Read Mayangna Job 12 Bible Online

Job 12 - Mayangna bible

Job 12

¹¡Dauh kulnamna awaski manna laih tawan yulwa kidika yultamana, dawak manna dautanama kat sins lani nuhni kidika baisa diskarang!

³Kauna yang bik amanglanin kidika dutayang, dawak manna damatna yakat awasyang. ¿Wais amanglawasyah kidika dini balna bitik?

⁴Yang dutni yamtasyang bik, ma ūk balna yakat, Papang yakat buktik yultingkat yadakawadai, dawak kaltalyang yamni balna kidika nikingkakarana dai.

⁵Angdika muihni, witing alas muihni yakat rahm kaldakawa kidika, dalani wauhwa muihni yakat di dauh kapat kaltalwi, isning kulwas ki buknin manah muihni yakat tukna atnin.

⁶Muih dudutni balna ūnina pasyakat kulnin lani aslah duduna ki; dawak Papang yakat dutni kalyuyulwa balna kidika isningnalak yalalahwi, bahang witingna kukulwi tingninasuru yakat aitani duduwi.

⁷Di kalni arungka duwa balna yakat yulta dakah, dawak lawani duduwa balna yakat bik yulta dakah: witingna sipki masumalna atnin.

⁸Dawakat sau yakat, kuma kau waspadini balna yakat bik sipki yultang masumalnin.

⁹¿Baisa muih as amanglawas likyah di balna bitik Papang witing tingnikau yamna kidika?

¹⁰Witing tingni yakat sakki sangka balna bitik sangninaka kidika.

¹¹Matapaki yaklauwi yamwak yul balna kidika sat sat dakadi, kaput bik matuki yaklauwi yamwak kasnin dini balna auhni sat sat kidika dakadi.

¹²Muih bararak balna kidika sins tuhni kulwi yaknin kidika duduwi; witingna kurihnina kidika yaklauwi amanglanin kidika diana.

¹³Kauna papang laih di bitik amanglawi dawak parasni nuhni duwi; witing warkni balna yamnin kulwa kidika yakat yamwi.

¹⁴Papang yaklauwi daukalpamwa kidika muih as bik watwi laihwi dulauwi yamwas ki; dawak Papang yaklauwi putwa kidika muih as bik sip laihwi yakwaski.

¹⁵Witing yaklauwi waslaunin kidika laihwatwakat, di balna bitik buhlawi; dawakat dapamwak kalahwakat was kidika banghilwi sau minit yakat.

¹⁶Witing parasni duwa kidika yaklauwi kalawak minit bayakwi. Alas yulyang muihni dawak alas kalyulwa muihni kidika bik witing tingni yakat ki.

¹⁷Witing yaklauwi yamwak sins duyang muihni balna kidika sinsnina diswi[19] dawak wihta balna bik sinsnina diswi.

¹⁸King balna yakat parasninadis didawi, dawak damukwak uiwi warau tingni yakat wahdis.

¹⁹Sumalyang nunuhni balna kidika warknina kaupak didakyakwi, dawak parasni nuhni duwa balna kidika lakmukna ki.

²⁰La sumamalwa muihni balna yamni dikukulna dai kidika, witingna yul dis kakalna sumalna atnin, dawak muih bararak balna kidika la kat yamnin dai kidika witingna kaupak didakyakna ki.

²¹Witing yaklauwi yamwak, muih nunuhni balna kaldakakawa kidika dauh dikukulna ki, dawak pararasni balna kidika parasninadis kakalna.

²²Di as malni kau sakkidika, witing yaklauwi lāih yakna ki, dawak puksani kau kidika bik yaringni yakat yakna ki.

²³Witing yaklauwi nuhni kalyamwi, dawak muih balna kidika iwi dis yamwi, kaput bik laih pa ūk yakat sihwak ruhwi uiwi, dawak bik watwi uduhna ki.

²⁴Nisan balna taninatuna balna sinsnina sirihni kidika dakyakna ki, dawakat diyamwak kauhmak wanilang ta dis yakat pini ta didiswi,

²⁵kidika puksani yakat tulnah kau uiwi, dinanahwi sihm wasak dadauna kapat.