Read Mayangna Éxodo 6 Bible Online

Éxodo 6 - Mayangna bible

Éxodo 6

¹Dawan yaklauwi nangnitlana: —Waradika talma fero yakat ais kalyamkipa, parasni kaupak manah laih dawak kidika pāni kaupak kalahna karang; kaput bik laih witing silp diyulwarang mahka kalahwi uinin kidika.

²Papang, witing Moses yakat kiwi kalyulna: —Yang kuduh DAWAN yang.[6]

³Yang lāih alahwanayang Abraham, Isaac dawak Jacob yakat, ayangki laih, Papang parasni nuhni duyang, kaput kaunah yang ayangki palni kau dutik lāih alahwas yang dai: DAWAN.

⁴Witingna karak pramis as yamnayang dai bahang kidika laih witingna yakat Canaán sauni kidika dianik, yuldarang kat kidika sauni yakat witingna tringsar kapat yalalahna dai kidika.

⁵Dawak waradika amanglanayang Israel balna dutni wawauhwa kidika, bahang kidika laih Egipto muihni balna yaklauwi papakwak wark kalahwi, bahang waralaih yang prakimis dai kidika isingkatwi.

⁶Kaput bahang, Israel balna yakat yawa diyultah, yang Dawan yang, bahang dilaihtik yakki warau lani kidika kaupak, Egipto muihni balna yaklawi wark parasni dipapakwak yayamwa kidika kaupak. Yang paraski nuhni kidika kau, lakat yamnin muhni kidika kau bik dilaihtik yakki.

⁷Manna kidika yang tawanki kapat manaduki, dawak yang laih manna Papangmana awaki. Kaput laih amanglalawarang yang laih manna Damanawan dawak Papangmana yang kidika, Egipto muihni balna yaklau wark parasni yakat mana- ahana dai kidika kaupak manalaihwi yakna kidika.

⁸Abraham, Isaac dawak Jacob balna yakat pa as dianik pramis yamnayang yakat duyawaki, dawak kidika manna dimana manaki. Yang kuduh Dawan.

⁹Moses yaklauwi adika yulni Israel balna yakat diyulna dai, kaunah witingna kukulwas dai yulwa kidika, kat witingna ditaihwa kidika yulni kulninna sau palni yakat bukna dai bahang.

¹⁰Kaput laih Dawan yaklauwi Moses yakat kalyulna:

¹¹—Fero yakat yawa kalyultah, dawak Israel balna kidika kalalahwang Egipto kaupak.

¹²Kaunah Moses yaklauwi Dawan yakat nangnitlana: —Israel balna bik yang bik yang yulki dakakawas ki; ¿bahang amput fero witing yulki balna kidika dakawarangyah, kat yang tuki yamni yulbautasyang kidika?

¹³Kaput laih Dawan yaklauwi disihna Moses dawi Aarón karak, fero yakat kalyulna atnin, Papang witing yaklauwi pakna Israel balna kidika Egipto kaupak yakna atnin.

¹⁴Adika balna kuduh papang balna, papangnina tani niningkauh. Rubén walanibis balna, Israel walanibis al tatuna kidika laih Hanoc, Falú, Hezrón dawak Carmi. Adika balna kuduh Rubén sulani balna.

¹⁵Simeón walanibis ahal balna: Jemuel, Jamín, Ohad, Jaquín, Zohar dawak Saúl dawak kidika laih Canaán yalni as walanibis dai. Adika balna kuduh Simeón sulani balna.

¹⁶Leví witing kurih 137 sangka dai. Adika balna witing walanibis ahal balna ayangnina muih barak kaupak dibin kat: Gersón, Coat dawak Merari.

¹⁷Gersón walanibis ahal balna: Libni dawak Simei.

¹⁸Coat laih sangka dai 133 kurih, dawak walanibis ahal balna laih: Amram, Izhar, Hebrón dawak Uziel.

¹⁹Merari walanibis ahal balna laih: Mahli dawak Musi. Adika balna kuduh Leví sulani balna, barakni kaupak dibin kat.

²⁰Amram laih nabisni Jocabed karak kalduduna, dawak walaninabis yayakna ayangni laih Aarón dawak Moses. Amram laih 137 kurih sangka dai.

²¹Izhar walanibis balna: Coré, Nefeg dawak Zicri.

²²Uziel walanibis balna: Misael, Elzafán, dawak Sitri.

²³Aarón laih Elisabet karak kalduduna, bahang sirau kidika laih Aminadab walanibis dai, Naasón wirahni yak, bahang witing walanibis yakna dai ayangni laih Nadab, ūk laih Abiú, Eleazar dawak Itamar.

²⁴Coré walanibis ahal balna: Asir, Elcana, dawak Abiasaf. Adika balna laih coreíta sulani balna.

²⁵Aarón walanibis al as ayangni Eleazar, witing laih Futiel walanibis yal as karak kalduduna dai, bahang walaninabis as yayakna dai ayangni laih Finees. Adika balna kuduh levita balna wanaihnina sulanina balna.

²⁶Sihm adika muihni balna kuduh Aarón dawi Moses yakat Dawan yaklauwi diyulna dai Israel balna kidika Egipto kaupak yakna atnin, sihm kalbauyang muihni balna kapat uduhwi.

²⁷Sihm adika muihni balna kuduh Aarón dawak Moses witingna fero karak yulbabauna dai kidika, Egipto kingni Israel balna kidika yakna atnin.

²⁸Dawan yaklauwi Moses karak yulbauna mani, Egipto yakat,

²⁹dawak kalyulna: —Yang laih Dawan yang. Egipto kingni fero yakat kalyultah, di mayulki balna bitik adika.

³⁰Kaunah Moses yaklauwi nangnitlana: —Dawan, yang tuki yamni yulbautasyang, kaput bahang, ¿amput fero yang akat yulbauki kidika yadakawarang yah?