Read Mayangna Job 15 Bible Online

Job 15 - Mayangna bible

Job 15

¹Muih as sins nuhni duwa kidika yul dauh sins lani dis kidika yulwas ki, dawak bik kulnin daukalwas ki yul as wing manah bayakkiwa kidika yulni;

³dawak dauh manah laih yulbauwas ki, sins lani dis balna kidika yulwas ki.

⁴Kauna man laih Papang kau nuhni kalkulnin dai kidika dauh yamtaman; ¡dawak Papang kau rahm makulnik dinitkau ayangni nuhni yamnin dai kidika bik!

⁵Man kulnam dutni kidika bahang kaput yulbautaman, dawak alas yulni balna bik duta yulbautaman.

⁶Baisa yulnik sip-awaski dutma balna kidika, kat man alas tamapas yaklauwi dutni yakat masihwa bahang.

⁷¿Man kultaman laih tamat yakat muih ūk diski, dawak asang nunuhni balna yaka bik disdai kultaman?

⁸¿Man kultaman laih, Papang yakat yul sumalnin muihni as kaldakaman, kidika awaskat sau akat man manah sins nuhni dutaman kaldakamahn?

⁹¿Man ais amanglataman dini kidika yangna amanglatasyangna? ¿Dawak ais amanglatasyangna man amanglataman dini kidika?

¹⁰¡Yangna laih uman muih bararak yangna, dawak man papangma kapat tanit di amanglatayangna!

¹¹¿Papang yaklauwi walama āwarang kidika aitani kultasman, dawak yangna bik man yakat yul yudutni tani mayultanaki kidika?

¹²¿Aisyamta datangkat man kulnam yaklauwi madukiwak mamakpa balna kidika sasanni talamahn?

¹³¿Amput dawak Papang niningkauh kulnam daukalta tuma laihwattas yultamanh?

¹⁴Muih al as bik dutni dis-awaski, dawak dutni yamwas bik awaski.

¹⁵Witing innisal balna palni bik kulnin bitik laih rahm dikulwaski, dawak makau kisang bik witing minikpa yakat yamni manah kapat laih talwaski,

¹⁶¡dawak muih al laih tanit dutni yamwi bahang dutni talna ki, bahang yuldarang kat muih as was diwa kapat laih dutni yamna ki muih al kidika!

¹⁷Yadakah, di as talnayang kidika mayulki ki, bahang kidika laih uman talik bayaknayang,

¹⁸di balna kidika sins nuhni duyang balna yaklauwi manikingkakawi. Witingna muihnina bararak balna kaupak lan kakalna,

¹⁹dawak kidika balna yakat sau diana dai, dawak witingna kidika muih ani satuk balna karak kalbahahawas dai.

²⁰Muih al dutni dawak kulnin daukalyang kidika witing sangnika parahni ki, dawak bik dutni manah ki.

²¹Di as parasni tapani yakat dakawarangkat muihsakdauwi; pa as yamni kat sakyangti kaldakawa pāni yakat dimalyang balna yaklauwi dini mamalwarang ki.

²²Witing tani tahanin as bik diski puksani kaupak kiri yaklana atnin kidika: ¡kuhbil as tahawa sakki witing yakat ina atnin!

²³Witing muihni kidika upam balna kakaswarang; witing amanglawi, daunin kidika[20] kaupak sip yaklawas kidika.

²⁴Puksani kidika yaklauwi bilnilauna karang, dawak kaidinin kidika witing yakat kal-laihna karang, sihm king as kalbauwa kapat waihnila nining yakat.

²⁵Angdika muihni Papang yakat tingni dulauwa kidika kaput kalahna ki witing niningyakat, dawak kaput bik parasni nuhni bitik duwa niningyakat yaklauwa muihni kidika bik kaput kalkalahna ki,

²⁶angdika muihni tanit daknin dini kau duwi tanit dakwa kidika, Papang niningyakat parasni yaklauwi.

²⁷Muhni dawak pirini balna kidika disala manah kalkahna.

²⁸Angdika tawanni nunuhni balna yakat yalahwarang bik witing yakat dutni kalahnin kidika laih ban ki; uni balna kidika laih muih yaklauwi ruhmwi dadana karang; dawak bahwi uhna babang karang.

²⁹Ma mahni laih di duyang awas karang, dawak dini balna kidika sau akat baisa laih barakwas karang.

³⁰Puksani kidika kaupak sip kiri yaklawas karang. Sihm pan udungwi kilwak kuh busna kapat karang, kidika awaskat puluni[21] balna kidika wing yaklauwi duwi kiwa kapat karang.

³¹Mutu kapat laih alas yulwa yakat dakawinih, di as dutas awama, dauh manah alas mayulna karang.

³²Baisa kusunin mani kaiwas kat tingni balna kidika kusulalana karang,[22] dawak watwi sangni duwas karang.

³³Sihm wain minik lalahwas kapat karang, dawak bik olib puluni uhwa kapat bik karang.

³⁴Muih dudutni balna kidika laih sulanina dis karang, dawak ūnina kau di manas duduwa kidika, muih kaupak malwi, kidika balna laih kuhkau busna karang.

³⁵Di dutni manah banina yakat dibahngna, bahang yayakwarang kidika laih di dutni karangki, dawak minik yakwa balna kidika alas manah karangki.