin asnina naini metro tiaskaubu bu duduwadai, ū rahni bas dawak uknin panani bik bas.

¹⁶Watak yaihnitkau dūr rinin asnina balna kidika bitik laih linin asnina wirna manahdai.

¹⁷Uknin panani ū rahni dini balna kidika laih, bitik bras kau manahdai, ū rahni panan rahni balna kidika laih lalah kau yamna dai, dawak ū rahni balna makau kidika laih minittang kidika lalah kau kahna dai. U rahni balna watak kau bangkidika laih bitik kidika ting-ānin duduwadai.

¹⁸Watak kiwikawa kau rinin asnina kidika laih yamni palni karna dai asna paisa sa, asna paisa, asna pauni dawak linin asnina wirna kidika bik minityakat. Kidika naini niningkauh laih metro tiaskauarungka duwadai dawak maluihni niningkauh laih metro bu minitkau centímetro 25 duwadai, sihm watak rinin asnina balna kapat.

¹⁹Ū rahni arungka dawak uknin panani bras kau yamna arungka duwadai; panani rahni balna dawak tingni ānin balna kidika laih lalah kau yamna dai, dawak ū rahni balna makau kidika laih, minittang kidika lalah kau kahna dai.

²⁰Holi pāni dawak watakni yakat pan subangwi awaihna dai kidika laih bras kau manah yamna dai.

²¹Moses yaklau yamnin yulna kaput dawak sumalyang Aarón walanibis al Itamar tingni dinit munah, levita muihni balna kidika, holi pranimis ūni yayamna yakat ayan satni balna duwi di yayamna kidika kulwi yayakna dai.

²²Bezaleel, Uri walanibis al dawak Hur mani, Judá sulani kaupak dai kidika, Dawan yaklau Moses yakat yamnin kalyulna dai kidika bitik yamna dai.

²³Dan sulani kaupak Ahisamac walanibis al Aholiab yaklau ilp kalana dai, Dan laih ayan yamyang dai, wahmak buhrwi asna yamwadai dawak asna paisa sa, asna paisa, asna pauni dawak linin asnina yamni kidika bik karwadai.

²⁴Gol bitik kau duwi holi pāni yakat dunin dini balna yamna kidika, kidika laih Dawan yakat minitdis kalanin golni kau duwi yayamna dai, dawak kidika bitik laih holi pāni kidika gol manah tikini 1930 paun duwadai.

²⁵Muih ayangnina ahana balna bitik yakat lalah ududuhna kidika laih, lalah manah tikini 6,630 paun duwadai holi pāni kidika.

²⁶Muih ayangnina ahana balna bitik, kurih 20 minitkauh duduwa balna kidika bitik kat muih 603,550 dai, dawak witingna muihnina kat kat lalah granos singka minitkau papusbah ahana dai, holi pāni tikini kidika kaput.

²⁷Lalah manah paun 6,600 sakdai buswi holi pāni panan dawak tunan yakat asna ilwa kidika panani balna ukna atnin. Kidika lalahni bitik kidika uknin panani 100 yakat duwi di yayamna dai, yuldarangkat, uknin panan as yakat lalah manah paun 66 diswadai.

²⁸Muih balna bitik yakat[30] lalah ududuhna dai kidika, Bezaleel yaklau ū rahni panani rahni balna, makau nandaknin dini balna kidika dawi ting-ānin balna kidika yamna dai.

²⁹Papang yakat minitdis kalanin brasni kalalana kidika laih, bras manah paun 4,672 dai,

³⁰dawak kidika brasni kau kalpaknin ūni labanni dūrni panani uknin balna kidika, sakripais busnin pāni bras kau kidika, bras panani lakwi pardawi birna kidika, dawak sakripais busnin pāni yakat dunin dini balna kidika yayamna dai,

³¹dawak holi pāni watakni awaihwa kau uknin panani balna dawak uknin panani subangni balna kidika dawak watak dūrni panani uknin balna kidika kauna yayamna dai.