Read Mayangna Job 1 Bible Online

Job 1 - Mayangna bible

Job 1

¹Uz sauni yakat muih al as sakdai ayangni laih Job, witing sangnika kidika laih barangni, dawak dutni as bik disdai, Papang yulni kat dakawi yamwadai, isning yakat kulwadai muih kau dutni yamnin-awas.

²Job walanibis ahal tiaskaubu duwadai, dawak walanbis yayal laih bās duwadai,

³kaput bik sīp tausin tiaskaubu duwadai, kiamil tausin bās, turuh pan muryang andat singka, dawak biriku yayal andat singka duwadai. Kidika minit yakat warauni balna mahni duwadai. Al as di duyang dai witing manah, masar niningyakat.

⁴Job walanibis balna kidika ūnina kat kat alasna yayamwadai biri, biri kidika alasnina yayamwa yakat wirahnina yayal bās kidika yulwi duwi uiwadai.

⁵Kidika alasnina yamwi dahn kalalahwakat, Job walanibis balna yakat diyulwak uiwak, mapiris yaklauwi sakripais karauni kauna buswadai, walanibis balna bitik yakat, dutnina balna kidika dis yamna atnin. Job, witing niningh kaput manah yamwadai, witing kulwadai walanibis balna kidika Papang niningkauh dutni yuyulnapa[1] kulninna dinitkau.

⁶Ma as kat Dawan muhni yakat uinindai makau kisang kau witing dini yamyang balna[2] duwa kidika, bahang kidika yakat insal yul trukyang[3] bik kiunadai, kidika balna pasyakat.

⁷Dawan yaklauwi kalyulwi dakana dai: —¿Angkaupak aiwamahn? Dawak muih yulnina trukyang kidika yulwadai: —Sau yakat awaihtik tala likkauna aiwayang.

⁸Dawak Dawan yaklau kalyulna: —¿Yang diki yamyang Job kidika yamni lakta talnamanh? Sau yakat ūk diski witing kapat, yang yulki kat dakawi yamwi, sangnika barangni ki dawak dutni asbik diski, kaput bik isning aiwi dutni yamnin-awas, muih balna yakat.

⁹Dawak yul trukyang kidika yulwadai: —Dauh palni kat kaput man yulma dakawi yamwas ki.

¹⁰Man datang kat muih as bik witing yakat susukwaski, sulani balna yakat, dawak dini balna yakat bik, di yamwa balna bitik yakat blisyamtaman, witing manah al as di duyang ki tinglau nining yakat, muih bitik pasyakat.

¹¹Kaput kauna di duwa balna kidika niningyakdata talah, amput dutni mayulwarangpa, man muhma kat.

¹²Dawan yaklauwi yul trukyang yakat nangnitlana: —Yamni ki. Man amput yamkih mawa yakat yamta Job dini balna kidika, kauna witing muihni yakat laih dutni as bik kalyamwinih. Kaput laih, muih yulnina trukyang kidika Dawan muhni kaupak kalahwi kiunadai.

¹³Ma as kat Job walanibis ahal balna kidika, dawi yayal balna kidika karak kalpakwi alasna as yamwa bangdai, wirahnina barakni palni ūnina yakat,

¹⁴Job uni yakat al as kiwi kawi adika yulni kalawadai: —Yangna sau sahta bangyangna dai turuh balna yakau dutik, dahnin pāni kidika, dawak biriku yayal kidika yaihnit yakat di kaswabangdai;

¹⁵isingna aitasyangna kat Sabá muihni balna uiwi tinglau balna malwi, dawak muih balna yakat bik kuhbil kau ihina. Yang manah irik lawanayang, bahang aiwayang ismangpakna.

¹⁶Baisa kidika kalyulwi dawaskat, ūk kiwi kawi kalyulwi: —Alwana parasni ruhmwak sīp maintalyang balna dai kidika dadauna, dawak sīpnina balna bitik dadauna. Yang manah irik lawanayang bahang aiwayang ismangpakna atnik.

¹⁷Kidika alni baisa yulbauwi dawaskat, ūk kiwi kawi kalyulwi: —Caldeo muihni balna dakni bās aiwi yanalalaihna, kiamil balna mamalna, dawak muih balna bik kuhbil kau ihina, yang manah irik lawanayang, bahang aiwayang ismangpakna.

¹⁸Baisa kidika yulwi dawaskat, al ūk kiwi kawi kalyulwi: —Walamabis ahal, dawak yayal balna kidika bik alasna as yayamwa bangdai walamabis al muihbarak kidika uni yakat,

¹⁹dawak di sirihni palni wing parasni as kaiwi ū kidika tukuhwi bukna walamabis balna minitna yakat. Dawak witingna bitik laih dadauna. Yang manah irik lawanayang bahang aiwayang ismangpakna.

²⁰Dawakat, Job witing yaklauwi parakni iswi bisna, witing dalani nuhni duna kidika yulni, basni karhwi dawi limbabahna minit yulnin kapat.

²¹Dawakat aput yulna: —Asna dis aiwanayang adika sauni akat, kaput bik asna dis adika sauni kaupak yawakiki. Dawan yaklauwi yana, dawak Dawan yaklauwi yadakyakna: ¡Dawan ayangni kidika nuhni yamna karang!

²²Kaput laih, witing yakat di bitik kalahna kidika, Job dutni yamwasdai, dawak Papang niningyakat bik dutni yulwasdai.