Read Mayangna Job 13 Bible Online

Job 13 - Mayangna bible

Job 13

¹Kidika bitik yang silp mikpa kau talnayang, dawak yang silp tapaki kau dakanayang.

²Manna amanglatamana kidika yang bik amanglatayang, manna damatna kauh laih awasyang.

³Kauna, yang Papang karak yulbaunik kidika dukih yawi, dukih yawi parasni nuhni bitik duwa kidika karak yulbaunik.

⁴Di rahm kidika manna taihtamana alasmana kau, manna laih daktar mana kauna muih sikninis as bik yamtasmana.

⁵¡Manna tamanapas manah bik ap datanama kat, manna sins nuhni dutamana kapat awanama!

⁶Yang akat yamni yadakanauh, yang yulki balna yultayang kidika.

⁷¿Kultamana, manna Papang tunan minit yultamana alas lani kau, dawak witing dini yamtamana yul alas balna kau?

⁸Manna witing karak mana, dawak witing ilpni yultamana,

⁹kauna, ¿ais kalahwarang Papang di balna kidika yamni lakwi talwarang kat? ¿Manna muih al as kau alas kalyulnin kapat alas kalyultanama yah?

¹⁰Yamtas mana kapat bik witing ilpni āwamana, witing yaklauwi parasni palni manabilna karang.

¹¹Papang nuhni kidika yaklauwi bilmanalauna karang.

¹²Manna yulbautamana kidika laih umani ki, sihm sau yahamni kapat, kidika laih sihm wasmak daklana kat pining yakat mahawi mamalda kapat ki.

¹³Dawakat, ¡waralaih ap awanauh yang yulbauki ki, yang akat ais yakalahwarang bik!

¹⁴Sangkika adika dutni yakat ānin yakki ki, bitik palni laih isdana awaki.

¹⁵Witing yaīwarang bik, barangni kulnayang yakat karang ki, yang witing karak muhkina libitki kat, kidika laih yang takit daknik yulni.

¹⁶Sip karang yakat kal-laihtik yaknik kidika sakkarang, kat muih dutni kidika sip witing muhni kat kiwi yaklauwas karang ki.

¹⁷Yamni dakanauh, yang manna yakat manayulki kidika.

¹⁸Yang takitdaknin kidika yulki ki, yang amanglatayang yang rahm kidika yulki ki.

¹⁹Muih as dutni yamting talwi yulki yakwarangkat, ap daki, dawak mahka dauki.

²⁰Papang, di bu kidika manah yatah, dawak yang maldas awaki man kaupak:

²¹Wah yataman kidika datah, dawak yayamtang uba muihsak daunik awaski.

²²Yayulta, yang nangmatlaki; kidika awaskat yang tatuna yulbauki, dawak man nangkitlama.

²³Yayulta, ¿angdika balna yang dutni yamnayang? ¿Angdika yang muih inayang?

²⁴¿Ais yamta yang kaupak maldaman? ¿Ais yamta man waihmala kapat yayamtaman?

²⁵Yang laih dibasta as wing dulauwa kapatyang, ¿ais yamta yaikuh timan? Rahm laih dibasta kusulana kapatyang, ¿ais yamta yauita aiwaman?

²⁶Tapalhni bās yang akat yailtaman; wahmayang kat dutni yamnayang dai kidika yayultaman.

²⁷Kalki yakat sīn ataman, lapaktayang bitik yakat yalakta talaman.

²⁸Di dutlana kapat muihki adika diswi kiwi, sihm asna banibil kaswa kapat.