Read Mayangna Job 17 Bible Online

Job 17 - Mayangna bible

Job 17

¹Wingkita bitik laihwatwi; yang sangkika adika mahka witni yakat kiwi; sau-ū kidika taki tahawi.

²Yang yaihkit yakat muih bangki kauna, muih kau sarahni yulyang balna manah bangki; pukta madah muih uhuswi.

³Kaunah Dawan man laih sipman yang yulki nangkitlanam; ¿man yamtasman kat wais as sipyah yamnin?

⁴Man lawa sinsnina kidika satuk wirlapamnaman bahang, datangkat mikit bayaknin awaski.

⁵Yuh wawauhwarang[24] walaninabis balna, angdika muihni minit dibin dunin yulni wanaihnina yakat malnikau dutni diyayamwa kidika.

⁶Man yamtangkat muih bitik yang yulki dutni yuyulwi, dawak muhki yakat bik susuih tutuhwi.

⁷Mikpa balna kidika mukus pihni manah kalwi dalawakat; dawak muihki nuhni kidika laih masanni as kapat ki.

⁸Muih yayamni balna, adika dini di wisam as tatalwi; kulninna daukalwi, dawak yang adika muih dutni as yakukulwi.

⁹Wat wat yuyulwi, witing laih dutni as bik yayamwas ki, dawak tingnina bik maisihni yayamwas ki.

¹⁰Kauna yang akat aiwanauh, manna bitik, dawak manna pasyakat sins duyang muihni as bik yaktas awaki.

¹¹Yang sangkika mani balna kidika bayakkiwi, dawak yang warkki balna, dukih yawa balna kidika bitik laih dauh kalna ki.

¹²Kauna manna laih pukta kidika madah yamtamana; ¡puksani karang bik yultaman yaringni kidika kaiwi!

¹³Yang di aslah tahanik kidika laih daunin, dawak puksani yakat alangwik aminik.

¹⁴¡Yang papangki, nanangki dawak wirahki balna laih babil balna sau-ū kau bangkidika!

¹⁵¿Yang tahanik kidika angkat sakyah? ¿Yang yamni atnik kidika[25] angkat sakyah?

¹⁶¿Yang karak daunin pāni yakat uiwarangyah, kalpaktik sau yahamni yakat kalangna atnin?