Read Mayangna Éxodo 40 Bible Online

Éxodo 40 - Mayangna bible

Éxodo 40

¹Dawan laih Moses yakat kiwi aput kalyulna:

²“Waiku tatuna kawak ma tatuna yakat holi pāni kidika dawak Papang karak kalpaknin ūni labanni uita ama.

³Kidika pasyakat pramis baksni kidika atah, dawak tunan muknin asnina yakau muktah.

⁴Kidika pasyakat tibil dawak awas ilnin pāni kidika bik atah. Tibil kidika yamni lakta awas balna kidika panina diatah.

⁵Sakripais busnin walapni pāni kidika pramis lani baksni kidika muhnityakat laktah, dawak holi pāni kiwikawa kau rinin asnina kidika ritah.

⁶Usnit kat sakripais karauni kauna balna busnin pāni kidika holi pāni kiwikawa yakat dawak kalpaknin ūni labanni kiwikawa yakat bik laktah.

⁷Usnit kat ting suhnin dini kidika kalpaknin ūni labanni dawi sakripais busnin pāni karak walsah yakat laktah, dawak was bangtah.

⁸Bahang kidika yaihnit yakat watak kidika atah, dawak watak kiwi kawa asnina kidika ritah.

⁹“Usnit kat Papang dini yakwi tunan yakat utuhnin diani kidika duta holi pāni dawak kidika yakat di balna bangkidika minitna yakat utuhtah. Kaput karak kidika yakat dunin dini balna bitik kidika Papang dini yaknaman karang, dawak kidika laih pa as holi karang.

¹⁰Papang dini yakwi tunan yakat utuhnin diani wasni kidika duta sakripais karauni balna busnin pāni yakat dawak dunin dini balna minityakat bik utuhtah. Kaput Papang dini yakma dawak kidika sakripais busnin pāni laih holi karang.

¹¹Ting suhnin dini dawak uknin panani minityakat bik dia wasni kidika utuhtah, dawak kaput Papang dini yaknaman karang.

¹²“Usnit kat Aarón dawi walaninabis ahal balna yakauna diduyawah kalpaknin ūni labanni dūrni ulis yakat, dawak di yamtang was kalsisiwang

¹³dawak Aarón laih witing prakni kidika kawang. Usnitkat witing minityakat dia wasni kidika utuhtah yang sumalkiyang yakna atnin yulni.

¹⁴Usnit kat walanibis ahal balna yaihnitna yakat yawa praknina naini kidika di-atah

¹⁵dawak witingna minitna yakat dia wasni utuhtah, sihm Aarón yakat yamnaman kaput, kaput karak yang sumalkiyang balna atnin. Witingna minitna yakat dia wasni utuhna yulni sumalyang as ban kaput atnin yakwi dawi kurih balna pasyakat.”

¹⁶Moses laih Dawan yaklau amput yamnin kalyulna dai kat kaput yamna dai.

¹⁷Dawak kaput, Egipto kaupak kalalahna kaupak kurih bu kawa yakat, waiku tatuna kawak ma tatuna yakat, holi pāni kidika awi danadai.

¹⁸Moses laih holi pāni kidika awi dana dawak uknin panani balna kidika ukna, tat balna kidika lakna, pan kusna karauni balna kidika lakna, ū rahni balna kidika dulauna,

¹⁹holi pāni minityakat ū labanni kidika dulauwi isna, dawak nandaknin dini kidika dulauwi nandakna ū labanni makau niningyakat, Dawan yaklau yamnin kalyulna dai kaput.

²⁰Usnit kat Moses laih lā tatni balna kidika duwi pramis lani baksni pasyakat ana; usnit kat pramis lani baksni yakat pan kusna kararauni balna kidika ana dawak putnin kidika laih maluih niningkauh yakat ana, dawak holi pāni kaupak pastawa niningkauh yakat duwi kiuna; bahang kaput laih tunan mukwa asnina kidika kau la baksni kidika mukna, Dawan yaklau amput yamnin kalyulna dai kat kaput.

²²Usnit kat tibil kidika laih kalpaknin uni labanni kidika pasyakat ana dai, holi pāni kaupak tingpal niningkauh, kaunah tunan mukwa asnina kaupak ahni yakat.

²³Tibil kidika minityakat plawar busna kidika yamni lakna Dawan muhni yakat, Dawan yaklau amput yamnin kalyulna dai kat kaput.

²⁴Awas ilnin pāni kidika bik kalpaknin ūni labanni kidika pasyakat ana dai, tibil muhnit, holi pāni kaupak wadah niningyakat,

²⁵dawak awas balna kidika dahlna Dawan muhnityakat, Dawan yaklau amput yamnin kalyulna dai kat kaput.

²⁶Sakripais busnin pāni gol kau yamna kidika kalpaknin ūni labanni kidika pasyakat ana, tunan mukwa asnina kidika muhnityakat,

²⁷dawak kidika yakat busnin walapni kidika yakat busna, Dawan yaklau amput yamnin kalyulna dai kat kaput.

²⁸Usnit kat Moses yaklau holi pāni kiwikawa rinin asnina kidika rina;

²⁹usnitkat sakripais karauni kauna busnin pāni kidika holi pāni kiwikawa yakat, kalpaknin ūni labanni kiwikawa yakat bik lakna, dawak kidika yakat di tinglau balna dawak minitdis kalanin dini di minik balna bik busna, Dawan yaklau amput yamnin kalyulna dai kat kaput.

³⁰Ting suhnin dini kidika, kalpaknin ūni labanni kidika dawi sakripais busnin pāni kidika karak walsah yakat lakna, dawak was utuhwi bahngna, kalsuh kalahna atnin yulni.

³¹Kidika pāni kaupak Moses dawak Aarón walanibis ahal balna kauna was yayakwadai, tingnina dawak kalnina suhna atnin yulni.

³²Kaput kalsusuhwa dai kalpaknin ūni labanni yakat kakawakat dawak sakripais busnin pāni kidika yaihnit yakat bik uiwa kat, Dawan yaklau Moses yakat amput yamnin kalyulna dai kat kaput.

³³Witni kat, Moses yaklau watak kidika holi pāni dawak sakripais busnin pāni kidika niningyakat āna dai, dawak watak kiwikawa rinin asnina kidika bik rina dai. Moses witing kalpaknin ūni labanni kidika yamwi dana mani kat,

³⁴mukus kidika laih kalpaknin ūni labanni kidika minityakat muklakna dawak Dawan alasnina yaksihni kidika laih holi pāni kidika bahngna dai.

³⁵Moses laih kalpaknin ūni labanni pasyakat kana atnin sipawas dai kat mukus kidika laih ū labanni minityakat kaibukna dai kidika yulni dawak Dawan alasnina yaksihni kidika laih holi pāni kidika bahngna dai.

³⁶Mukus kidika holi pāni minityakat yaklauna kat, Israel muihni balna kidika laih ūnina labanni kidika dulauwi tanitna yakat uiwadai,

³⁷kaunah mukus kidika yaklauwas laih, witingna bik ūnina labanni kidika dulalauwas dai, kaunah witingna laih tahahawadai mukus kidika yaklauwak kat.

³⁸Israel muihni balna ta naini lapapakna pasyakat, dawak witingna bitik miniknapa yakat, Dawan mukusni kidika laih holi pāni kidika minit yakat dai madah yakat, dawak pukta yakat laih holi pāni kidika minityakat kuhpau as sakdai.