Read Mayangna Job 14 Bible Online

Job 14 - Mayangna bible

Job 14

¹Muih yal kaupak, al as batahn dawa kidika, witing sangnika parahni duwi, dawak yamadunin lani manah ki.

²Sihm dipulu as sahwi, kauna tihndawak kusulawa kapat; bayakkiwi sihm masanni bayakkiwa kapat.

³¿Adika alni yakat man mamakpa talaman, witing niningyakat la ānin kultaman?

⁴Muih as bik diski maisihni kaupak maisihnidis as yamna atnin.

⁵Man lawa muih al sangnika naini ampus duwarang kidika kalataman, dawak kidika kaupak sip bayakwas ki,

⁶witing kaupak man mamakpa kidika yakta, dawak datangkat kulnin aslah duwang; ¡datang kat sangnika kidika wark kalahwi minit duwi alasna kawang!

⁷Pan as dakpamwarang kat, sipki watwi ukuswi kilna atnin, dawak watwi wisam kalnin kidika dis awaski.

⁸Rikni balna kidika muih bararak kalna karang, dawak saran kidika dutlana karang bik,

⁹was sanni kidika utuhwarang kat watwi sangni kalwarang ki basni balna; pan wisam as barakwa kapat rahni balna bik yakna karang.

¹⁰Muih al laih dauwi sinika dis; dawak ¿dauwa kidika angkat kiwi?

¹¹Kuma kidika sipki buhlaknin, dawak was murwa balna kidika buhlaknin;

¹²kauna makau kisang kidika ban karangkat, muih al sauni-ū kaupak sip yaklauwas karang, kamatus kidika kaupak sip sahmuhwas karang.

¹³¡Yamni kitdai dadauna pāni yakat yamaltada kat laih, kulnam annin nuhni kidika bayakwakat, dawak ma as ānamdai yang akat ismangkatna atnin!

¹⁴Muih al as dauwarang kat ¿sipyah watwi sangka kalna atnin? Yang tahatitikdai ma bitik yakat warkki balna kidika ban atnin, yang dalani wauhtayang kidika sanni kalwarangkat.

¹⁵Man yayultang kat, yang nangmatlatitikdai; dawak man yamni yatalnamdai, kat man lawa yayamnaman bahang.

¹⁶Waradika lapaktayang bitik yakat yalakta talaman kat, yang dutki balna yakat laih talas awama;

¹⁷dutni yamnayang balna kidika datang damatkahwitdai, dawak dutki balna kidika kaupak klin yayaktitimdai.

¹⁸Asang nunuhni balna bik ihrwi, dawak kipala nunuhni balna kidika pa ūk yaklalawi.

¹⁹Was kidika yaklauwi yamwak kipala kidika witwi binibin kalwa kapat, was lauwa kidika sau yahamni balna murwi duwi kiwi, kaput laih man lawa muih al tahanin duwa kidika daukaltaman.

²⁰Man lawa minit bayaktaman ban kaput atnin yulni, dawak witing sauni kaupak bik kangta yaktaman, dawak witing kidika kiwa yakauna daukalwi diswi.

²¹Walanibis balna kidika rispik lalaihwak bik, witing amanglawas ki; dawak dutni yakat bubukwak bik witing amanglawas ki;

²²witing muihni nuhni dalawa kidika manah dakawi, dawak alas muihni nuhni yakat wauhma kidika manah dakawi.